سلام أول حاجة أعزيكم وأعزي نفسي وكل المتطوعين في سودانا دا سواء متطوعين في مبادرات أو غرف طوارئ أو تكايا و مستشفيات في وفاة الشهيد أخونا ورفيق دربنا #الصادق_حيدر "حديدة" 1 وأعزي قبل الجميع، أسرته المفجوعة، وأسأل المولى عز وجل أن يلهمهم الصبر والسلوان.
ثانياً، يوم امبارح كان يوم صعب وثقيل على أسرة النو وعلى قلبي البموتو ديل رفاق لكن زي #اولادي ، الحصل دا لسة ما قادر استوعبو او اتعامل مع مشاعري فيه. بس مضطر هسي اتسامى فوق التشويش والألم دا واضع ما يمكن من النقاط فوق الحروف عشان شغلنا ما بيستحمل وقفة (الليلة الساعة 10 صباحا مشيت للمستشفى) انا متفهم جميع الدفوعات، متفهّم دوافعي تحت تأثير الحزن والصدمة و اني داير اسلط الضوء علي الاعمال الارهابية دي و نلقي تضامن من العالم زي غزة الحاجة دي مجدية(اتذكرو قصة شارون و عمنا الكبير الشايب اب دقن) 2 ، ودوافع القوات النظامية تحت تأثير الحس الأمني ، ودوافع أصدقائي وحتى الغرباء اللي استنكروا الموضوع وتضامنوا معاي.. كل طرف انطلق من دوافع سليمة ومفهومة بالنسبة لي. حتى ولو بدى أنهم مختلفين بس الأعمال بالنيّات. الدافع الوحيد اللي ما قدرت ولا حاقدر أفهمه هو دافع تدوين على مستشفى يمثل ملجأ اخير لمرضى ومصابين وأطفال ومسنين من المدنيين العزّل (ناس اتصابو بعيد و جو طلبا للحياة و العلاج تقوم تقصف مستشفى و تقتلهم دي جريمة حرب) ثالثاً، والأهم.. It's not about me.. بباقي القدرة الفيني عايز اذكر نفسي واذكر الجميع، نحن هنا شباب وشابات و متطوعين بنعمل في شنو؟ وعشان منو؟ النو لسة محتاجة ايادي، والشعب لسة في خضم المعاناة.. ولسه محتاج وقفتنا كلنا بي مالنا و جهدنا البدني و اليدوي و زمنا و تبرعنا بي دمنا أنا نفسي دي وهبتها للّه و للشعب و لقضية التغيير و الإصلاح و لي بلد يحكمها شعبها ، ولو في زول عنده على مأخذ او عتاب، بطلب منه بكل أدب وصدق، إما السّماح، او أنه يأجل النقاش لوقت أفضل، لو ربنا أحيانا بنتناقش لغاية ما نتصافى عموما القصد اطلاقا لمن يكن اذية اي زول (بما فيهم #نفسي اتخيلو اصحح لي محل انا موجود فيهو و قاعد في الحوش بتاع المستشفى و لا حتي محتمي بالمبني المحصن بي كذا طابق) . هسي الافضل نركز مع أهلنا الما عندهم غيرنا ديل.. الوضع حقيقة لا يوصف، لا بكاميرا ولا كتابة ولا حتى بالخيال (اتخيلو لدينا كيس اشلاء من تدوين صابرين الماتو فيهو 55 نفر ما عارفين هل فيهو 3 أشخاص كبار و لا سبعة اطفال صغار وفقا لكمية الاشلاء ) الوضع مأساوي و كارثي و محتاج تسليط ضوء و ادانات للمليشيا و إعلام و تضامن وتوحيد شعارات و هاشتاقات ونتحدي سلاح بسلاح
ربنا يكرمكم، وشاكر ليكم جداً.
واللهم عفوك ورضاك ورحمتك ورفقك بالشعب السوداني الطيب الصابر الذي فرضت عليه الحرب و خسر فيها كل ما يملك و يارب تقيف و تنتهي و تنتصر ارادة الشعب
مؤمن ود زينب ود أحمد
02-06-2025, 00:25 AM
Nasr Nasr
تاريخ التسجيل: 08-18-2003
مجموع المشاركات: 11355
عاطر التحايا وجميل التضامن معكم يا مؤمن ومع كل المتطوعين في المستشفي وكذلك المرضي والعاملين فيه الناس البيقصفوا مستشفي النو، فرقهم شنو من الإسرائيلين البيقصفوا مستشفيات غزة ؟؟؟؟؟ ديل مسلمين وبيقصفوا في مسلمين فيهم مرضي ومتطوعين وأطباء وعاملين ؟؟؟؟؟ أستهدوا بالله وشوفوا كلام الزول متسامح ومتفهم قدر كيف؟؟؟ لماذا لا تتعلمون ولو تذرا يسيرا منه ؟؟؟
02-06-2025, 09:35 AM
nazar hussien nazar hussien
تاريخ التسجيل: 09-04-2002
مجموع المشاركات: 10490
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير ابو الزهراء
Nasr
nazar hussien
فيس بوك
تويتر
انستقرام
يوتيوب
بنتيريست