وبقيت وحيد لَفْتَةْ غريب شايل وجع باباً مُسَوِّسْ في الشمس الأَرْضَه ماكلاو من سنين إيديو عِمَت ما بعرف الداخل منو لكنو عارف لما آخر مَرَّة مرقت أم حسين الباب وقع وقعة ندم ما فيها رحمة ولا أنين شوف يا بلد أنا كنت بسقي في شتلتين جنب الطوابير المخدرة في العِصير وباب الروضة كان سارح بعيد يتمنى زول يدخل عليو يبرد حشاو وفجأة لا ضَوْ لا سلام دخلو العساكر إنتقام وولعو النار في التراب شالو المراكب كلها وسدو أبواب الصباح وحتى راكوبة الخريف ما خلو فيها سطر نضيف قالو عندنا ليك وَجْبَةْ قِراية وسَلَطَةْ ثقافة وعصير خبرة ساقط في الحساب وأكياس مستباحة وسيف هموم نفس الدلاليك الكلاب لحسو الصًّحانه وقَشو ايديم في الملاية وجَرُّو إحسان من أضانا وكسَّرو البيض في السرير هوَ دا الضلام الكان بيجيك نص النهار يشتم وينهر في ولاد حلتنا زي يومنا البكابس للإيجار زاحِف على قلبي الأسير صابر جبل موجوع ضمير انا والسحاب الليلة جانا خبر يتيم ود جارنا مدفون في الخلا وسؤال كبير مكتوب على صدرو الجبين الكاتل يموت إن شاءالله بالغم والبلا كل الإجابات الأكيدة الجاتنا جافة مؤجلة حالك مُنَقَّد يا وطن نلقاها من وين يا حروف وأَلَمْنا فات لِلْحَد أَلَم
08-28-2025, 09:18 AM
عبدالماجد موسى عبدالماجد موسى
تاريخ التسجيل: 10-10-2005
مجموع المشاركات: 521
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبدالماجد موسى
فيس بوك
تويتر
انستقرام
يوتيوب
بنتيريست