|
|
|
 Re: خالد سلك يلقن بلبوس درس لا ينسى (Re: اسماعيل عبد الله محمد)
|
غايتو ود عمي خالد سلك ومعاه الجلابة في ق ح ت موقفهم اللين من مرتكب التصفيات العرقية دقلو
ح يدخلهم في مشاكل زي دي كتيرة
ما قادر أستوعب موقفهم دا إلا يكونوا كانوا مشاركين معاه في انقلاب 15 أبريل.
ترى موقف ناس ق ح ت من الدارفوريين مفهوم،
لكن جلابي قحاتي وتكون مع مجرم حرب
دي أبت تقع لي خالص
يعني حتى موقف الجلابة غير القحاتة الواقفين مع المجرم زي ناس عبد الغفار الشريف مفهوم،
ديل رجال عصابات ودا شغلهم
لكن خالد سلك ود عمي الثوري النزيه يعمل كدا؟!
دي إلا يجي مولانا حافظ يوقعها لي
مقدراتي الذهنية أقلّ من أستوعبها لوحدي
| |
 
|
|
|
|
|
|
|
|
Re: خالد سلك يلقن بلبوس درس لا ينسى (Re: أبوبكر عباس)
|
Quote: غايتو ود عمي خالد سلك ومعاه الجلابة في ق ح ت موقفهم اللين من مرتكب التصفيات العرقية دقلو
ح يدخلهم في مشاكل زي دي كتيرة
ما قادر أستوعب موقفهم دا إلا يكونوا كانوا مشاركين معاه في انقلاب 15 أبريل.
ترى موقف ناس ق ح ت من الدارفوريين مفهوم،
لكن جلابي قحاتي وتكون مع مجرم حرب
دي أبت تقع لي خالص
يعني حتى موقف الجلابة غير القحاتة الواقفين مع المجرم زي ناس عبد الغفار الشريف مفهوم،
ديل رجال عصابات ودا شغلهم
لكن خالد سلك ود عمي الثوري النزيه يعمل كدا؟!
دي إلا يجي مولانا حافظ يوقعها لي
مقدراتي الذهنية أقلّ من أستوعبها لوحدي |
يا ابو بكر، زي عينة البلبوسي الطلع في الفيديو ديل كتار، رمتالي قدم لجوء على أساس الحكومة عاملة ليهو اضطهاد وانو ناشط وووووو ولما يزبط الورق يسبح بحمد نفس الحكومة التي ادعى فراره منها!! والفيديو ده تمنه حق التمباك وعشا واحتمال فوقها ٥٠ ولا ١٠٠ يورو ولا استرليني من السفارة الماعندها شغلة! الخواجات ديل ناس طيبين بالمناسبة لو الترحيل اشتغل امثال الزول ده حيقعدوا في علبهم!!
| |
|
|
|
|
|
|
|
|
|
Re: خالد سلك يلقن بلبوس درس لا ينسى (Re: Hafiz Bashir)
|
إنتو الباشمهندس دا قادي رياضيات ول شنو؟
قال ليهو "أنا أنضف من مليون زيك"
بما أن النضافة هي انعدام الوسخ:
وبما أن الاوساخ تُضاف إلى بعضها البعض.
فذلك يعني أن مجموع الوسخ أكبر من الجزء،
وبالتالي فمن المؤكد أن وسخ مليون شخص أكبر من وسخ الشخص الواحد.
قولة "أنا انضف من مليون زيك" لا تعني أن القائل انضف من المُخَاطَب،
ولكنها تعني أنه لو تم تقسيم وسخ القائل إلى مليون جزء،
فإن الجزء الواحد من المليون جزء من وسخ القائل سيكون اقل من وسخ المُخَاطَب.
| |
|
|
|
|
|
|
|
|
|
Re: خالد سلك يلقن بلبوس درس لا ينسى (Re: Hafiz Bashir)
|
مستنيرنا
| Quote: ما قادر أستوعب موقفهم دا إلا يكونوا كانوا مشاركين معاه في انقلاب 15 أبريل. |
آخر ما توصلت ليهو إنو الناس ديل معمول ليهم عمل عند فكي جاضم.
الشغلانة البعملوا فيه ناس قحت/تقدم،صمود دي ما شغلانة خوف من الفضيحة والإدانة بس.
دي شغلانة ما يعملها زول إلا إذا كان معمول ليهو عمل.
| |
|
|
|
|
|
|
|
|
|
Re: خالد سلك يلقن بلبوس درس لا ينسى (Re: Hafiz Bashir)
|
زمااااان في كتاب المطالعة كان في حاجة كدا:
"مسعود ذبح الخروف،
الخروف ذبح مسعود"
كلام فارغ وما منطقي ولا واقعي،
كيفن يعني الخروف ذبح مسعود؟؟
افتكر يتم استبدالها ب:
"البلبوسي نبَّذ خالد سلك،
خالد سلك نبَّذ البلبوسي"
من المهم جداً أن تعكس كتب المطالعة في مراحل دراسية مبكرة تاريخ نضالنا السياسي،
ومن المهم أن تعكس مناهجنا الدراسية المسيرة النضالية لقادتنا في تحقيق التحول المدني الديمقراطي.
😝
| |
|
|
|
|
|
|
|
|
|
Re: خالد سلك يلقن بلبوس درس لا ينسى (Re: قصي محمد عبدالله)
|
- إنت وسخان
-- أنا أنظف من مليون زيك
- كلب
-- كلب إنت دا
خالد سلك طارح نفسه شحصية عامة تتحدث وتمثل المدنيين،
المواطن السوداني في الفيديو نبذ خالد سلك ومصدر خلافه مع خالد سلك هو قضية عامة
والمواطن السوداني في الفيديو نبذ خالد سلك بناءً على معرفته بافعال خالد سلك كشخصية عامة.
أما نبذ خالد سلك المواطن السوداني فما هو إلا انفعال بدوافع شخصية وذاتية فقط وبدون أدنى معرفة به.
| |
|
|
|
|
|
|
|
|
|
Re: خالد سلك يلقن بلبوس درس لا ينسى (Re: Hafiz Bashir)
|
| Quote: خالد سلك طارح نفسه شحصية عامة تتحدث وتمثل المدنيين، |
يعني ده مبرر لاستخدام الفاظ مثل وسخان وكلب مع شخصية عامة؟ بالمناسبة الوسخان دي ماركة مسجلة لزول كده داير يبقى رئيس بالرجالة وهو ماقادر يرجع للقصر الجمهوري ولا القيادة العامة وشغال ترانزيت من والى بورتسودان 😆
| |
|
|
|
|
|
|
|
|
|
Re: خالد سلك يلقن بلبوس درس لا ينسى (Re: Mohamed Adam)
|
| Quote: يعني ده مبرر لاستخدام الفاظ مثل وسخان وكلب مع شخصية عامة؟ |
أبداً ما مبرر وعشان كدا أنا سميتو نبذ.
وواضح إنو أنا نقلت الكلام كم مرة عشان ساخر من لغة الحوار المتدنية من الطرفين.
الزول دا من حقو يكون عندو رأي في خالد سلك وفي قحت ومن حقو التعبير عن رأيه.
ولكن اختار الفاظ متدنية وفيها عنف غير مبرر وخالد سلك ما عندو شي احسن مما عند المواطن اللافي في الشارع.
| Quote: بالمناسبة الوسخان دي ماركة مسجلة لزول كده داير يبقى رئيس بالرجالة وهو ماقادر يرجع للقصر الجمهوري ولا القيادة العامة وشغال ترانزيت من والى بورتسودان 😆 |
خالد سلك والبرهان الاتنين شخصيات عامة.
فشنو البخليك تستنكر استخدام الفاظ مثل وسخان وكلب مع شخصية عامة كحالد سلك،
وتقوم إنت تستخدم نفس الالفاظ لشخصية عامة مثل البرهان؟
فهل يا طارق إنت معترض على حق الناس في ابداء الرأي في موقف خالد سلك وافعاله السياسية مطلقاً؟
ولَّ إنت معترض على استخدام لفط "وسخان" كتعبير عن وجهة النظر؟
| |
|
|
|
|
|
|
|
|
|
Re: خالد سلك يلقن بلبوس درس لا ينسى (Re: Hafiz Bashir)
|
Quote: خالد سلك والبرهان الاتنين شخصيات عامة.
