حسبي الله ونعم الوكيل أسوأ حاجة ممكن تحصل ليك انت كسوداني داخل الأراضي السودانية انك تكون متطوع جاين من امدرمان زي 8 شباب كلنا من شرق النيل شغالين متطوعين في مراكز العلاج والتكايا نزلنا نشيل تصديق نقطع كبري الحلفايا من امدرمان واصلين شرق النيل ،نزلت انا وصاحبي بكل احترام للتصديق وقفنا في الصف جا واحد ما شاء الله ربنا انعم عليهو بالصحة قال الصف كلو يدخل المكتب بكل عنف حتي معانا اعمامك كبار ما راعا لسنهم ،المهم بدأ يسأل انت من وين وماش وين وجاي من وين لما الدور جا علي انا وصحبي قلنا ليهو شرق النيل قال كلكم اطلعو برا ولم فينا ضرب وشتيمة وسب دين وألفاظ يعجز اللسان عن وصفها ،شبكنا انتو متعاونين ودعامة وحرامية واولاد حرام وقلت ادب ما سمح لينا بفرصة نتكلم اصلا بعد كم كف وبنية وضرب في الرأس شال اثباتاتنا لقاها نضيفة لكن بعد دا واصل في الصرب قرابة ربع ساعة وباقي العساكر بتفرجو حتي معاهم واحد سألني من كل مكان في الجريف جاوبتو وكمان ذكرت ليهو انا منو واهلي منو وعرفهم لكن ولا اشتغل بينا جا واحد تاني عاجباهو نفسو عرف نحن من وين لم فينا ضرب برضو وألفاظ في نهار رمضان، سألنا شغالين شنو انا قلت ليهو شغال في سوق الله اكبر ومتطوع في غرف الطوارئ والتكايا قال لي قحاطة يعني من الكلمة دي عرفت انو الشغلة بايظة وما عندها علاقة بالاجراءات الأمنية قال لي تعالجو وتوكلو في الدعامة وتوصفو البيوت الله بوديك لي الله دغري ،المهم انا رديت ليهو الفي راسك اعملو دا شغلك قال نحن المضادة فوق الله وتحت نحن قال لي بصفيك قلت ليهو خير ، بعرف شباب من المضادة قسماً بالله تختهم في الجرح يطيب سهلو لينا معظم اجرآت التكايا وهم حالياً في ارض المعركة . المهم بعد فترة من الإهانة جا واحد من الشباب الراكبين معانا في العربية اتكلم مع ضابط بعرفو قال ليهو فك الشباب ديل الغريبة الضابط ولا بعرفنا بس علشان هو ضابط .
العايز اقولو من غير ما نذكر نحن بنعمل في شنو بس مرات الكلام واجب انا من بدأ رمضان بمشي امدرمان كل يوم وبرجع اجيب حاجات للتكايا وعلاج كلو لوجه الله رغم الصيام وصعوبة التنقل والساخنة وغير كدا طوال وجود مرتزقة الدعم السريع نحن قعدنا في البلد دي خدمة لأهلنا الزمن داك انت جريت لحد بورتسودان خليتنا في نص القتل السلب والنهب والجوع والمرض والعطش بس نحن صنددنا علشان اهلنا كان بإمكانا نطلع تجي في النهاية توصفنا الاوصاف دي . قسماً بالله الضرب كلو ما أثر معاي بس الألفاظ وكلمة متعاونين خلخلت قلبي من مكانو والعبرة خنقتني بس نقول شنو حكم الجاهل وحامل سلاح لكن ربنا اقوي منو وخليت حقي لي الله يلقاهو في الدنيا قبل الآخرة. ياخ الدعامة سنتين ما حصل ضربوني الضرب دا علي الاقل ديل مغول لكن لما تقول ليهم انا شغال متطوع بحترموك رغم الاختلاف الثقافي والجغرافي والأخلاقي.
في النهاية يا ريت المسؤولين يوعو السعاليق ديل ويحترمو المواطن من حقك توقف اي شخص في أي مكان وزمان ومن حقو يعرف علي نفسو اثبت عليهو حاجة حاكمو بالقانون غير كدا ما من حقك تعمل فيها بطل علي الضعفاء.
سمير ابراهيم حسب الرسول متطوع منذ أول شهر من الحرب الي الان الجريف شرق
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير ابو الزهراء
فيس بوك
تويتر
انستقرام
يوتيوب
بنتيريست