ياخ إنتِ عارفة الحاصل شنو؟ لمن أتأمل وشّك، بحس إنو الزمن مهما مرّ، ومهما خلّى فينا من تعب وشقا، لسه في حاجات جميلة بتقدر ترجع الروح زي زمان في وشّك حاجة غريبة.. براءة كدا وراحة ودفء، تخلي الزول يحس إنو الدنيا لسه بخير، وإنو العمر ما بالسنين البنمشيها، لكن بالحاجات البتخلّي قلوبنا تصحى من جديد وتقول بكل ثقة ووقار دا قررنا وعيونك العسليات ديل حكاية براهن.. فيهن دفا وأمان، وفي نظرتك كلام كتير ما محتاج لسان ينطقو و مرات بحس إنك بتفهمي الحاصل جواي من غير ما أقول كلمة، وكأنو بين عيونك وروحي معرفة قديمة ما انقطعت رغم طول الغياب
وشعرك؟ يا سلام عليكِ! دا حكاية براها لون بين سواد الليل ولمعة السنابل، وطول وانسياب يخلي الواحد يتوه في تفاصيله كل ما أشوفو بحس إنو الجمال مرات ما محتاج وصف، لأنو في حاجات بتخلي الكلام ذاتو يقيف عاجز وحتى صوت.. عندو حكايتو الخاصة. نبرة دافية، فيها حنية وراحة، ولمن أسمعك بعد الغياب الطويل، بحس كأنو حاجة جواي رجعت لمكانها، وكأنو الزمن وقف شوية عشان يديني فرصة أسمعك من جديد
وأحلى حاجة في الحكاية دي كلها إننا رجعنا نتلاقى بعد السنين دي، ولسه في قلوبنا إحساس قادر يبدأ من جديد كأننا بنفتح صفحة جديدة، من غير خوف ولا قيود، وما دايرين يكون في حياتنا سلطان غير سلطان الريدة الصادقة والاحترام المتبادل
عارفة؟ إنتِ بالنسبة لي ما مجرد زولة رجعت ظهرت في حياتي بعد سنين إنتِ حكاية قديمة لسه فيها نبض، وإحساس كنت متخيل إنو الأيام دفنتو لكن اكتشفت إنو لسه عايش جواي
أنا ما بشوف فيكِ مجرد جمال وشكل وملامح، أنا بشوف روح بتريحني، وحضور بيفرحني، وإنسانة بتخليني أحس إنو في العمر بقية للحاجات الحلوة
يمكن السنين غيّرت فينا حاجات كتيرة، لكن الجميل إنو في إحساس لسه قادر يرجع بنفس الدفا، وبنفس اللهفة الأولى
وأنا الليلة ما داير منك غير تعرفي إنك جميلة في عيوني، وإنو وجودك عندو مكانة كبيرة في قلبي، وإنو الريدة لمن تكون صادقة ما بتسأل العمر كم، ولا الغياب طال قدر شنو لانها سلسل مودة وريدة مدي العمر
والأهم من كل دا، إنو أنا مؤمن إنو لسه ممكن يكون عندنا بكرة جميل، بكرة نلقانا فيهو مع بعض، من غير خوف، ومن غير ظلم لأي زول فينا، ومن غير ما نكون سبب في زعل أو وجع أقرب الناس لينا
أنا ما داير حلمنا يكون على حساب سعادة زول تاني، ولا داير ريدتنا تكون سبب في كسر خاطر أي إنسان. دايرها تكون بداية فيها الصدق والراحة والاحترام، ونقدر نمشي فيها بخطواتنا الاتنين، وكل زول فينا مطمئن وراضي
يمكن دا حلم، لكن ما مجرد حلم ساكت.. دا إحساس جوانا، وقلوبنا بتقول إنو لسه في بكرة ممكن يجمعنا، لو عرفنا نمشي ليهو بالمحبة والصبر والصدق.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة