ديل العساكر يا بلد ريحة البنادق والرصاص والذِّلَّة لِلًّابِس مَدَنْ ضهر المدينة الإِنْجَلَد عايزين يحاكمو الناس صِفِر ويحكمو الدار بالمسامير والشلاليت الشُّتُر ويدوسو شرف الإعترض بي كلمة جات لسعادتو في الزمن المرض الفرصة للزول السَّدَنْ سَدَّ الطريق وقَطَع خيوط النيت صباح والكهربا وخَتَّ الأوامر واضحة للجندي الغشيم لازم نربي الما رِبَى ويبلع لسانو الإعترض ونخنق حنانو الماشي جنب الحيط عَرَض ونمنع كمان الإقتراب ونْسَوِّي قانون للغياب ومرسوم عريض خاص بالسهر والإنفلات وليالي البهجة والشوق والوتر وكل أنواع الإشارات والكلام ما نلقى نفرين ف اعتصام والغنا العايزنو بالسر كمان لازم يكون وأصوات الحلوق المُرَّة لابُدَّ مِن إٍنَّها تخاف وممنوع تَصَوِّر أو تخفِّف يا مواطن مِنْ جِراح أو تغازل صفحة الليل في الصباح في لافتة جافة ومُقْرِفَة شايف قبورها من بعيد مكتوبة بالخط الدَّمِيم تفويض مباشر من إِله أمشي ساكِت في الطريق وأبقى اشتري من سُكاتْ الساعة سِتَّة الناس تنوم والساعة نايمة إِيَّاك أنْ تفرفر من كوابيسك تقوم وبنو السجون هدمو المدارس بالخواء كَسَرو الخواطر والنفوس وبقى التجسس والتحسس مهنة للزول البعوس عَرِّس وَبَشِّر للعروس وأوعك تَجَادِع في النظام يا أُمَّة وَعْيِك وين يكوس ! عبدالماجد موسى/لندن
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبدالماجد موسى
فيس بوك
تويتر
انستقرام
يوتيوب
بنتيريست