في "زوم" الحزب الشيوعي، لقينا دكتور صدقي كبلو؛ الرجل الجمع بين هيبة الجزارين الأمدرمانيين (اللي عينهم ما بتخطئ موضع الذبيحة) وبرودة الدكتوراه البريطانية اللندنية كنا منتظرين من ابن أم درمان إنه "يفتت" لينا الواقع السياسي بساطور، ومن حامل الدكتوراه إنه يحلل لينا الدولة المنهارة بـ"مشرط" أكاديمي. لكن دكتورنا قرر يخلي الساطور والقلم على جنب، ويطلع ليه "درقة لغوية" غريبة ويرد على سؤالنا الاستراتيجي ببرود إنجليزي كده: «Off Point»! أوف بوينت يا دكتور؟ ولا زوغان عن النقطة؟ يا دكتور صدقي، وأنت ابن الجزارين اللي بيعرفوا إن الذبيحة ما تتقبل إلا كاملة، كيف بقوا أسئلتنا عن صلاحية أدوات الحزب "خارج النقطة"؟ هل النقطة عندكم بس ما يوافق هوى اللجنة المركزية؟ ولا الجنسية البريطانية علمتكم إن السياسة فن "التزحلق" على الجليد بدل الغوص في وحل السودان؟ الدكتوراه في الجمود والتخصص في الكتم وعجيب أمر الحزب دا؛ يرسل لينا أكاديمي "دكتور" عشان يقنعنا بالراهن، ولمن نسأله عن "الأدوات" يتحول فجأة لـ"حارس بوابة" (Bouncer) يا دكتور، الدكتوراه تمنح لمن يضيف جديد، لا لمن يستخدمها لقمع الأسئلة. هل ماركسيتكم ضاقت لدرجة إنو سؤال عن "تفكك الدولة" صار أوف بوينت؟ إذا الحرب وتفكيك السودان خارج الموضوع، يبقى شنو الموضوع؟ سعر البصل في أسواق لندن؟ ريحة العراقة الأمدرمانية وضجيج الخوف أهلنا في أم درمان وبقية الجزارين معروفين بالروشة والصراحة. لكن دكتورنا في الزوم كان كأنه مستلب ثقافياً؛ لابس جبّة الحزب فوق البدلة البريطانية، ويهرب من سؤال عن "ود بلد" بكلمتين خواجيات يا رفيق، الجماهير اللي بتتكلموا باسمها دي هي البوينت الحقيقي. ولما تقول سؤالها "خارج"، بتعلن رسمياً أن الحزب صار "Off Point" عن الواقع وعن التاريخ وعن وجع الناس. الذبيحة فطيس والسكين تلمت
كشف الزوم أن أزمة القيادة أعمق من مجرد خلاف سياسي. إنها أزمة نخبوية: دكاترة عندهم ألقاب وما عندهم إجابات. يا دكتور صدقي، السكرتارية ما تعني السرية، والدكتوراه ما تعني الوصاية. سؤالي كان في قلب العظم، لكن سكينك الأكاديمية تلمت ولم تعد تقوى إلا على قطع الوعود الفارغة في غرف الزوم الباردة.
الموضوع هو السودان يا دكتور… فهل السودان بالنسبة لكم "أوف بوينت"؟
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير ابو الزهراء
فيس بوك
تويتر
انستقرام
يوتيوب
بنتيريست