كشة ترامب جاتكم في، امريكا يا وافد بيت بيت حارة حارة زنقة زنقة ايام كشة الأحباش ، كانو بيقولو ليهو قول " الحصاحيصا" ..
الايام دي دفار الكشة حق الجوازات الامريكي لو شكا فيك بقول ليك قول Massachusetts 😂😂
بريمة بلل.... بل راسك بس ترامب شعارو... بل بس، لحدي ما يفضل بقاري، واحد، في، امريكا كدي، عجبني، للمرقوت بعد حظر الجنسيات غير المرغوب فيها في، امريكا حيجو يحمووو ليك الجحر.... في، عد، الغنم الامريكية الساكن فيها دي وممكن بتابعوك بتكتب شنو.... هنا ذاتو يا شماتة ابله ظاظا فيك خلي حميدتي، ينفعك لاشي يعدل الوطن صلح بلدك واقعد، فيها، زي، الصينيين نحن راجعين في، المغيرب
03-16-2025, 05:06 AM
Biraima M Adam Biraima M Adam
تاريخ التسجيل: 07-05-2005
مجموع المشاركات: 34305
أمريكا أعظم دولة .. لا يظلم في أمريكا أحد، ما في بلد في الدنيا عشت فيها وأستمتعت بالعيش فيها مثل أمريكا، بلد تحس فيها أنك سيد نفسك،
في أمريكا كنا نراجع المسمى الوظيفي والدرجة التى نحن عليها، لو القروش زادات في التقرير القومى طوالي تمشي تطالب بزيادة في الأجر ويدهم في رقبتهم يزيدوك.
في أمريكا إذا الواحد محافظ علي حسن سير وسلوك يعنى ما عندك مشكلة مالية ولا مشاكل عنف أو مرور وما عندك مشاكل منزلية (عنف منزلي، جنهم وجن تشاكل المرأة أو تهمل مصاريف الأطفال) يعنى أنت إنسان يمكن الأعتماد عليك، تمشي أقرب بنك ممكن تأخذ قرض تشتري أحسن عربية وتشتري أفضل منزل وتنزل أخر طراز أثاثات وتعال شوف ال "برستيج"، لكن تشتغل بقية عمرك وقريشاتك يشولها منك بقد القفة، هذه هى الرسمالية .. تحصي نفسك مش قروشك.
في أمريكا أصلاً ما بتتلفت لحاجة .. تطلع كرديت كارد .. تخش أجعص مطعم .. وتذهب أعظم المحال التجارية أمريكا هى العلمانية تمشي علي رجلين .. لا زول بسألك عن دينك، ولا جنسك ولا أصلك وفصلك
حينما يأتي التعداد السكانى، الأمريكان شطار جداً يشوفوا أكثر أثنية race ممكن يتم دعمها، كلهم يضعوا أثنياتهم علي أساس تلك الأثنية .. حتى يتم دعمهم، ما في أي زول يقول ليك عينك في رأسك .. مثلاً أذا أنت خليط أثنى عربي أفريقي تكون ضيعت حقك .. ولو قلت عربي وسط محله كلها زنوج يكون قللت فرصهم في الدعم
وفي أمريكا، نحن نصوت حسب مصالح مجتمعاتنا، لو الشخص يهودي ولكن يوعدنا بأشياء كثيرة أكثر من مسلم غير ملتزم، نصوتوا لليهودي نكاية في المسلم غير الملتزم عشان المرة الجاية يلتزم بخط مجتمعنا في المنطقة .. يعنى الأمر مباصرة شديدة وكله معلوم للأخرين .. لعب حر .. من قبل كنا جالية لا تسوي شيئ في عام 97م في منطقتنا، اليوم وصلنا 30 ألف إنسان مسلم ملتزم بأجندة مجتمعنا في محليتنا ..
أنا صوت للرئيس ترامب .. يا عدولي، وهو بالنسبة كل ما يفعل فيه سوف يقود إلي نتائج إجابية .. الرئيس القوي سوف يغير صورة العالم ويخرج بالعالم من عنق زجاجة الحروب إلي بر الأمان .. رغم أن الأقتصاد مترنح جداً لكن هو يعمل ليل نهار لوضع لمساته المعروفة ب "الترمبية" في الأقتصاد ومظاهر الحياة.
وبعدين المؤمن كل أمره خير، زمان كنت إنسان فرد، لكن بعد الأولاد كبروا .. بقيت إشتغل حسب الطلب .. يعنى خلاصة الأمر، ما عايز أي شيئ من ناحية عمالة .. مستهلك بأمتياز .. ولاعب جيد في سوق الكريبتو والبورصات .. هل تصدق يا عدولي، أنا أكون قاعد معكم في النت، أدخل في سوق المضاربات في الأسهم، طق طق أطلع ب 1000 دولار، أشيل الألف أديه لواحد من الأولاد أو المدام أمشوا قضوا غرضكم .. وأرجع أطق ليك عمر التاج أو هاشم الكرور
بريمة
03-16-2025, 05:49 AM
Biraima M Adam Biraima M Adam
تاريخ التسجيل: 07-05-2005
مجموع المشاركات: 34305
Quote: الايام دي دفار الكشة حق الجوازات الامريكي لو شكا فيك بقول ليك قول Massachusetts 😂😂
تقول Massachusetts ولا تقول Properties قاعدين يمسكون بها الصينين الجدد .. أصحابك يقولوا له قول Property يقول Ppety .. والسبب يبدو حرف الراء وحرف الأوو .. معدومات عن الصينين .. فتش لو لقيت صينى أسمه فيه حرف راء .. تجد حرف W بكثيرة ..
واحد صينى كان شغال معانا مبرمج أسمه Dung .. وهذه الكلمة تعنى براز الحيوان .. مثل البقر أها، أنا كل يوم مقابل الزول الأسمه الخرا دا بنشتغل سوه، أقترحت عليه إسم Young .. طوالي المجموعة قبلت الأسم وسميناه Young لما أخذ الجواز غير أسمه وصار أسم رسمى له ..
