#الافتراضات_المسبقة قرأت زمان في واحد من الكتب قصة حقيقية لبنت اسمها ماتيلدا، عمرها 14 سنة كانت ماتيلدا عاوزة تعمل مقلب في والدها عن طريق انها تختبئ في خزانة الملابس وبمجرد ما والدها يرجع للبيت تطلع من الخزنة و "تخلعه" = "بوووو" بس الحصل كان مأساوي جدا كان والد ماتيلدا وامها مفتكرين انها مع أصحابها برة البيت وعلى أساس الافتراض دا وهم راجعين البيت بمجرد ما شعر الوالد بحركة غريبة، دخل على غرفته واخد مسدسه عيار 357 واتجه لمصدر الحركة (غرفة بنته ماتيلدا) دخل الاب الغرفة وماتيلدا كانت في الخزانة منتظراه يفتحها عشان تفاجئه ومع لحظة دخول الاب للغرفة قفزت ماتيلدا من الخزانة فأطلق عليها ابوها النار واصابها في رقبتها نقلوها للمستشفى، بس للأسف الشديد، ماتت بعد 12 ساعة من الحادث انا حبيت استخدم القصة دي لأنها بتمثل مدخل، مأساوي بس ممتاز للموضوع الأنا عاوز اتكلم عنه، الا وهو الافتراضات المسبقة كلنا عارفين انه دماغ الإنسان مقسم (افتراضا) لجزء واعي وجزء غير واعي والمهمة الأساسية لدماغ الإنسان بشقيه الواعي والغير واعي هي مساعدة الإنسان في أنه يحل المشاكل اليومية البواجهها اولا، وفي انه يحافظ على حياته ثانيا والافتراضات المسبقة هي وسيلة بيستخدمها دماغ الإنسان عشان يساعدنا في الحاجتين ديل حل المشاكل اليومية والحفاظ على حياتنا يعني لو اخدنا القصة الفاتت دي حنلاقي انه رد فعل والد ماتيلدا كان نتيجة افتراض مسبق بوجود خطر ممكن يهدد حياته وحياة أسرته فالدماغ في اللحظة دي بيتخذ واحد من خيارين اما المواجهة أو الهروب وفي الحالة دي للأسف الشديد كان الخيار هو المواجهة كلنا سمعنا بقصة مدرس الرياضيات الكتب مسئلة رياضية وقال للطلبة انه المسئلة دي واحدة من المسائل المستحيلة الحل بس صدف انه في طالب نائم وماسمع كلام الأستاذ وبمجرد ما صحى افتكر انه المسئلة عبارة عن واجب مفروض يحله فرجع البيت وبدأ يحل فيها وبنهاية الأسبوع قدر يوجد ليها حل في حين أنه كل الطلاب السمعوا كلام الأستاذ ما حاولوا حتى يبدأوا في الحل والسبب الخلاهم ما يحاولوا هو الافتراض المسبق باستحالة الحل اغلبنا، غير مدرك لاثر الافتراضات المسبقة على حياتنا افتراض الفشل، الاحراج، عدم التوفيق، الخزلان، وغيرها بخلينا #متسمرين ومكبلين، وعايشين حياتنا بالرتابة اليومية المعتادة في حين انه تغيير بسيط في طريقة ادراكنا، ذي افتراض انه ربنا حيسهل وييسر الامور، وانه نحن علينا السعي وهو عليه التوفيق ممكن يغير كل حاجة افتراض الاسوء ليه فوائده، لانه الحياة ما قوس قزح وابتسامات وملائكة ماشية في الشارع بس في المقابل التفائل وحسن الظن بي ربنا، خاصة في قراراتنا الشخصية، غالبا هو الفيصل وربنا بقول في الحديث القدسي (انا عند ظن عبدي بي.. ) دا بيعني انه توكلك على ربنا، ومدى ثقتك في توفيقه واعانته ليك، هو الفيصل في القضية ان شاء الله الفكرة تكون وصلت #اسامة_محمد_بابكر
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
احمد عبدالله دفع الله
فيس بوك
تويتر
انستقرام
يوتيوب
بنتيريست