عوض كبنقة

Quote: #عوض_كبنكة، الرجل العشبي، عنده مصطلحات تاريخية في وصف سوء الحال، وخاصة بعد ما ينجز ليهو مدوّرة صاموتية من جنب كبري الفتيحاب. وكبنكة دا زول كيّيف حقيقي، يعني ما النوع البلف خمسة سجارات في اليوم زي شفع اليومين ديل 🙃. الزول دا نظامه سجارتيين في اليوم: واحدة الصباح وواحدة بالليل. الصباح بضربها وهو ماشي المنطقة الصناعية، محل الورشة بتاعته. بضرب نصها في البيت، وبقرص الباقي في علبة السجائر، بضربها في الورشة. وهو زول مكنيكي نضيف، وعنده ولد قصّاري شغال معاه، مسميه «الضقل». ما بولّع باقي السجارة إلا يلقى الضقل نضف الورشة وطلّع العِدّة برّة. وعوض كبنكة دا دائمًا بقول ليك: «الضقل زي سير الكتينة، ممكن في لحظة تلقاه ما جاء الورشة وما بوريك، بس تجي تلقى الورشة مقفولة». بعدين بستخدم توصيفات مكنيكية بحتة في وصف أحوال الدنيا. يعني صحبه وقعت فيهو عربية، مشى معاه المستشفى، طلع عنده انزلاق غضروفي. الناس في المنطقة الصناعية سألوه: «أها، محي الدين حصل ليهو شنو؟» قال ليهم: «قطم مسمار نص». مرّة صحبه أجهضت، قال ليهم: «نفضت بستم». صحبه اتوفى في حادث، كلم الناس في القروب بتاع الواتساب، قال ليهم: «البركة فيكم، حسون دا قطم كرنك الصباح، والدفن في مقابر مايو». صحبه جاتو بواسير، الناس بتسأله: «الزول دا مالو ماشي مفتول كدة؟» قال ليهم: «مكنته خلطت موية وزيت». أسي سألته في الواتساب، قولت ليه: «يا كبنكة، عمك برهان دا مالو يا خي؟ شايف ما أدّو فيزا لأمريكا». قال لي: «يا ود القيامة، عمك دا عربية ليجانزا كهربتها جايطة، والدنيا فنقست بيهو». في الأول بقعد يرترت كدة، لكن في الآخر بكسر رقبة في تركيا. 🤣

Quote: ابو برهان لسه ما حلم بالكوابيس بتاعة ولدو الاشتر