العربي لو عايز تمسكه تعطيه كلمة Van Heusen .. طبعاً دي من كبري شركات الملابس الرجالية العربي طوالي ينطقها بالعربي: "فان حسين" Van Hussien .. وتعطيه أي كلمة فيها حرف الراء مثل Rose Mary .. تسمع الراء الأولي في روز .. رررر .. طوالي تعرفه عربي.
برضو نحن السودانيون نتهجو الحروف علي الطريقة البريطانية .. مثلاً في أمريكا حرف الزاء .. يقولون له هجائياً "زاي" نحن السودانيوان لو قلت له تهجي حرف الزاء علي طول يقول "Zyd" وليسZhai
بريمة
03-16-2025, 06:08 AM
Hasheem Karouri Hasheem Karouri
تاريخ التسجيل: 12-20-2015
مجموع المشاركات: 5277
التفاصيل الذكرتها في مداخلتك البائسه دي . .. دي تفاصيل اي زول " شماشي " قاعد في اميركا ،او اوروبا ، او اي دولة تانية ..عائشها ..
انت لما طلعت من بلدك ، طلعت لشنو ؟
مش ياهو عشان تحسن وضعك وتتعلم ، وتطور نفسك ؟
هسي وينو تحسين الوضع والتطور ؟
انت قاعد هناك تاكل وتشرب ، وتلبس ، وتتفسح وتشوف حاجات جديدة ووووو . دي حاجات اي زول بعملا ، ياكل ويشرب وينوم . فدي طبيعة البشرية . لكن الهدف الانت طلعت عشانوا وينو ؟ لانك ماحتجاوب ، اوريك انا .. هدفك ضاع ، وانغمست ، في الاشياء الجديدة البتشوفها كل يوم ، ودي بسموها " صدمه حضارية " .
صحيح ممكن دخلك يكون اتحسن شويه " لوجود فرص اكتر من بلدك " ، وتكون سمنت شويه ، " لاتباعك نظام غذائى صحي ، وتناولك لاشياء غير متوفره في بلادك " ..
تكون لديك ملابس جديدة ، وسيارة جديدة ، وبيت فخم ، واساس جميل ، وحساب بنكي ، في اكثر من بنك . كل ده جميل وممتاز .. لكن
هل هذا يغير اصلك ؟ هل تحصلت علي الجنسية الاميركية بالميلاد ؟ في هذا الخضم ، وتسارع الاحداث اليوميه في الحياة . ضاع ، او لنقل تم نسيان الهدف الاساسي لخروجك من بلدك . لان ماتملكه هناك ، لن يكن باي حال من الاحوال في بلدك الاصلي . ولو بلغت الجبال طولا ، وامتلكت ما امتلكت ، فانت في النهاية " اجنبي " ، ويوجد فرق بينك وبين المواطن الاصلي ، مهما اجتهدت في اخفاء ذلك ، لاتستطيع اخفاء ذلك عن نفسك " انت في النهاية غريب " ، وهذه ليست بلدك ومسقط راسك . الطبيعي ومع تقدم الانسان في العمر ، يصل لقناعه ان هذه ليست بلده ، ويكون " ممنون جدا " لما قدمت له ، وحان الوقت للمغادرة . فيبداء بتجهيز نفسه للمغادرة النهائية " بعد ان يكون اطمأن " علي توفير افضل السبل لبنيه واولاده " فهو لايريدهم ان يمروا ، بنفس مامر به هو شخصيا " . يأسس سكن ، يوفر فيه كل ما استطاع احضاره من هناك ، ويستمتع بلحظاته الاخيرة ، ويدفن في ارض اسلافه ....
هذه غايه كل شخص غادر بلاده وتغرب ، وهو يعلم انه يوما ما سيعود ، ولن الغربه ملاذه الاخير ، قد يعاند البعض نفسهم ، ويذكوها دائما ان اوطانهم لم تقدم لهم شيئا ، لذا لايفكروا حتي بالعودة اليها .ويقولوا " لنمت هنا " وندفن هنا . مع ان الدفن في بلاد الغربه بمقابل ، وفي بلدك مجاني ،،، .... ماردت توصيله لك يابريمة . انه مهما فعلت ، ومهما طال غيابك عن ارضك ، ستعود اليها يوما " حتي لو في صندوق " . " الحنين " هو شعور نضغط عليه بشده ، حتي لايظهر ، ويبان للعلن . لكن هذا هو الواقع ، وماطار طير وارتفع .... مثله مثل قانون الجاذبية . فيوما ما ، ستعود ، ولو " قبرت " ، سيعود اولادك ، او احفادك ، للبحث عن اصولهم المنسيه ، رغم انك او انهم اجتهدوا في اخفاء ذلك ، والتنكر له طوال حياتهم ،،،، .........
ترامب لن يطردك انت .فانت مقيم بصورة نظامية ، وهم يعلموا ذلك . ترامب لن يسمح لدول بعينها ، ونحن من ضمنها . بعدم السماح لمواطنيها الجدد بالدخول . لكن الا يكفي هذا التمييز ، بمراجعة مواقفنا ، وقناعتنا ؟؟ ....
ياغريب يلا .. يلا لبلدك ... ونحنا بلدنا قاعدين فيها ، رغم الاذي ، ورغم المحن . " وشخصيا " تلات ارباع عمري كان غربه واغتراب . لكن في النهاية ، وهي النهاية الطبيعة لاي شخص . ان تعود لبلدك ، او تموت وتدفن في البلد المضيف .
.....
بعد ان نقضي علي جنجويدكم ، سيكون السودان ، الملاذ ، والخيار الامن و الاخير لكل من خرج منه .
وحتي ذلك الوقت : بل بسسسسس،،،،
03-16-2025, 07:05 AM
Biraima M Adam Biraima M Adam
تاريخ التسجيل: 07-05-2005
مجموع المشاركات: 34305
هاشم كرور أنت لا تفهم في الدين ولا حتى سلوك البشر، في الدين قال المولي لا تدري نفس بأي أرض تموت. والله هو القائل أمشوا في مناكبها وكلوا من رزقه وإليه النشور ... في أي مكان مت سوف أنشر وأعود إلي الله ..
بلد فيها كيزان .. حلفت ما عايز فيها عيش ..
