وين اكدت يا هدي😊؟ انا قلت ان المجلس موالي او كان بطبل للبرهان وهذا يعني انو لديه معلومات اكيدة اكتر من غيرو ودا في حد ذاتو بؤكد مصداقية الخبر اكثر من انو ينفيه لكن اهو قاعدين يا خبراليوم بقروش بكرة ببلاش انا شخصيا من قلبي بتمني يكون مفبرك لانو لو صحيح سيكون الامر كارثي بكل المقايسس
05-25-2025, 07:13 PM
هدى ميرغنى هدى ميرغنى
تاريخ التسجيل: 10-27-2021
مجموع المشاركات: 6193
معليش محمود ، فهمتك خطأ ، أفتكرت موالين يعنى حيصمتوا على عمائل البرهان ، او يمشوا ليه بالدرب بدل بيانات #حقيقة أى دولة كان مجاورة كان بعيدة كان لسه ما نزعت جزء من آرض السودان ومياهه قاعدة تحاول… #لكن أراضى نهر النيل والدبة زمان الأمارات شالوا ما شالوا منها ، يعنى المصريين بيشوفوا مناطق أخرى ، ما بيدخلوا فى منافسة مع أمارات "الخير"😀
05-25-2025, 08:03 PM
محمود الدقم محمود الدقم
تاريخ التسجيل: 03-19-2004
مجموع المشاركات: 12875
الاماراتين ما شالو شيء كل مافي الامر جاءو بالدرب العديل وقالو لحكومة البشير عايزين نعمل مشروع زراعي اسمه مشروع امطار دا حقنا من المشروع ودا حقكم من المشروع اه موافقين؟ بشة طوالي وافق وتم التوقيع وحتي كتابة هذه الاسطر مشروع امطار الزراعي الاماراتي الذي يعد واحد من اضخم المشاريع الزراعية المروية في افريقيا شغال بحسب علمي علي قدم وساق بعدها جاء السعوديين وطرحوا مشروعين واحد لزراعة القمح اشتغل كويس لكن بعد داك حصلت فيه مشاكل ادارية وبيروقراطية وتقريبا اتعطل، ومشروع لزراعة البرسيم وناس بشة اختلفوا مع بعضهم البعض في العمولات الشخصية والمشروع السعوديين مشو بيهو الارجنتين وشغال زي الفل لكن المصريين في ظل بناء السدود في تنزانيا ورواندا والكنغو واثيوبيا قبل واثناء وبعد اتفاقية عنتبي الاخيرة المعترف بها من الامم المتحدة اتضح عندهم سدود تانية شغالين فيها غير سد النهضة اصبحت القاهرة في رعب عظيم وعايزة اراضي زراعية جديدة واراضي سكنية وانسب مكان هو كل مناطق نهر النيل بالسودان عشان كدا هم مبسوطين من الحرب دي اوووووي اوووي. وتاني بقول للدكتور ياسر الشريف وبذكرو في نقاش سابق لو انت شمالي-الخطاب عام- وعندك اراضي بيع وسافر الكاريبيان او اوروبا والمصريين كان ما سففونا التراب في الشمالية يبقي انا ما بفهم في السياسة ولا في البرسيم زاتو
05-25-2025, 08:16 PM
هدى ميرغنى هدى ميرغنى
تاريخ التسجيل: 10-27-2021
مجموع المشاركات: 6193
Quote: فى الأول وين كتبت ليك أكدت؟ وإنت صحفى صحى ما بتفهم فى البرسيم 😀لكن أكيد بتفهم الفرق بين أكدت وبين كتابتى التى - أوضحت ومعاها احتمال!
*الدول كان الآمارات كان السعودية ومشاريعها الناجحة فى السودان لإطعام الحيوان ، تؤكد كلامى إنه الدول تتسابق على أراضى ومياه السودان
قصدي كلمة اوضحت وانا فهمتها اكدت لك العتبي علي كل حال، اما تسابق الامارات والسعودية وغيرها من الدول للسودان فهو في حد ذاته تسابق حميد و ليس مشكلة لكن شريطة ان يصب في مصلحة الشعب واقتصاد البلد والمواطن، الان دبي يتسابق اليها رجال الاعمال البيريطانيين بعد قوانيين حزب العمال الاخيرة لكن التسابق دائما يصب في مصلحة الامارات عكس جماعة 56 ما لقينا منهم الا الفقر والبؤس.
05-26-2025, 01:38 PM
Yasir Elsharif Yasir Elsharif
تاريخ التسجيل: 12-09-2002
مجموع المشاركات: 51127
Quote: وتاني بقول للدكتور ياسر الشريف وبذكرو في نقاش سابق لو انت شمالي-الخطاب عام- وعندك اراضي بيع وسافر الكاريبيان او اوروبا والمصريين كان ما سففونا التراب في الشمالية يبقي انا ما بفهم في السياسة ولا في البرسيم زاتو
بالله مصر التي ما زالت تحتل مثلث حلايب وشلاتين بمساحة حوالي 20 ألف كيلومتر مربع السودان يبيع ليها مليون فدان أراضي زراعية؟؟ بيع وليس إيجار؟؟ أرجو أن يكون الخبر مفبرك.
05-27-2025, 08:18 AM
محمد بدرالدين محمد بدرالدين
تاريخ التسجيل: 01-15-2018
مجموع المشاركات: 2749
استاذ محمود .. المحاربين القدامى تحيات و تقدير و للاخوة الاحبة كذلك
.. و هذا البيان ايضا يحتاج للتاكيد.. الغربية انه بيع و ليس استثمار او معقولة بيع عديييل كدة ؟ ( و هناك كتابة انه استثمار) يبدو ان هناك تناقض و بعدين لو صح الامر زى ما قال احد الاصدقاء :اخوانا المصريين بياخدوا المقابل لخدماتهم فورا مثلا محاولة اغتيال رئيسهم حسنى مقابلو كان حلايب و شلاتين و حسه مساندة الجيش مقابلو ( بيع) اراضى و تملكها كما بيعت من قبل حلفا بدون مقابل ولو استنكرت او كدة .. زى الاطفال بيكسروا اللعبة هههه يعنى الناس النازحين بمصر الان يشيلوا شيلتهم .. بركاتك يا شيخ كامل و صباحات التفاؤل
مودتى و تقديرى
05-27-2025, 09:39 AM
HAIDER ALZAIN HAIDER ALZAIN
تاريخ التسجيل: 12-27-2007
مجموع المشاركات: 22730
Quote: الجعليين أنفسهم قبل كده نفوا وجود حاجة اسمها " مجلس شورى الجعليين " المطبلاتية ديل اسسوه قريب
قريب الاسسوه فيها دي متين يا حيدر حنين ؟
عموماً البيان واضح انه مفبرك والجهة الناشراه لها غرض ما واول حاجة مفروض يقيف قدامها الزول انه موقع باسم اللواء م / عبدالعزيز عوض السيد وهو استقال من رئاسة المجلس منذ ديسمبر 2022م. النقطة التانية حشر اسم شركة زادنا فما فهمت كيف يتم البيع عبرها؟ هل هي وزارة استثمار في الولاية والا بتملك الاراضي الزراعية والا هي شركة مصرية ام شريكة لشركة مصرية حتى يتم البيع عبرها؟؟
النقطة التالتة المفروض الزول يقيف عندها.. جاء في البيان انه البيع دا عبارة عن مؤامرة بيقودها الفريق البرهان في " معركته " ضد الدعم السريع. ودي لغة لا يمكن ان يستعملها مجلس شوري الجعليين مهما كان..
عموماً الاجدر التفكير فيمن يلفق مثل هيــك طالوشات ضعيفة ومعرفة ليش بيعمل هيـك ام هي من افرازات وفعائل الفتن والبلايا الاصابت البلد دي الخلت الناس تخوض وتستعرضها بدون ادنى حساسية او استعبار فقط استبعار للعقول.
قال ننتظر قال
05-27-2025, 02:21 PM
محمود الدقم محمود الدقم
تاريخ التسجيل: 03-19-2004
مجموع المشاركات: 12875
هلا محمد بدرالدين في ظل الحرب دائما بتكون مافي شفافية وفي فساد عظيم واصلا الفساد والافساد منتشر في السودان قبل ابريل 23 لكن بعده ا صبح علي قفي من يشيل فساد في كل شيء في الدواء والماء الحم\للله ليس في الاوكسجين لذلك الكلام بيكون كتير في بعض الامور البتتعلق باصول البلاد والعباد مثلا الخارجية السودانية قالت الامارات دولة عدو لكن للان الذهب بمشي دبي زي الترتيب ومبارك اردول في بودكاست اكد علي ان لا بديل للذهب السوداني غير دبي وعلي ذلك قس بخصوص المصريين نعم ما عندهم لله قط كلو والثمن مضاعف الكثير من مثقفي نهر النيل ما عايزين يفكرو حتي في جزئية ان مصر تعاني من ندرة المياه وتقلص الاراضي الزارعية وهناك دارسة طويلة عريضة صدرت عن جامعة يال العريقة تحدثت عن هذا الامر وان الامر غض النظر عن صحة البيان او فبركته سيؤثر سلبا علي وضع السودان عامة وسكان النيل خاصة والزاد الطين بلة ان هناك كثير من سكان نهر النيل الذين من الله عليهم بقروش لديهم شقق في القاهرة او عموم مصر وبالتالي يبدو انهم لا يريدون اثارة الموضوع حفاظا علي مصالحهم الشخصية نعم لا باس ان تاتي مصر والسعودية والامارات واسرائيل ان يستثمروا في السودان طالما كان خير ومصلحة للشعب والاقتصادي علي ان تكون كل الامور واضحة وبالقوانيين والبرلمان غير كدا الامور بتكون اكثر من غامضة تسلم كثير علي المداخلة
05-27-2025, 01:29 PM
محمود الدقم محمود الدقم
تاريخ التسجيل: 03-19-2004
مجموع المشاركات: 12875
سلام دكتور ياسر الوضوع ملتبسة للغاية وغير واضحة وفي ظل غياب الشفافية وفي ظل المعطيات الجيوسياسية الجديدة والحرب الاهلية العرقية في السودان وتطورات الحرب الي حرب مسيرات يبقي كل كلام بنكتب وبتنشر ليهو علاقة بالنيل والاض ينبغي الوقوف عنده كثيرا اجمالا بتمني الخبر يكون فبركة ليس الا تسلم
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمود الدقم
Biraima M Adam
هدى ميرغنى
حيدر حسن ميرغني
Yasir Elsharif
محمد بدرالدين
HAIDER ALZAIN
فيس بوك
تويتر
انستقرام
يوتيوب
بنتيريست