|
|
|
 Re: انتهاكات المليشيا المتمردة علي مواطني حي (Re: ترهاقا)
|
سلام ترهاقا
سيد البيت دا يحمد الله انه بيته وسخان بس. الزجاج الكثير في بيته موجود وما اتكسر. الثلاجات والمكيفات ومراوح السقف موجودة والمطبخ موجود والعفش من دواليب وسراير موجودة مع المراتب.
بيته يحتاج لنظافة واستبدال مراتب. الغريبة الملابس موجودة في الدواليب.
خلاصة الموضوع عبارة عن سوء استخدام شديد لمنزل دخله الدعامة دون موافقة صاحبه. على صاحب المنزل مطالبة الدعم السريع وحميدتي بدفع تعويض عن كافة الاضرار التي نتجت عن دخولهم المنزل.
| |
 
|
|
|
|
|
|
|
|
Re: انتهاكات المليشيا المتمردة علي مواطني حي (Re: Zein Abdalla)
|
يا زين عمك ده ما شاف الانتهاكات الجد جد
الانتهاكات الحدثت في غالبية المنازل حصلت علي مرحلتين
الدعامة يشفشفوا ما خف وزنه وغلاء ثمنه
يجو الشفشافة يقشوا باقي البيت للابواب والشبابيك ما يخلوها
ده غير الناس البيوته اتهدمت بفعل القصف.
غايتو فيديو فطير ودعائي للدعامة.
شوفوا الدعامة ما بيسرقوا ولا بنهبو.
| |
|
|
|
|
|
|
|
|
|
Re: انتهاكات المليشيا المتمردة علي مواطني حي (Re: السر عبدالله)
|
Quote: يا زين عمك ده ما شاف الانتهاكات الجد جد
الانتهاكات الحدثت في غالبية المنازل حصلت علي مرحلتين
الدعامة يشفشفوا ما خف وزنه وغلاء ثمنه |
| Quote: وانت بتفتكر يا زين ان عبد الرحيم دقلو زعيم الجنجويد حيقبل يدي تعويضات للمتضررين ؟ |
سلام عارف والسر
المشكلة التي ستواجه الناس بعد نهاية الحرب (اذا انتهت)حتكون كبيرة جدآ. انا القاعد مرطب بعيد عن السودان لم اكن اتصور ان الضرر الذي سيصيب الناس سيصل هذا المدى.
قبل اسبوعين (عديلي) عاد للخرطوم لاول مرة منذ بداية الحرب ومشى صور فديو لمنزلي ومنزله ومنزل (اهل زوجاتنا).
منزل اهل الزوجة اخبروهم قبل فترة بان البيت تم نهبه بالكامل ويحتاج لعفش كامل عند عودتهم.
لم يحدث ان سألت عن منزلي وكنت بقول اذا لم تقم الدانات او الطيران بهدمه فستكون اعادة اصلاحه مقدور عليها (بالنسبة لي). عديلي مع بداية تصوير الفديو طمنني وقال لي الحمد لله بيتك موجود كهيكل.
البيت من الداخل خالي تمامآ لا معلقة لا كباية لا تلاجة لا سرير لا ستاير وكل زجاج الشبابيك مكسر. في المطبخ عندي شفاط
(Kitchen hood)
فكوهو وشالوهو 😲 بعض البلاط في الطوابق العليا تمت ازالته والسبب بحثآ عن الذهب. قال لي الناس دسوا الدهب والفلوس تحت البلاط واي بلاطة يشكوا فيها حيقلعوها هي والجنبها. قال لي سابوا ليك سريرين جميلين في السطوح
لونهم ابيض. قلت ليهو لا املك سراير بيضاء ويبدو ان البيت كان معمول مخزن مسروقات.
في الحوش تحت كان في عنقريب جميل جدآ وقال لي. عنقريب (الجرتق) موجود... قلت ليهو والله ما بتاعي وما عندي أي عنقريب في البيت.
قام بتصوير الحمامات وقال هي مستخدمة ولكن ليست رديئة.