يا كرور، أنا بنيت لأخوانى الذين يرغبون في العيش في السودان .. وأهديت حتى بقري .. كان لدي 50 رأس بقرة حلوب .. وزعتها جت .. لكن بلد أفقرت والدي الذي كان يملك 400 رأس ويزيد، في أخر عمره .. لولا وجودي في غربتي كان أتهان وأتذل. ما جايكم حتى إهان وأذل، أنا كدي كويس .. أساعد الأهل، وأراقب تقدم أبنائي في حياتهم .. إلي أن يقضي الله أمراً كان مفعولا .. أمامى حج وعمره لكي أقضيهما .. ولدي زيارات لقارات أخري .. من أجل السياحة في بلاد الله ولو لقيت فرصة أخرج في الدعوة ..
ولو ربنا أكرمنى في حياتى الباقية، لو فيها بقية، عايز أشوف السودان بلد يحتضن جميع أبناءه مش يجيك واحد يسب خاش أبو أهلك وهو لا يعلم أكثر من أنك من منطقة كذا أو قبيلة كذا ..
أجزم ليك اليوم ليس هناك شيئ مهم في السودان .. خرابة كبيرة وموحشة .. خلينها لينكم أقعدوا أنبشوا فيها مثل كلاب الكوش ..
إذا إنتصر الدعم السريع وعادت الديمقراطية .. أنا جري جاي السودان .. وإلاً ما بيننا وبينكم الموقف العظيم يوم يجمعنا الله جميعاً .. وتسألون لماذا شردتمونا من أوطاننا، وحينها تعرفون حاجة
بريمة
03-16-2025, 07:32 AM
adil amin adil amin
تاريخ التسجيل: 08-01-2002
مجموع المشاركات: 39363
Quote: وأهديت حتى بقري .. كان لدي 50 رأس بقرة حلوب .. وزعتها جت .. لكن بلد أفقرت والدي الذي كان يملك 400 رأس ويزيد، في أخر عمره .. لولا وجودي في غربتي كان أتهان وأتذل. ما جايكم حتى إهان وأذل، أنا كدي كويس .. أساعد الأهل، وأراقب تقدم أبنائي في حياتهم .. إلي أن يقضي الله أمراً كان مفعولا ..
طيب يا بريمة ليه ما انضميت لحزبي جقود، وبقر المسيرية.(بجم) معلن في، البورد من 2005 عشان تعيد سمكرة الجنوب وترجع المسارت الرعوية لطبيعتا 24 سنة ترفس، في، الحركة الشعبية ولقيت الجنجا وقشرت بيهم ساكت يا بريمة بخصوص الحنين للوطن برنامج في، الفضائية. الصينية العربية اسمو نافذة علي الصين بتابعو لدرجة الادمان بحكي عن صينيين بجو راجعين الصين من الخارج وبمشو قراهم طوالي، ما زينا يبني بيت في، الخرطوم ويتمبل باقي عمرو من عرس لي عرس، ومن فاتحة. لا فاتحة اتخيل عالمةذرة صيني زمن ماو. لمن رجع الصين وكبر مشا قريتو عمل ليه مدرسة ابتدائية يدرس الاولاد والبنات الفيزياء والرياضيات والقرية ذاتا مدهشة فيها كل ما يحتاج الانسان الصين ملت الفجوة. بين الريف والمدينة. زمان والناس لو من الاول فهمت كلام جون قرنق 2005 نقل المدينة الي الريف وليس الريف الي، المدينة. الليلة ما كان حدس ما حدس، والخرطوم دي، بس يخلوها لي، اهلا نحن عندنا مشكلة. في، السودان لا نتعظ من فشلنا ولا نستفيد من تجارب الشعوب وعجنا السودان عجن وما تعرف، علي، شنو لو كل زول مشا قريتو وغيرا ذي، الصينيين للافضل خير له من الدنيا وما فيها والقران والاسلام حث علي ذلك ونحن بفطرتنا قعد، نسوي ده وهسة كسرة المشكلة شنو بينك، وبين الكاروري ده مقومين التراب في، البورد خلونا نهجس شوية في البوست ده ونفتحو للجلاكين above60 لو رجعت السودان تتمني، تعمل شنو؟؟؟ ووين؟؟؟ الاحلام المشروعة للمغتربين لاشيء يعدل الوطن
03-16-2025, 07:42 AM
adil amin adil amin
تاريخ التسجيل: 08-01-2002
مجموع المشاركات: 39363
العودة الى ارض حفيف الاجنحة عادل الامين - أنت يا ود مدينة البحر ده فوقو شنو والعشر القدامك ده كمان ..خاتي كرسيك كل يوم العصر تبحلق فيه من ما جيت من بلاد بره ؟!!.. نظر احمد نظرة ساخرة إلى شيخ عبد الله إمام مسجد البلدة وغريم جدته الراحلة مدينة وصديقها اللدود،بفضوله المزعج الذي يقطع حبل تداعياته،منحدرا بأتانه عبر الطريق عند المعدية التي تجلب القادمين من البنادر والخرطوم إلى الضفة الشرقية.. في طريقه إلى مزارع القرية، كانت للشيخ عبد الله والجدة مدينة فصول من المهاترات تتندر بها مجالس مروي شرق..وكثيرا ما ألحقت به مدينة الهزائم النكراء.. - يا حاجة مدينة قالو لي انت ما قاعدة تصلي..صحي الكلام ده.. - الصلعة المقابلة الحر يا شيخ عبد الله - استغفر الله..يا حاجة مدينة الصلاة تنور القبر - أنا منوراه لي شنو.. دايري اعوس فيهو الكسرة ولى اسوي الملاح.. - استغفر الله ..استغفر الله - الله يقلبك قرد..ويعبرك من لا حالتك دي يا شين يا مبدول الرجال..والله ما تمشي مني الا اجي افعاااك بي مفراكتي دي... يضحك شيخ عبدالله بضحكته المجللة ويبتعد عنها قبل أن تقذفه باسلحتها المحظورة دوليا..المفراكة ونعال القمر بوبا...كان ذلك في زمن ولى.. ***** توقفت المعدية عند البر الشرقي وتتدافع النازلين إلى البر محملين بالحقائب وإرهاق السفر والغبار أيضا..لمح احمد طيف امرأة شابة في مقتبل العمر تنزل من المعدية وتتجه نحوه..ابنة شقيقته حنان ، لقد ألف حضورها الراتب له في البلد.. وعودتها باكية حزينة بمفردها إلى الخرطوم..دون أن تقنعه بالسفر معها.. - انت يا خالو من ما جيت من السعودية..خليت الخرطوم وجيت قعدت هنا ليه؟الناس كلها جاءت وقعدت في الخرطوم..هنا في شنو - هنا في حفيف الأجنحة.. - يا خالو كلامك د أنا ما قعد افهمه.. كان احمد ينظر إليها في حنو وهي الأثيرة لديه في أبناء أشقائه وشقيقاته ثم يتذكر أيضا عندما كان يأتي من عطبرة في الإجازة لحصاد التمر،كان يقول للجدة مدينة - يا حبوبة...تعالي اقعدي معانا في عطبرة.. - يا ولدي أنا ما دايرة اقعد تحت يدين الناس - نحن ما ناس نحن اهلك.. - يا ولدي..وين امشي اخلي غنيماتي ونخيلاتي وقشي وصاحباتي عشة بت شيخ الخلوة وشنقيقية والهريسة وسكينة بت قسم الله .. وبيت جدك ده البعمروا ليكم منو تخلوهوا كلكم وتمشو ساكت .. يعوي فيه الطير... - يا حبوبة..لكن المعيشة هنا بقت صعبة خلاص وينفذ صبرها وتنبري له - يا ولدي كل زول يقعد محل يرتاح.. كل كلب يلحس جعزو .. ولها من الأمثال من هذا النوع الكثير ،كان احمد يقول لحنان ما كانت تقول الجدة بلطف - جيت ابرد اضاني من ورجغة ناس الخرطوم الفاضية.. والناس الما بتتغير ولا بتدير دي.. حنان لا تعرف ان خالها احمد كان يساري كبير من زمن الجبهة المعادية للاستعمار..ويرى اشياء تحدث في السودان لا يراها عامة الناس في الخرطوم، ومنذ اعدام محمود محمد طه في تلك الجمعة الغبراء، غادر السودان إلى السعودية ومكث فيها عشرة سنين،خمس سنوات سمان عمل كمحاسب مع كفيل لا عهد له ولا ذمة قادته إلى خمس سنوات عجاف في السجن وعودة من غربة خالي الوفاض إلى بلد تدب فيها أعراض الموت منذ فجر الاستقلال، ليجد خيام النازحين تطوق الخرطوم، التي يعيش فيها ضحايا حروب المركز، يعيشون فقط لان الموت لم يأتي بعد ، شكل له ذلك كابوس مستمر..جعله يأتي ليدفن نفسه في الرمال في مروي شرق،ارض الأجداد ويقوم بالتدريس في مدرسة القرية العتيدة منذ أيام ثورة مايو الاشتراكية ،ومعه راديو والده الراحل...انيسه في الليالي المقمرة... استقبل احمد ابنة شقيقته بحفاوة ودخلت معه إلى البيت وهي في غاية السعادة وتلوح له بصحيفة في يدها،اعتادت أن تجلب له الصحف والكتب والمجلات، ولكنها هذه المرة فجاءته بأمر عجيب -..خالو ..الخرطوم كلها تتكلم عنك!!.. - ليه ..خير إن شاء الله - طلع إعلان من السفارة الأمريكية في معظم جرايد الخرطوم فتحت الصحيفة أمامه وحدق احمد كالمشدوه..إلى صورته مع مستر هربرت الأمريكي في حدائق الرياض في السعودية..والإعلان بحضور صاحب الصورة واسمه الرباعي مع جواز سفره إلى السفارة الأمريكية في الخرطوم، لمقابلة محامي تركة المستر هربرت، الذي حضر إلى السودان خصيصا لهذا الشأن.. طاف في عقله المجهد شجون من نوع خاص،طفق يحكي لحنان القصة: عندما خرجت من السجن بعد كل تلك السنوات العجاف ببراءة..عزمت مغادرة البلاد من غير رجعة..كنت أتسوق في إحدى المولات لأخذ بعض الهدايا لكم، فجاءه رأيت سائح امريكي ضخم الجثة يترنح أمامي ويمسك بقلبه ويشير بأصبعه إلى وقد جحظت عيناه..كان يردد" داني..ابني داني..أسعفني"..تلقفته حتى لا يصطدم بالأرضية الصلبة وكان يشير نحو جيبه الأعلى..عرفت ان الدواء هناك،هذه الدول تهتم برعاياها في حلهم وترحالهم.. ولي خبرة في الإسعافات الأولية ،الرجل مصاب بصدمة سكر،أخرجت الانبولة وحقنته بالأنسولين، وجاءت سيارة الإسعاف، حتى بعد أن بدا يتعافي الرجل لتحملنا معا إلى المستشفي،هناك بقيت معه..كان يحدق في ذهول حوله ،وعندما سألته - من هو داني هب كالملسوع - انه ابني مات في حرب الخليج،عندما قصف صاروخ سكود مدينة الخبر..كيف عرفت اسمه ؟! - أنت كنت تردد ذلك وتشير إلي قبل أن يغمى عليك - من أنت ومن أي بلاد ؟ - اسمي احمد من السودان انبسطت أسارير الرجل الطيبة وفاضت عيناه الزرقاوان بالدمع - شكرا يا ابني على مرؤتك أراد أن يعطيني حفنة من الدولارات..رفضت بشمم وقلت له - نحن نفعل ذلك في بلادنا عن طيب خاطر وليس بدافع المال تكاثرت زياراتي لمستمر هربرت في المستشفي وعرفت انه، جاء إلى هذه البلاد ليعرف إذا كان تضحية ابنه لم تذهب هباء وأضحى من المهتمين في الدراسات الاستشراقية والأديان المقارنة..أخبرته عن السودان وشيوخ السودان والطرق الصوفية وفلسفة الحياة والموت عند الراحل محمود محمد طه وان الموت زيادة علم..تعلق الرجل بي كثيرا واخبرني عن زوجته الراحلة التي كان يزروها مع ابنه في مصحة لعلاج الزهايمر وعندما جاءوا بنعش ابنه الطائر..اضطر أن يخرجها من المستشفي لتحضر مراسم الدفن الجليلة وتعرف بان ابنها مات بشرف في بلد ما ن اجل نشر الحرية بالمعايير الأمريكية الفادحة الثمن ،وهذا أمر كان من الصعب إدراكه أو التواصل مع أم فقدت الاتصال بالعالم منذ أمد بعيد..وتوفت بعد عامين وضاقت الدنيا على هربرت بما رحبت وامتد شعور بالوحدة والفراغ العريض في دواخله المحطمة ،فاثر أن يقوم برحلته تلك ،في مشوار البحث عن الذات..في بلاد الأساطير وألف ليلة وليلة، وتقاطعت أقدارنا معا في ذلك ألمول..وكانت هذه الصورة التذكارية في الصحيفة وأهديته مصحف باللغة الانجليزية..قبل عودته إلى بلاده مع يقينه الجديد.." نظرت حنان إلى خالها في بشر - إذا ستعود معي إلى الخرطوم من اجل ذلك - نعم لابد من ذلك من أجلكم.. ***** دخل احمد السفارة التي استقبله كل موظفيها بحفاوة بالغة وكان القنصل المرح الذي يجيد العربية السودانية ، يتنقل هنا وهناك في حبور - مرحب بيك مستر احمد - أهلا وسهلا - أديني جوازك لحظة وحيقوم مستر جونز محامي عائلة هربرت بتسليمك الرسالة الشخصية التي كتبها ليك المرحوم ونصيبك من التركة أصيب احمد بالحزن العميق لموت هربرت، وفتح الرسالة، كانت بسيطة ومعبرة، انه مات على ملة الإسلام ويشكره على هديته القيمة وان الخمس مليون دولار له خالصة مع اقتباس من القران "وهل جزاء الإحسان إلا الإحسان..." عند الباب ودع القنصل احمد بإجلال وناوله الجواز القديم وردد في مرح - تجي تزورنا في أمريكا ؟! - شكرا يا أخي..خليني قاعد هناك بعيد..أحسن..تجينا انت وتشوف حضارة كوش وجبل البركل.يمكن انت ذاتك تخلي امريكا - أنا شفت المتحف هنا - لا هناك الآثار على الطبيعة..في الماني جانا زمان، برضه لمن مات رسل بنته عملت مشروع كهرباء قاعد لحدي الليلة في مدينة كريمة - بالله...شيء عجيب..يمكن نجي نزورك إن شاء الله خرج احمد من السفارة ووجد سيارة شقيقه حسين تنتظره - خير إن شاء الله - الناس ديل ادوني شيك بي خمس مليون دولار ما عارف اعمل بيها شنو ذاتو صعق حسين من الدهشة - بالله..سبحان الله..قصة غريبة جدا - انا ذاتي ما مصدق..المهم بخت ليكم اربعة مليون باسمك في حسابك في البنك عشان تساعدكم على المعيشة في الخرطوم وتربية الأولاد ولي باقي الاهل الاقارب..وبشيل مليون اعمر بيها المدرسة والشفخانة والمسجد في مروي.. - ايوه فكرة جيدة وصدقة جارية للمرحوم مستر هربرت - ياخ الراجل ده اسلم وتصدق سما نفسه منو - لا والله - عبد الرحمن المهدي - حتة وحدة كده..لقى الاسم ده وين ؟ - اهودا الجواب بتاعه اقراه - اكيد بكون لمن رجع امركيا ..قرا عن السودان كثير عشانك ، يا اخ الناس ديل بقدرو العشرة.. - الله يرحمه رحمة واسعة عدد السعى... وصلا إلى البيت وسط أهازيج الأهل والأقارب، و بعد عدة أيام،سحب احمد الأموال اللازمة لمشروعه الخاص..وودع الجميع وقفل راجعا إلى البلد..
******
- يا ود مدينة..قالوا لي مشيت الخرتوم في شان الامريكان نظر احمد إلى شيخ عبد الله في سخط..عند نزوله من المعدية في البر الشرقي.وامتطى الحمار الثاني الذي أعده له الشيخ وانحدرا معا إلى البلدة،
- ايوه مشيت قابلت الخواجات وادوني قروش كثيرة خلاص.. دفع بحقيبة النقود له، فتحها الرجل ولمعت عيناه جشعاً.. - القروش دي بتاعة خواجة مسلم مات .شيلا وعمر بيها المسجد المهدم ده...والمدرسة والشفخانة الفاضية دي املوها ادوية من كريمة... ابتسم شيخ عبدالله في خبث.. - انت جاسوس يا ود مدينة ..من قعادك قدام البيت و بحلقتك في البحر والشجر دي..انا عرفتك ما زول ساهل.. - ايوه جاسوس كبير والبلد ضيقة - بس يا خرابة تتجسس علي شنو في البلد المشلعة دي - قالو لي الأمريكيين اتجسس على الناس البحشو الحمير.. يبدو أن طول الأمد وضعف السمع افقد شيخ عبدالله قدراته الخاصة وقواعد الاشتباك.. - قت شنو ..البحشو التمر ؟؟!! - لا يا حاج البحشو الحمير عديييل كده..ياخ البنيكو الحمير ..بقيت ما بتسمع ولى شنو!!..لأنه حش الحمير في مروي بوسع ثقب الأوزون في القضارف.. وينشف ابيار النفط في هجليج... انفجر شيخ عبد الله ضاحكا بصورة مجلجولة ، كاد أن ينفجر قلبه منها ويسقط من أتانه المكتنزة .. - الله يجازي محنك يا ود مدينة...والله من ما ماتت حبوبتك مدينة الدنيا ذاتا مسخت لي وما ضحكت ذي الليلة..والله غلبت عمك تب... افترق الرجلان والشمس تشارف على الغروب، وقفز احمد من الحمار حاملا الحقيبة الأخرى وتركه يلحق بأتانه التي يمتطيها شيخ عبد الله ..واتجه نحو البيت الخالي، دخل إلى الداخل ووضع الحقيبة في الغرفة ثم حمل العنقريب إلى الحوش ووضع الراديو جواره في المنضدة وكوب الماء..واستلقى يحدق في السماء والقمر البازغ في الأفق الشرقي وتداعي إليه ضحك أهل البلدة من بعيد..الذين يمر بهم شيخ عبد الله ويحكي لهم آخر سجالاته مع ود مدينة...وسكنت الكائنات أخيرا، إلا من ذلك الحفيف...حفيف الأجنحة الذي ما بارحه منذ طفولته البعيدة ، عندما كان يشعر بتلك القوة الغريبة التي تشده إلى الشمال((يا لارض حفيف الاجنحة التى فى عبر انهار كوش المرسلة رسلا فى البحر فى قوارب البردى على وجه المياه ، اذهبوا ايها الرسل السريعون الى امة طوال جرد الى شعب مهاب اينما كان ، الى امة قوية جبارة الخطى تقطع الانهار ارضها .
يا جميع سكان المسكونة وقاطنى الارض اذا رفعت الراية على الجبال فانظروا ، و اذا نفخ فى البوق فاسمعوا ، لانه هكذا قال لى الرب انى اهدا وانظر من مسكنى كالحر الصافى على البقل ، كغيم الندى فى حر الحصاد ، فانه قبل الحصاد عند تمام الزهر وعندما يصير الزهر حصرما نضيجا يقطع القضبان بالمناجل ، وينزع الافنان ويطرحها ، تترك معا لجوارح الجبال و لوحوش الارض ، فتصيف عليها الجوارح وتشتى عليها جميع وحوش الارض .
فى ذلك اليوم تقدم هدية الى الله رب الجنود من شعب طويل واجرد ، و من شعب مخوف منذ كان فصاعدا ، من امة ذات قوة وشدة ودوس قد خرقت الانهار ارضها ، الى موضع اسم رب الجنود جبل صهيون )) ((اشعياء 18 .)).....
🌴🌴🌴🌴🌵🌵🌵🌵🌵🌵🌵🌴🌴🌴🌴🌴🌴 من مجموعة حفيف، الاجنحة منشورات دار سندباد، المصرية2012 كسرة دي كتابات نوستالجيا زمان في، ريف اليمن لمن يمسكنا الارو وهسة مسكنا تاني... والبلد ما عايز، يرسا علي بر والعاقبة للمتقين
03-16-2025, 10:48 AM
Biraima M Adam Biraima M Adam
تاريخ التسجيل: 07-05-2005
مجموع المشاركات: 34305
Quote: اتخيل عالمةذرة صيني زمن ماو. لمن رجع الصين وكبر مشا قريتو عمل ليه مدرسة ابتدائية يدرس الاولاد والبنات الفيزياء والرياضيات والقرية ذاتا مدهشة فيها كل ما يحتاج الانسان الصين ملت الفجوة. بين الريف والمدينة. زمان
بالمناسبة أنا عدت وأنا شاب، في 1994م وهؤلاء الكيزان موجودين. ذهبت رأساً إلي القرية، أشتريت حمار ريفاي (حمار أبيض، في حقيقة الأمر أخضر، لكن هنا يسمونه حمار أبيض)، وعملت له فرش وثير .. وهناك سوقين أثنين جوار القرية، غربها وشرقها، أشتري من السوق في غرب المدينة بقر وهذا يسمى سوق الحاجز .. مسقط رأس د. حامد البشير إبراهيم، حاكم أقليم جنوب كردفان الأسبق في عهد حكومة حمدوك، وقرية ناس حمدوك فركة كعب جنوب السوق .. أشتري يوم الجمعة ما بين 30 رأس - 35 رأس .. ثم أسلمهما يوم الخميس القادم إلي تجار يأتون من الأبيض وكوستي .. يمشوا وفي الأسبوع القادم يأتوا ويسلمونى القروش وأسلمهم البقر الجديد. في زمن ما في سيولة، أنا حركت كل سوق الحاجز وهذا ثانى أضخم سوق للماشية في غرب السودان وأكبر سوق للضأن الجمال في كردفان. الناس لما بقوا يقول التاجر بريمة يديك بقر مجان فقط بكتابة تعهد وإلتزام ..
أنا أستثمرت في أهل القرية، بعضهم عملتهم رعاة وأخرين يسوقون الماشية وأخرين يسقوا ويقوموا بالعلف .. لم تمض 6 شهور حتى تخاسس عليّ الكيزان .. جونى: يا شيخنا يا شيخنا .. ممكن تجي، جرونى جنبة .. قالوا تدفع نصف قيمة ضريبة البيع والشراء أها النصف الأخر، قال تسلمنا له كاش!! .. طيب، أضمن كيف يذهب إلي خزينة المحلية؟ .. قالوا دا السبب ذاته أنت خربت شغل المحلية .. ككيف؟؟ الأمر، عايزين يأكلوا قروش البلدية علي ضهري ..
لو صبروا سنة واحدة كان عمّرت القرية والأسواق .. مع وجود أرباح كبيرة، أنا قاعد نبيع ونشتري ما يعادل 120 رأس في الشهر الواحد، ودي البداية فقط .. وضعت خطة لتربية 3 آلاف رأس من العجول في السنة بصورة مستدامة (الكيزان) في الأبيض حجزوا جنسيتي وأوراقي الثبوتية بغرض معرفة التمويل .. وقالوا إلا يشتركوا معى وإلا ما في طريقة لأنهم لا يعرفون عواقبة هذه التجارة .. فهم يريدون التصدير يتم بقنوات معينة .. وبدأت اللولوة. أخرتها، قلت لهم نو .. حرام أساعد في الفساد ومن هناك صرت هدف للأبتزاز .. صفيت التجارة ورجعت أوروبا وديك الطشة ..
تخيل لو كنت قاعد مستقر حتى الأن، يكون عملت حظائر تربية للأبقار والأغنام والدواجن وغيرها (كنت جادي في إعادة تربية الحصين .. وكان ساهل جداً أسهل بالنسبة لي من تربية البقر)، كنت ح أسلم أي زول في القرية راغب حصان وكارو فقط مقابل الشراكة في العائد .. أو الشراء منى عن طريق أقصاد .. وأنا عارف الناس ح تتزاحم لإمتلاك حصان وكارو ..
وأنا مساهم في الإرشاد الزراعي في زراعة الخضروات في المنطقة ما نسميه بالموسم الشتوي .. الأن سوق الموسم الشتوي أصبح لا يقل عن محصول فصل الخريف .. ولليوم الكيزان لا يعرفون كيف طورناه.
الأن العمر مشي وعلينا أن نعود إلي الله ونستمتع قليلاً بأرض الله نمشوا في مناكبها (سياحة) ونتفكروا في ملوك السموات والأرض .. لعلنا نصل لشيئ فيما تبقي ، الأن أنا قادر أعمل أي شيئ في مجالات عدة .. لكن لن أعمل أقعد أورم الكيزان ورم هكذا ..
بريمة
03-16-2025, 12:07 PM
adil amin adil amin
تاريخ التسجيل: 08-01-2002
مجموع المشاركات: 39363
كل الناس المبدعين اصطدمو بي المؤدلجين وبضاعة مصر الخايسة في، السودان السودان عايز، تنظيم ومؤسسات وادارة موارد ومشورة شعبية وقانون زي، ما خلوهو الانجليز هسة انا بس منتظر الرفس، ده بنتهي، والصين قريبة نجي نوريهم كيف تنهض الشعوب والدول بالبور بيونت وندي الشباب جرعة جديدة من حسنين والنظافة اكيدة يا بريمة من راحت مؤسسة تسويق الماشية واللحوم وجات الراسمالية الطفيلية الخليجية السودان قنعت من السودان وعرفت. مالاته والله فعلا السياحة في العالم والبحث عن الحقيقة كويس امش الصين..... جرب كرنفشويس كمان.
03-16-2025, 01:38 PM
Biraima M Adam Biraima M Adam
تاريخ التسجيل: 07-05-2005
مجموع المشاركات: 34305
Quote: والله فعلا السياحة في العالم والبحث عن الحقيقة كويس امش الصين..... جرب كرنفشويس كمان.
لا لا .. الحقيقة الدينية نحن المسلمون الحمد الله نمتلكها .. لكن هل نستطيع أثباتها للعالم، أنا أفتكر هناك نفاج للتغير العالم .. في عام 1996، قبل عام من هجرتي للولايات المتحدة .. كنت مع فريق بحث مع بروفسير كونستانتينوس بانيتوس (الأسم دا صعب لكن قول "بروفسير كوستا" .. التيم مكون من طلاب و3 بروفسيرات بما فيهم أستاذي المذكور والمنطقة التي ذهبنا إليها والوقت كان شتاءً والمنطقة هى منطقة جبال "برتولي" في اليونان وتقع في أقليم "سيساليا" في أقصي شمال غرب اليونان علي مقربة من مكدونيا وألبانيا .. نحن جايين من شمال اليونان أقليم "ماسدونيا" وهو المعرف في الكتابات العربية ب "مقدونيا" .. الجليد قفلنا 7 أيام بعد ما خلصنا من جمع المعلومات البحثية من التجارب العلمية علي رأس الجبل. أقترح البروفسير، أن يقيم كل واحد من الباحثين محاضرة لا تخرج من الأبحاث لكن لديه كامل الحرية في تقديم ما هو مختلف نوعاً مما كنا نعمل فيه .. وأختارنى كأول محاضر .. أو قول مقدم أول ندوة .. ونحن نبحث في كيفية إستغلال التنوع الجينى في النبات لتحسين الأنتاج ..
أنا أخترت موضوع "البك بانق وكيف أنتج الخالق أصول الأنواع" .. Big Bang and How God Created Species .. طبعاً الندوة مخالفة تماماً للانتخاب الطبيعى الذي يؤمن به كل البروفسير بما فيهم المرحوم المغربي الاصل العلمانى حسن حجاجو .. البروفسير علق علي العنوان "أننى أنتظر بفارق الصبر ليوم غد" .. أها أنا عارف أنا أستاذهم في الأحصاء ما يسمى بال Biometrics .. وجيت أحسب لهم إستحالة عدم تكون ال DNA وإحتمال تكون مثل mRNA و tRNA ومساءل مثل Gene Translation or Transcription .. "الأحتمالات" غير منطقية .. ولا يمكن تصورها ذاتو .. إلاً بأفتراض وجود خالق ..
تمينا حوالي 5 أيام، ما في بروفسير يستطيع يعمل ندوة والطلبة المسيحيين مصرين يصلوا لخلاصات دينية .. طلعنا من البحث العلمى .. جزء مقتنعين تماماً أن الله هو المدبر وراء كل خليقة .. أنا والطلبة المسيحين (أرثوذكس) صف واحد .. كل البقية صف أخر بما فيهم حسن حجاجو المغربي .. كسرنى كسير مبالغ كاد أن يطردنى من الجامعة بأننى أؤمن بالخرافة .. في نهاية المطاف البروف حسم الجدال: "قال إنى سعيد جداً رغم التباين في الأراء أنى أري باحث قدير في الدفاع عن أراءه، وقال منذ اليوم كيفما بدأت بداية الأنواع علي نهج أدم (شخصي اضعيف) الذي يستلهم خالق، أو علي نهج حسن حجاجو الذي يستلهم الطبيعة التى أتت بذلك، فإن أبحاثنا بدأت من نقطة تفرع الأنواع وتنوعها فيما بينها أو في داخلها بحثاً عن أفضلها" ..
وسبحان الله حسن حجاجو والبروفسر الاخر قالوا للبروف الكبير أنه ترك الباب مؤارباً في مسألة وجود خالق، مما جعله يستدرك ويقول: "إننى أؤمن بالعلم فقط، وماذا يقول العلم أتبعه دون تصعيب الامر وترك أمر الكنسية للقساوسة" ..
هذا الجانب لولا المعايش كان يكون مدخل دينى رهيب للدعوة .. لكن المعايش جبارة لم أتقدم أكثر في ذلك ..
