قصة طريفه يرويها عبدالماجد شاور مهداة للسيد رئيس الوزراء السيد الدكتور كامل ادريس
قصة اهديها للدكتور كامل ادريس ٠٠٠قبل سنوات حكى احد ضباط الشرطة بعض تجاربه وذكرياته قال وهو ضابط صغير تم نقله لغرب السودان ٠٠كان هو الكاكى والمظهر الرسمى للحكومة٠٠قال نصحوني ووجهونى بان اخبر السيد الناظر بكل اجراءتى وخطواتى( وما اخالفوا٠)٠جاءه بلاغ بسرقة حديد الدونكى٠٠الدونكى محطة المياه هناك يعنى الحياة٠٠ قال رفعت عساكرى وشلت طبنجتى ركبت الكومر واتحركت متجها لموقع البلاغ ٠٠تنفيذا للتوجيهات اتجه لبيت الناظر ليخطره (كاجراء شكلى) ٠٠ \رحب به الناظر ببشاشة ومعها اتفضل٠٠اتفضل٠٠رد الضابط: شكرا السيد الناظر البلاغ مهم وانا مستعجل٠٠٠الناظر :ما فى عوجة يا سعادتك بتلحق اتفضل٠٠٠\ اتفضل٠٠٠قال وانا شاب صغير وضابط امتعضت وتضايقت فى دواخلى انا محصل جريمة سرقة والناظر الما بخالفوهو دا متمهل واتفضل اتفضل ٠٠٠ قال دخلت بيت الضيافة ومعاى عساكرى (مكرها ) متضايقا ٠٠٠الشربات٠٠٠بعد شوية المرارة ٠٠يعنى الناظر كعادته٠٠ (ضبح)٠٠قال استسلمت للأمر الواقع ٠٠٠ بعد شوية مقدمة للفطور جات الشيية وانتظرنا الفطور الما خمج (بي مهلة ) وقال انا بقيت فى يد الناظر تماما وفى اصبر اصبر مافى عوجة بتلحق ٠٠ الفطور والونسة والشاي ٠٠الناظر قال لى خلاص الحرامى اتقبض؟؟كيف ؟كيف ؟ قال رسلت الغفير حقى لى الانادي (محل صناعة وبيع المريسة والعرقى) وعرفنا الزول النزل البيرق امس منو ؟؟يعنى الذى دفع حساب كل رواد الأنداية ٠٠دا ما شغل بقروهو فى كلية الشرطة يا دكتور كامل٠٠٠دا شغل زول متغلغل فى المجتمع شارب ثقافة المجتمع ٠٠البلد البلد دى بتختلف ٠٠والله والله وانا الان فى المعاش لا انس كلام استاذنا فى الجامعة قال لينا يا ابنائى أى كلام اقولو ليكم فى الاقتصاد فى المحاضرة هنا أو تقروهو فى الكتب دا كوم واقتصاد السودان دا كوم٠٠٠ حكم السودان دا وادارتو مع العلم داير خبرات متراكمة زى خبرات الناظر بابو نمر عليه الرحمة يعطل شغل الشرطة ويقبض الحرامى لأنو المجتمع بجهجه الشرطة وبدس الحرامى نحن هنا حتى فى امراضنا٠٠ فى الطب٠٠ عندنا طب المناطق الحارة ٠٠امراضنا غير أمراض ناس هولندا وسويسرا عبدالماجد شاور
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير ابو الزهراء
فيس بوك
تويتر
انستقرام
يوتيوب
بنتيريست