|
|
|
 Re: إذا استمرت الحرب لعشر سنوات قادمات ما هي ا (Re: اسماعيل عبد الله محمد)
|
أخانا إسماعيل
تحية وسلام
رسالة من أحد قراء ومتابعي سودانيزاونلاين
أدناه، رسالة حملني صاحبها أمانة نقلها إلى حيث هنا، نسبة لأنه ليس عضوا في المنبر، وإسمه أزهري صالح دفع الله
وها انذا أنقلها أمانة، كما هي.
============
الأخ أباذر
تحية طيبة وبعد،
ارجو منك تنقل الرسالة دي والرد بيها علي موضوع اللاجئين السودانيين لو الحرب استمرت، وأنا زي ما عارف ما مسجل في صفحة ابوبكر، عشان كده ما بقدر اكتب ولا ارد، الامانة في الذمة تشيل كلامي وترسلو زي ما هو
اخوكم أزهري دفع الله
=============
الرسالة:
السلام عليكم ورحمة الله
الاجابة علي الدول هي تشاد وليبيا
وممكن تضيف ليهم كمان النيجر ومالي
واشمعنى تشاد وليبيا دا بنرجع ليهو في الآخر
لكين السؤال هو، اتا بتقصد ياتو سودانيين بالتحديد ؟
ناس الشرق ولا الغرب ولا الشمال ولا الوسط ولا الجنوب
كان علي ناس الشمال والوسط ما اظن تاني ببقو لاجئين، عشان عرفو وفهمو الدرس كويس بعد الحصل ليهم من المرتزقة والحرامية
في الاول ما كانو متوقعين يجوهم ناس فجاة ويهاجموهم في بيوتهم في قراهم ومدنهم ويقتلوهم ويطردوهم ويغتصبوهم، عشان مافي سوداني بعمل كدا مهما كان مجرم وفاسد وحرامي،
وحاليا كلهم ولا معظمهم رجعو واتسلحو وجهزو نفسهم، النسوان قبل الرجال، وبقو مستعدين لي اي شي، لكين ما ببقو تاني لاجئين، يا يموتو في بيوتهم ولا يقتلو ويبيدو الناس الجايين يبقوهم لاجئين،
وما اظن تاني المرتزقة والحرامية يتجراو ويهاجمو الناس العزل الابرياء زي ما عملو في الاول، بعد ما عرفو وشافو وضاقو الشي الحصل ليهم وبقو مرعوبين وشردو وفردو علي جيهة كردفان ودارفور، وعارفين انو الناس جاهزين ليهم ومنتظرنهم،
وزيادة في كدا كمان، ناوين المره دي يمشو ليهم في محلهم عشان يخلصو حقهم ويوروهم الرجالة الجد جد، ما رجالة الحرامية المسلحين لامن يهاجمو بيوت النسوان والرجال الما عندهم سلاح ولا بقدرو يدافعو عن نفسهم
اما عن اشمعنى تشاد وليبيا
عشان المره دي كان في لجوء بلجاو ناس الغرب بس لانو هم العليهم الدور والحرب والموت بكون في مناطقهم، وما عندهم طريقة غير يمشو تشاد ولا ليبيا القريبات ليهم
والنيجر ومالي عشان اكيد بكون في جزء من المرتزقة والحرامية صاحبو مرتزقة من النيجر ومالي واكلو معاهم الملح والملاح السرقوهو من ناس الخرطوم والجزيرة والنيل الابيض، وبمشو معاهم ولا يخلوهم يسوقو اهلهم معاهم
تشاد انسب ليهم واحسن لانه كتير منهم عندو اهله ولا باقي قبيلته هناك، وممكن كمان يمش هناك ولا يتعرف ويتفرز من ناس البلد
لكن ناس ليبيا ما عندهم شي بالمجان، يا مسكو اللاجئين ديل واستعبدوهم زي ما حصل قبل كدا ولا كمان شغلوهم مرتزقة عشان يحاربو ويقاتلو بالقروش بدل منهم
ديل ياهم السودانيين الببقو لاجئين بعد كدا، لكين باقي السودانيين ما ببقو تاني
غير كدا كمان الحرب ما بتستمر عشرة سنين، ولا عشرة شهور، وكان علي شوية الطيارات المسيرة دي، المتخصصة في ضرب الكهرباء والمستشفيات والاسواق، دي موضوعها منتهي ومقدور عليهو
والموية تكضب الغطاس
-نهاية الرسالة-
| |
  
|
|
|
|
|
| |
اسماعيل عبد الله محمد
adil amin
محمود الدقم
أبوذر بابكر
فيس بوك
تويتر
انستقرام
يوتيوب
بنتيريست