اكثر حزني كان عندما تم تصوير شجرتين الليمون وشجرة جوافة وشجرة برتقال ورابعة شجرة قريب فروت كانو مثمرات والآن صاروا حطب نناشف.
قلت ليهو ليه شالوا الملابس المستعملة، قال لي معظم الملابس يتم استخدامها كورق التوليت للنظافة بعد قضاء الحاجة وذلك لانعدام المياه.
ناس المنطقة قالوا الدعامة كانوا ساكنين في المنزل. عندما سالت عن من قام بالسرقة فكان الجواب كل ما يخطر بذهنك دعامة، جيش، ٩ طويلة، جيرانك انفسهم، مجموعات (
عروب) بلواري التراب.
لم يقم (عديلي) بتصوير منزله وقال لي هو خاف ان يصاب بمرض لان المنزل تم استخدامه ك (مستراح) وعندما يمتلئ المستراح يذهبوا لمنزل آخر لقضاء الحاجة.
منزل اهل الزوجة اصيب بقذيفة مباشرة وتهتك السقف والحوش والمنزل من الداخل خالي تماما ما عدا صورة المرحوم والد الزوجة معلقة على الجدار. قامت ابنته باخذها وهم في حالة بكاء. المنزل غير صالح للسكن.
دا كله لا يساوي شيء بالنسبة لفقد الارواح... الاهل والاصدقاء والجيران.
| |
|
|
|
|
|
|
|
|
|
Re: انتهاكات المليشيا المتمردة علي مواطني حي (Re: Zein Abdalla)
|
يا السر من قام بالحرب والسرقة وكل المآسي هو الشعب الكيزاني. عند استيلاء الكيزان علي السلطة قبل ٣٦ عام من كان عمره ١٤ سنة الآن يبلغ ٥٠ عاما ومتربي تربية كيزانية كاملة لا يعرف الصاح من الخطأ.
نسيت ان اذكر بان الرجل اثناء تصويره في منزلي شاهد مجموعة مصاحف جديدة ملقاة علي الارض. المصاحف مش بتاعتي يبدو انهم بعد سرقوها من احد المنازل لم يعرفوا ماذا يفعلوا بها
| |
|
|
|
|
|
|
|
|
|
Re: انتهاكات المليشيا المتمردة علي مواطني حي (Re: Zein Abdalla)
|
| Quote: المشكلة التي ستواجه الناس بعد نهاية الحرب (اذا انتهت)حتكون كبيرة جدآ. انا القاعد مرطب بعيد عن السودان لم اكن اتصور ان الضرر الذي سيصيب الناس سيصل هذا المدى. |
والله يا دكتور لمن تشوف بيت اختي في امتداد الدرجة التالتة تذهل من الدمار ، شالو ما شالو وكسروا أي حاجة ما عايزين يشيلوها
نزلوا السقف كلو يمكن يكون في دهب ، يرفعوا البلاط وكأن الناس كانت متوقعة اللي حيحصل ويختو الدهب تحت البلاط، غايتو نقول شنو؟ الجاتك في مالك سامحتك
| |
|
|
|
|
|
|
|
|
Re: انتهاكات المليشيا المتمردة علي مواطني حي (Re: ترهاقا)
|
يا زين
عشان تصدق بأن الجنجويد كلهم كيزان ...يعني المصاحف دي
حيكون سرقوها وجابوها لبيتكم ؟
لا..المصاحف بتاعتهم ...وكانوا يتاجرون بالدين ...ويقتلون باسم
الدين ويسرقون وينهبون باسم الدين ويغتصبون باسم الدين فهم
يعتبرون أنفسهم المريضة المليئة بالجهل انهم في حرب ضد الكفار
وان ممتلكات المواطنين غنائم والنساء سبايا...
انت نسيت منو الأسس وأنشأ هؤلاء المغول والتتار ..!!
اما حكاية انهم ضد الفلول وما ادراك ما الفلول ...فهذا محض كذب وافتراء ..
| |
|
|
|
|
|
|
| |
ترهاقا
Zein Abdalla
Arif Nashed
السر عبدالله
فيس بوك
تويتر
انستقرام
يوتيوب
بنتيريست