فشنو البخليك تستنكر استخدام الفاظ مثل وسخان وكلب مع شخصية عامة كحالد سلك،
وتقوم إنت تستخدم نفس الالفاظ لشخصية عامة مثل البرهان؟
فهل يا طارق إنت معترض على حق الناس في ابداء الرأي في موقف خالد سلك وافعاله السياسية مطلقاً؟
ولَّ إنت معترض على استخدام لفط "وسخان" كتعبير عن وجهة النظر؟ |
يا حافظ جادي تقارن خالد سلك بالبرهان؟ 😂 سلك زول تختلف او تتفق معه سياسيا ده شأن عام ما مشكلة لكن ماثبت عليه قتل ولا سرقة ولا فساد ولا عندو يد في الحرب وبيدفع ثمنها مثل أي سوداني بالمختصر ما مجرم، لكن البرهان لو قعدت لبكرة ما حخلص من مصائبه الكارثية على البلد من فض الاعتصام وقمع مسيرات الشباب السلمية و انقلاب اكتوبر وعرقلته للمسار السياسي وتخريب الاقتصاد عن طريق نهب فائض بنك السودان وجعل شركات العسكر فوق نظام الدولة بالقوة وحماية تهريب موارد السودان للامارات ومصر وغيرها وتمكين الجنجويد وفصل تبعيتهم عن الجيش وفوقها مكافأتهم باسناد حراسة المواقع السيادية لهم في العاصمة وكمان زيادة رواتبهم وتحميلها لوزارة المالية، يعني نهب مايدخل للدولة والرواتب تدفعها الدولة! في قلة ادب اكتر من دي؟ وبرضو ما جبنا سيرة السمسرة على موانئ واصول البلد الاستراتيجية لكل الدنيا من اتراك وروس وحتى الصهاينة والامارات العامل بنبزها دي مقابل الحكم! ولسه كمان ما اتحاسب على هروب الجيش من الجنجويد ومواصلة فيلم المليشيات، نكمل ولا خلاص؟الزي برهان ده في بلد محترم كان زمان مشى الدروة مش يتفصح كمان! عرفت وسخان دي بسيطة عليهو كيف؟
| |
|
|
|
|
|
|
|
|
|
Re: خالد سلك يلقن بلبوس درس لا ينسى (Re: طارق عبد الله)
|
| Quote: يا حافظ جادي تقارن خالد سلك بالبرهان؟ 😂 |
الموضوع ما عندو علاقة بمقارنتي ومقارنتك للبرهان بخالد سلك,
لا أنا ولا إنت عندنا الحق نحدد للناس يقارنوا منو بمنو او نمنعهم من المقارنة.
المسألة هنا عن مبدأين:
1. الإعتراف بحق الآخرين في تكوين آرائهم السياسية بناءً على مصالحهم المشروعة.
2. أدب الاختلاف وحدوده وضبط لغة الحوار وتجنب العنف اللفظي والسباب.
| |
|
|
|
|
|
|
|
|
|
Re: خالد سلك يلقن بلبوس درس لا ينسى (Re: Hafiz Bashir)
|
| Quote: لا أنا ولا إنت عندنا الحق نحدد للناس يقارنوا منو بمنو او نمنعهم من المقارنة. |
المنطق ده مقبول لما يكون الطرفان متساويين في الفعل والمسؤولية، خالد سلك شخصية عامة ماكان في موقع مسؤولية يسمح له بفعل ضرر كارثي على البلد عكس برهان. يعني مثال واحد برهان اصدر بكامل قواه العقلية وإرادته المرسوم الدستوري رقم ٣٤ بتاريخ ٢٠١٩/٠٧/٣٠ الذي ينص على الغاء تبعية الدعم السريع للقوات المسلحة، في رأيك الكلام ده مابستحق محاكمة خاصة وانه ساهم في تمكين الجنجويد؟ تقول لي سلك قال لواحد يا كلب!!
| |
|
|
|
|
|
|
|
|
|
Re: خالد سلك يلقن بلبوس درس لا ينسى (Re: طارق عبد الله)
|
| Quote: المنطق ده مقبول لما يكون الطرفان متساويين في الفعل والمسؤولية |
يعني إنت جاك وحي قال ليك خالد سلك احسن من البرهان في الافعال والمسؤلية؟
أرأيت هذا المنزل أمنزلا أنزلكه الله ، ليس لنا أن نتقدمه ، ولا نتأخر عنه ، أم هو الرأي يا طارق؟
إنت يا طارق ما عندك حق وصاية على الناس
ولا إنت يا طارق البتحدد للناس كيف يقيسوا ويقيموا اضرارهم من افعال خالد سلك وافعال البرهان.
ياخي إنت أخير منك الكيزان، على الأقل الكيزان عشان يبرروا وصايتهم فكوا ليهم وهمة بتاعة ربط قيم الارض بالسماء.
إنت ياخي مستخسر في الناس وهمة تبرر بيها وصايتك علىهم وداير تفرضها عليهم قنقر كي 💪
| |
|
|
|
|
|
|
|
|
|
Re: خالد سلك يلقن بلبوس درس لا ينسى (Re: Hafiz Bashir)
|
صاح كلامك يا مولانا، ناس الغرب ديل عملوا لجلابة قحت عمل من فكي كارب.
