شكرا سمية الطيب على الكتابة الممتعة !!!

Quote: Sumaia Altayeb [قبل 9 ساعات] على زمنّا وليوم الليلة كنا وما زلنا يانا البنات والنساء المرصودات للعمل المنزلي والرعائي غير المأجور ، إكمنو في تقسيم الأدوار قالولنا البنات بكانن البيت ما غيرو 😁 لذلك تم ربطنا بالبيت قسراً وحصراً دون الذكور ليخلو لهم وجه الحياة ووساعا وفُرَصا، وده أضعف علاقتنا ببقية شؤون الحياة وحدَّد نطاق إكتسابنا للمهارات المختلفة ووسم تواجدنا في الفضاء العام بالخوف والتردد وخلق من أغلبنا كائنات إعتمادية ومحدودة القدرات . بطبيعة الحال رضينا بي قسمتنا وما قلنا بغم وإتماهينا مع الدور الفهّمونا إننا اتخلقنا عشانو ، لا وكمان عملنا معاهو علاقة لطيفة والله جد 🥹 أنا مسكتَ شَغَلتي بدري من عمر الروضة حسب ماني كبيرة البنات القاعدات في البيت ، فكبيرتنا ما كانت مستقرة معانا وبقيت أنا الكبيرة حُكماً ، وكنت بنية فالحة خلاس وبحب الشّكر والإطراء على فلاحتي 👧🏾 و كوني كنت الشافعة البتنضِّف وبتضاير دي كانت حاجة أكسبتني كغيري من البنات حتة التعلق العاطفي بالبيوت .. فالبيت لو كنتوا مكانّا هو الحتة الإنتوا بتتعهدوها بالنضافة والتنظيم والرعاية، علاقتكم بيهو أكيد بتكون مختلفة .. علاقة وثيقة ، إنتماء وولف وإهتمام .. (تزعِّف) سقفو وحيطانو، تغسِّل شبابيكو وأبوابو، تنفِّض وتلمِّع عفشو ، تقش واطاتو وتمسح بلاطو ،تهوِّيهو وتبخِّرو .. ولأني كنت شافعة متأمِّلة و( لاحاااظة) خلي بالكم ، وما بتفوتني شاردة ولا واردة ، أرصُد وأخزِّن في ذاكرتي .. لذلك كانت علاقتي بالبيت علاقة حميمة ولصيقة .. أصوات المكان، روائحو ظلالو ،كانت بتترك فيني أثر لا ينمحى .. الأصوات البسمعا وأنا في بطن البيت أغاني الراديو زمان ، مقطوعات بشير عباس في التلفزيون 🎼 صوت أبوي ،صوت أمي ودندناتا وهي بتطبخ ، ريحة المطبخ وما حوى ، ريحة البخور ، ريحة الكولونيا والعطور بتاعة أبوي وريحة هدومو لما أغسلم وأكويهم وأرتبم في دولابو .. ريحة الخُمرة وعطور أمي و زائرات البيت فوق ريحة دخانن وحنّتن . وطقوس النضافة المثيرة للحماس.. لما تكون الأرضية تراب كنا بنرش أول عشان لما نكنس ما تقوم (علالة) .. ونجي نكنِّس كشتك كشتك وننفِّض العفش و نفرش الملايات .. ويوم تقوم الكتّاحة ولا المطرة بنطوي المراتب واللحافات ونغطيهم بالملاية ونقلب الكراسي ونرفعم فوق الطاولات ونربط شعرنا بالايشاربات وننتظر الأمور تهدأ عشان ننفِّض وننضف ونزيل آثار العدوان 😅 ولا متعة كنس الحيشان بعد ما نرشَّهن ونكوِّم الوسخ ونخمو بعد (نَكَشْوِلو) من التراب 😄 ونقول كدي نغسل العدة ونتمِّرا ونرصها في الرفوف . الغسيل والمكوة على خلفية غناء الروادي والمسجلات وونسات الأخوات والصاحبات 🥰 الطشت البتختَّ فوق اللستك وجمبو جردل الموية النضيفة وجواهو الكوز .. وحلة الصابون تبقبق فوق نار المنقد، ياتن كمان ضربنا لوح صابون الغسيل لما يعمل رغوة وصوت الأمهات يلاحقنا : أدْعَكَن وأقُرْضَن الهدوم وأدَّنها (فوم) تاني ومصمصنهن وظهِّرنهن😄 (وشر هدوم في حبالن 🎵) ويا ويلِك لو الحبل اتقطع ، دي بقى لحظات الكرب العظيم 🥹 وكنا (بنبغَر) من بعض، أي واحدة عايزة تسابق التانيات في الفلاحة وفي النضافة وحسن الترتيب ، وكنا نصبو بشوق للوكت البنكبر فيهو عشان نبقى ستات بيوت زي ما بيقول الكتاب 👌🏽 عرفتوا ليه بتلقونا دايما عندنا تواطؤ نفسي مع الدور ده حتى لو نلنا الشهادات وتأهّلنا لسوق العمل . بس كمان علاقتنا بقائمة الواجبات المنزلية الكتيرة ومسيخة دي ما كانت كلها بالرومانسية والمحاسيس السمحة دي 😄 إذ إنو غير الإجهاد والاستنزاف البنختبرو فالتقصير في الواجبات دي كان سبب تعنيف بدني ونفسي سيئ الأثر على كتير من البنات من الوالدين ومن يقوم مقامهم في البيوت البتسود فيها القسوة والتعنيف .. يا رفلة ويا خنيتة ويا لكيعة ما تديك الدرب، والمقارنة بينك وبين البنات الفالحات ، غير الشلاليت وأمات دلدوم 🥹 ولا الحرمان من المرقة والمرح اذا كسلنا او اتمردنا على واجب القيام بيها 💔 ولما نتزوج ، التقصير في الواجبات دي عقوبتو شناف النسابة والطلاق البائن بينونة كبرى ، وأصلا نحن بنكون جاهزين للمصير ده لأننا ياما سمعنا عبارة انتي يا يمة برجعوك بخبيزك 🥴