يا زول، أنا الليلة ما عندي أي رغبة في ممارسة دور العاقل، ولا عندي استعداد أعمل فيها زول متماسك وبتاع حسابات وموازين. أنا راقد للريدة رز، والموضوع انتهى من بدري! الريدة دي ما كلمة ساكت بتتقال في لحظة شوق، ولا نزوة عاطفية بتجي مع نسمة وتطير مع أول هبة ريح دي مصيبة جميلة، زارعة روحها في الحشا كدا بطريقة فنانة جدا، ومحتلة مساحات ما كان عندي علم أصلاً إنها موجودة جواي
أيوة، أنا بريدها! وبقولها بي كل الحروف، من غير لف ودوران، ومن غير ما أفتش ليها عن تعبير دبلوماسي يخفف وقع الاعتراف. بريدها، ودي ما عندي فيها لجنة تحقيق ولا محتاج أقدم بشأنها مذكرة إيضاحية!
عارف، في ناس بتفتكر الريدة بعد العمر دا نوع من الشقاوة المتأخرة، أو نزوة زول صحى فجأة واكتشف إنو لسه عندو قلب شغال. خليهم يفتكروا البفتكروه. هم ما عارفين إنو القلب دا ممكن يكون عاش سنين طويلة في وضع الاستعداد، لحدي ما يجي زول واحد، بكلمة أو نظرة أو حتى سؤال عابر عن الأحوال، ويعمل فيهو انقلاب عاطفي كامل! أنا ما لاقي في الريدة دي مجرد حبيبة، أنا لاقي فيها حتة من روحي كانت ضايعة، وونس كان ناقصني، وطمأنينة ما بتتباع في الصيدليات، ولا بتجي مع روشتة دكتور, لاقي فيها متعة إنك تصحى الصباح وتلقى في زول جا في بالك قبل القهوة، وإنك تبتسم براااك قدام المراية من غير ما يكون في سبب منطقي للابتسامة ما هي درواشة راياد
والله يا زول، دي حالة عجيبة! تلقى نفسك بتراجع آخر رسالة، وتقرأها مرتين وتلاتة، وتفتش بين الكلمات عن معنى زيادة، وتعمل فيها محلل استراتيجي لتفاصيل صغيرة، بينما الحقيقة إنك بقيت زول واقع في الريدة، وما عندك أي حصانة ضد الابتسامة ولا كلمة «كيفك؟».
والمضحك المبكي إنك تكون عارف كل مخاطر اللعبة، وعارف إنو الدنيا ما بتدي ضمانات، وإنو الأقدار عندها طرقها العجيبة في تعكير صفو الناس، لكن برضو ما قادر تقنع قلبك يعمل فيها زاهد!
يا ستي، أنا ما عندي عقد مع الزمن، ولا مطالب الأقدار تضمن لي نهاية وردية للحكاية بالجد ما عايز أستبق بكرة، ولا أفرض على الأيام شكل معين، ولا أستعجل إجابة قبل أوانها
كل الحاصل إنو أنا بريدك، وبستمتع بوجودك في حياتي، وبحترم خوفك وترددك ومساحتك، وبعرف إنو المحبة ما مفروض تكون حبل يشد زول، ولا امتحان لازم ينجح فيهو عشان يرضي الطرف التاني
لكن برضو خليني أقول ليك== أنا ما ناوي أعمل فيها زول ما فارقة معاهو! فارقة، ونص كمان والشوق عندي ما شغال بنظام التقسيط، ولا القلب عندو زرار إيقاف وتشغيل حسب الظروف لو الأيام فتحت لينا باب، حندخل منها بالرضا والونس والضحكة الحلوة ولو اتأخرت، حنخلي للزمن مساحتو، من غير مطاردة ولا استعجال ولا زعل من نصيب ما اتحدد لسه
المهم، أنا الليلة واقع في الريدة، وراقد ليها رز، وما عندي أي مشروع للتعافي السريع منها ! خلوني كدا، لا تعملوا لي محاضرة عن العقل، ولا تفتحوا معاي ملف العمر والتجارب والحسابات. العمر ذاتو محتاج شوية ونس، والروح مهما شاخت في دفاتر الزمن، بتفضل عندها قدرة عجيبة على الفرح فيا زول، لو سألوك عني قول ليهم= زهير دخل منطقة الريدة، وخلّى العقل في الاستقبال، وقاعد ينتظر الأيام تشوف ليها رأي شنو!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة