الهوس الكيزاني بوَّظ الجيش من زمن ليس بالقصير

Quote: ▓▓▓▓▓▓▓▓▓▓▓▓ ✍🏼خليل محمد ⤵⤵ بمناسبة الدفاع الجوي، و قعادنا في الصقيعة و المسيرات تحوم فوق ريسينا بالليل و النهار.. ح اعيد ليكم قصة انا شاهد عليها و ضباط كتاااار قاعدين هنا شاهدين عليها.. دا للناس التابعوني حديثاً بعد الثورة، او بعد و اثناء الحرب.. و تذكير لصديقي العزيز الجنرال القال " خليل كلامو حار و ما مقبول" فصول القصة حدثت في الدمازين في بداية التسعينات.. زمان كان معروف نظام الدفاع الجوي في السودان عندو ثلاثة محطات رئيسية..تغطي سماء السودان.. بورسودان.. وادي سيدنا.. خزان الرصيرص.. دي المحطات الرئيسية الفيها رادارات الرصد.. اما المحطات الفرعية و الوحدات منتشرة في مناطق و منشآت استراتيجية و حيوية كثيييييرة.. اها قامو حدثوا المنظومة بمنظومة صينية، و ابتعثوا ثلاثة ضباط كدفعة اولي للتعرف علي المنظومة الجديدة..طبعاً الصرف ب " الضولار" اها في ذات مساء يقموا ناس شرطة النظام العام يعترضوا قائد محطة الدمازين وهو خارج مع خطيبته .. آيّ والله طالع معاها من بيتهم و كانوا في ترتيبات الزواج.. الكلام دا نهاراً جهاراً في الشارع العام.. قالوا ليهو دي ما زوجتك.. وين القسيمة.. " يا جماعة دي خطيبتي و كلها ايام و ح نتزوج" و انا طالع بيها من بيتهم قدام امها و ابوها و كل اهلها.. قالوا ليهولا دا شرعاً لا يجوز.. ساقوهو و ختوهو في الرج هو و خطيبتو.. آيّ والله.. اها سمعنا بالخبر و جن جنوننا.. و تم اخراجه من الحراسة عنوةً و اقتدار.. في مساء نفس اليوم جات اشارة من القيادة العامة تؤيد موقف النظام العام، و ما ادراك ما الوعيد و التهديد.. اها الموضوع بقى قضية، و محكمة.. بعد ايام قام الضباط زملاء قائد محطة الدفاع الجوي ، و قيادة الفرقة اقاموا له زواجاً اسطورياً شهدته كل المدينة.. اها وسط هذا الفرح تقوم تجي اشارة من القيادة العامة شئون الضباط تفيد باحالة الضابط الي المعاش و هو برتبة النقيب.. آيّ والله.. لحدي هنا تمام و الوضع عاااادي لطالما الصالح العام لأجل حماية الدين!! يلا يقوم يجي بشة زيارة الي الدمازين.. طبعاً بشة جنو افتتاحات و قصقيص شرائط و الذي منو.. اها من ضمن فعاليات الزيارة افتتاح محطة الدفاع الجوي و المنظومة الصينية الجديدة.. اها بعد بشة قص الشريط.. يقوم ضابط صف برتبة الرقيب بتنوير السيد القائد العام بالمنظومة وهي لا تعمل.. بشة همس للقائد.. هو انتو ما عندكم ضباط دفاع جوي.. قال ليهو والله يا سعادتك عندنا بس قائد المحطة تمت احالته الي المعاش الاسبوع الفات.. جن جنون بشة قال ليهم الضابط دا لازم يرجع اليوم قبال باكر.. اها تواصلوا مع زميلنا الضابط قال ليهم السماء قريب.. في نفس ذات الشهر حصل علي تعاقد مع دولة اجنبية في عمل مدني قريب من تخصصه.. فطار مغادرا ارض السودان.. كسرة.. لو عايز تعرف خلل اليوم، و المسيرات، و سماءنا المفتوحة العن هذه الحقبة اولاً.. ملخص.. اها يا صديقي الجنرال العزيز..انا من عشرات السنين كنت بكتب الكلام الحار دا عن القصص دي و الفساد داخل الجيش، راجع ما اكتب جيّداً..الزمن داك كنتو غرقانين في النعم و العربات، و النساء مثنى و ثلاث و رباع..و انا كنت في المنافي و اللجوء.. كنتوا فاهمين اني بكتب لأني عندي غبينة و عايز افشها.. صرحتوا بيها كتييييير ..بس للأسف كنت اخشى علي الجيش و السودان و الشعب من هذه اللحظات العصيبة!!!!! كم تمنيت انها تكون مجرد غبينة، و تثبتوا العكس في صورة جيش محترم يهابه الاعداء قبل التفكير في منازلته، و يردع الصديق قبل العدو.. و عندما نحتاجه نجده حاضراً بعدته، و عتاده!!!! للأسف عايزين التطبيل و الكذب و التضليل..و دفن الرؤوس في الرمال! للأسف لم يدفع الثمن إلا البسطاء و اهلنا الغلابة الغبش، و المسيرات فوق رؤوسهم تقتلهم و تهدم منشآتهم المدنية و بنيتهم التحتية، و تجز رؤوسهم.. اخيراً.. لو في صمتي مصلحة وطنية افتوني ساصمت الي ان يرث الله الارض!!!!! اعرف جيداً كراهيتكم تجاهي.. فقط لأني نبهتكم مبكراً عن عيوبكم و فسادكم..و لاكن.. بالالف.. آيّ والله.. و السلام خير ختام.. خليل محمد

Quote: هرولة بورتسودان لكوريا الشمالية.. مأزق جيوسياسي يفاقم أدلة الانتهاكات