من زمان أهلي بمشوا نيالا للتجارة وبعملوا ليهم عمل ويقعدوا ويتزوجوا وما قاعدين يرجعوا لينا،
والله إلا هسّ بعد الحرب دي أولادهم جونا راجعين،
أول حاجة وديناهم لشيخ الخواض طلع منهم العمل وبعد داك دخلناهم بيوت ابواتهم الكانت مقفولة، لكن أبينا نديهم حقهم في الأرض الزراعية.
| |
|
|
|
|
|
|
|
|
|
Re: خالد سلك يلقن بلبوس درس لا ينسى (Re: محمود الدقم)
|
| Quote: يعني الان لو كل من خالد سلك والبرهان وقفوا امام الجنائية الدولية هل سلك حياخد مليون مؤبد ام البرهان؟؟؟ |
الواحد يقرررررب يقول ما فيش فايدة
لكن يتذكر عبدالخالق محجوب سألوهو: ماذا قدمت؟، فأجاب ” الوعي بقدر ما استطعت”.
وترانا ماشين في السكة نمد وبنحاول قدر استطاعتنا.
إنت يا الدقم قبل ما تسأل سؤالك دا، هل سألت نفسك عن دائرة الإختصاص الموضوعي (نوع الجرائم) للمحكمة الجنائية الدولية؟
يعني بمعنى تاني هل سألت نفسك عن ما إذا كانت كل الجرائم داخلة في دائرة إختصاص المحكمة الجنائية الدولية؟
لو جاوبت السؤال دا كان عرفت إنو المحكمة الجنائية الدولية لا تصلح كمقياس لقياس ومقارنة اجرام سلك والبرهان.
وعموماً نحن هنا بنتكلم عن محاسبات سياسية لأنو المحاسبة القانونية دي شعراً ما عندكم ليهو رقبة يا الدقم ومعاك طارق،
وعن المحاسبة السياسية دي في محكمة عندها دائرة اختصاص موضوعية اوسع من الجنائية الدولية وهي الشعب السوداني وهو قادر على محاسبة كل المجرمين بطريقته التي يختارها.
وبعدين يالدقم هل الجنائية الدولية قدمت اتهام لسلك او البرهان، عشان ذاتو نقدر نقول تدين منو او ما تدين منو؟
اوعى اتهام االجنائية الدولية للبرهان يكون ياهو المرسوم الدستوري رقم ٣٤ بتاريخ القالوا طارق دا؟🤣🤣🤣
| |
|
|
|
|
|
|
|
|
 Re: خالد سلك يلقن بلبوس درس لا ينسى (Re: Hafiz Bashir)
|
كلامك دا كلوا يا مولانا حافظ "محكمة الاختصاص الخ " انا عارفوا من قبل العام ١٩٩٨..
لكن قلت طالما مولانا اخيرا بقي يفرش و يبيع تبش وطماطم، وبيض،، مااالوا نجلس نبيع معاه من باب انصر اخاك.
نرجع لموضوعك الجديد، ماهية نوعية التهم السياسية الموجهة لسلك؟ علي افتراض انو نحنا
حنفتح المحاسباات السياسية؟ ما هي الجهة؟ صحيفة البلاغات؟؟؟
بخصوص محكمة الشعب دا كلام عاطفي مكانه الطبيعي جنبات ستات الشاي، حاليا ماهي البنية
السياسية والقانونية والاجتماعية والدينية التي من المفترض تتوافق عليها هذه الشعوب السودانية
المختطفة من طرف التطرف الديني التي؟ كي تبدأ في حفريات بناء دولة المواطنة وتقبل الاخر، قبل ملاحقة سلك وغيره؟؟
مع تقديرنا للوعي الكبير اووي اووي البتقدموا 🤣🤣
| |
|
|
|
|
|
|
|
|
Re: خالد سلك يلقن بلبوس درس لا ينسى (Re: محمود الدقم)
|
- إنت وسخان
-- أنا أنظف من مليون زيك
- كلب
-- كلب إنت دا
| Quote: بخصوص محكمة الشعب دا كلام عاطفي مكانه الطبيعي جنبات ستات الشاي |
هسه عليك الله يا الدقم الشكلة المفتوح من أجلها البوست دا تلقاها وين غير جنبات ستات الشاي؟
| |
|
|
|
|
|
|
احدث المقالات بسودانيزاونلاين اليوم
| |
اسماعيل عبد الله محمد
أبوبكر عباس
محمود الدقم
Hafiz Bashir
قصي محمد عبدالله
Mohamed Adam
فيس بوك
تويتر
انستقرام
يوتيوب
بنتيريست