حسي أترقبوا ممكن أظهر ليكم في نقاش أو أبحاث .. ممكن تصدع رؤوسكم في جانب علاقة الدين بعلوم الفضاء .. ما عايزين نجبر الناس للدين مثل الكيزان المخربيين .. عايزين الناس يأتوا إلي الدين وهم مقتنعين بذلك ..
عشان كده اقول للرئيس ترامب .. نحن جئنا أمريكا ليس بحثاً عن لقمة عيش (طبعاً الكلام دا الله يعلم، ليس بحقيقة، نحن دايرين دولارات خضر عدييل) لكن جئنا بحثاً عن فرص لتطوير الحياة الغربية نفسها ..
بريمة
03-16-2025, 02:43 PM
adil amin adil amin
تاريخ التسجيل: 08-01-2002
مجموع المشاركات: 39363
Quote: حسي أترقبوا ممكن أظهر ليكم في نقاش أو أبحاث .. ممكن تصدع رؤوسكم في جانب علاقة الدين بعلوم الفضاء .. ما عايزين نجبر الناس للدين مثل الكيزان المخربيين .. عايزين الناس يأتوا إلي الدين وهم مقتنعين بذلك ..
عشان كده اقول للرئيس ترامب .. نحن جئنا أمريكا ليس بحثاً عن لقمة عيش (طبعاً الكلام دا الله يعلم، ليس بحقيقة، نحن دايرين دولارات خضر عدييل) لكن جئنا بحثاً عن فرص لتطوير الحياة الغربية نفسها ..
طبعا الاستاذ، محمود قال التحدي الذي يواجه الاسلام في، القرن العشرين العلم وليس، العقيدة وعمل محاضرات مهولة. عن كل دقايق الحقايق في، الكون اذا اتحررنا من اصر الايدولجيات ممكن ننطلق من منصة محمود، محمد طه اتواصل مع جمهوريين في امريكا، وشوف قروبات الواتس بتاعتم تلقي فيها عصف فكري كوني. كبير دي البداية في، الاتجاه لصحيح ثانيا الاطلاع علي، الصين الروحية مهمة جدا الكونفوشية. عقاب رمضان ده شوف قرووبات الجمهوريين
03-16-2025, 03:16 PM
Biraima M Adam Biraima M Adam
تاريخ التسجيل: 07-05-2005
مجموع المشاركات: 34305
Quote: تلقي فيها عصف فكري كوني. كبير دي البداية في، الاتجاه لصحيح ثانيا الاطلاع علي، الصين الروحية مهمة جدا الكونفوشية. عقاب رمضان ده شوف قرووبات الجمهوريين
الجمهوريون دورهم في الغرب وتأثيرهم ضعيف جداً .. لأسباب، ما برع فيه الفكر الجمهوري في السودان هو علوم الأجتماع مسألة الدفاع عن الحريات والحقوق المدنية .. لكن أنا عايز الدين كمدخل للعلوم البيولوجية وعلوم الفضاء .. مختلف تماماً عن فكرهم.
الكيزان ما عندهم ولا التكتح .. قاعدين هنا وقلوبهم علي سرقة المال من السودان، يفتحوا حسابات بنكية ويتاجروا في تحويل العملة .. غسيل أموال يزكم الأنوف جاري في أمريكا. الأنصار والختمية مستضعفين، جاريين في أكل عيشهم بالحلال .. يعنى جاءوا وطوالي أنضموا للطبقات الفقيرة ..
المرأة السودانية جارية خلف الجمال ومستحضرات التجميل والتياب والأثاث والحفلات .. تفاخر جد، ما في أمرأة تلبس توب مرتين لتظهر في الحفلات به.
الواحد يجب أن يكون أبو ذر الغفاري في أمريكا لكي ينجح ..
بريمة
03-16-2025, 09:45 PM
adil amin adil amin
تاريخ التسجيل: 08-01-2002
مجموع المشاركات: 39363
اكثر من 100 تسجيل للاستاذ، موجودة في الواتس الجمهوريين بعرفو الداروينية والنسبية وكل، العلوم النظرية والتطبيقية وعندهم كنز، معرفي، كبير، نبذوه وراه ظهورهم وسايرو. القحاتة الفاشلين واشتغلو بتراهات الكيزان. زمان في، اليوبيل، الذهبي، لجامعة الخرطوم نظمنا ندوة عن الدارونية والاسلام باشراف د فتحي، الربعة وجبنا دكتور، عمر القراي، واخو مسلم وسلفي، في، الندوة ولمن انتهت الندوة ناداني دكتور، الربعة قال، لي الكلام القالو دكتور، عمر القراي ده ياهو العلم عدييل وارقي، تعريف لنظرية داروين والتطور اها شوف د عمر من 1986 لو مشا في، الاتجاه ده عالميا بعد، مشا امريكا والله كان اخذ جايزة نوبل للاحياء وبعد الندوة دكتور، فتحي، كان بحضر اركان الجمهوريين وهسة ما عارف خبره شنو كان دكتور عبقري، وذكي، ومتواضع جدا كنا نجله جدا جدا واتخيل بعد جات التسعينات جلدو دكتور فاروق محمد ادم لانه بدرس نظرية داروين. والجلدو منو د نافع علي، نافع دكتور في الزراعة. ورسالته المشهورة في الاسافير ل عمر، اابشير قاعدة. وقصته مع بيوت الاشباح. يا بريمة. ما في زول زي، بعرف ملاعين والديهم الكيزان مرقت خليت ليهم السودان من جو وبطني، طامة لحدي هسة منهم ارمي طوبتم بس، فعلا ما عندهم مخ بتعريفة. زي، ما قال عليهم كوباني، ما في كوز، كويس غير الكوز الميت والكوز المربوط في، الزير المهم عولمة الفكرة الجمهورية ده رصيد، السودانيين القادم وانت خليك علمي، ما اطلعت علي، كل، ما قاله الاستاذ، محمود، وكتبه ما تفتي في، امر الفكرة الجمهورية
06-07-2025, 05:06 PM
adil amin adil amin
تاريخ التسجيل: 08-01-2002
مجموع المشاركات: 39363
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
adil amin
Biraima M Adam
Hasheem Karouri
فيس بوك
تويتر
انستقرام
يوتيوب
بنتيريست