الخرتوم

باكر أكيد فرحك بزيد
****************************

حزينه جافاكي الغُنا
ونحن زيك يا وحيده
تعبنا هدّانا العَنا
تعب الكلام
يبست مواويل القصيدة
بعدت خطاويك يا مجيدة
وما فينا غير مُر الملام
غنيتي لى وجع البحر
تاوقتي فجيتي الزحام
راجيه الخبر
ونحن زيك يا وجيدة
وسط الدرادر والسفر
مغسة هديلك والخصام
يا جايه من حِرب الحراز
المسقي بي موية المطر
بي لمة الناس العُزاز
وجانا الخبر
إطمّني
فشة غبينتك يوم قريب
إطمّني
طلة شبابيك الحبيب
إطمّني
باكر تجيب الهمبريب
فرحة شوارعك وضل بيوتك
وضحكة في خطوات مشيك
مسقية من نبع الحليب
هدير غناكي مهر سكوتك
جهرة ملامحك ضي وشيك
إطمّني
يا طالعه من طين الحقيقة
وساكنه في جروف الخيال
إطمّني
باكر نغني وننتشي
بي شوق مشاويرنا الأنيقة
باكر أكيد
فرحك بزيد
باكر نشد خيل الوصال
إطمّني
ما تخلي شي
هزي اليك جذع الهديل
يتساقط المنى والجمال
فرحاٍ هميل
يسقي الشوارع والبيوت
ما يخلي شي
وتب ما بموت
وصباح بشارتك يبقى عيد
إطمّني
باكر أكيد
ترجع سماحتك من جديد