الكوز لما يقول الشعب السوداني تأكد تماما انه يقصد افراد عصابته الكيزانية او بمعنى ادق الفصيل الذي ينتمي اليه من هذه العصابة لانها الان منقسمة على نفسها ومتعاركة حول غنائم حرب هي فيها مهزومة حتى الان!
الكوز المهزوم يتوعدني في صفحتي المتواضعة هذه: كدي ارجعي السودان! الشعب السوداني دا تاني ما بقبل بيكم في البلد دي! ما حتقدروا تواجهو الشعب دا! واكبر فيلسوف فيهم يقول التسامح مطلوب لو الشعب السوداني سامح القحاتة وناس تقدم ممكن يرجعوا السودان هههههههههه!
لن اسأل الاسئلة المنطقية على شاكلة ما هي مشكلة الشعب السوداني مع مدنيين عزل ظلوا ضد خيار الحرب وحذروا منها وبعد ان اندلعت طالبوا بايقافها لان المتضرر الاكبر منها هو الشعب السوداني؟
هل الشعب السوداني غشيم لدرجة تصديقه ان الدانات وحمم النيران والرصاص الذي احال حياته الى جحيم يأتيه من دور الاحزاب السياسية ومن كتابات رشا عوض؟
هل الشعب السوداني عبيط ومتخلف عقليا حتى يمجد الاطراف العسكرية التي تتقاتل صراعا على السلطة وسط مدنه وقراه بالدبابات والتاتشرات والمدفعية الثقيلة والطيران ويعفيهم من اي مسؤولية عن هلاكه ويتوجه باللوم الى ناس مدنيين لم يرفعوا عليه عكازا او عصا بل انصب جهدهم على ايقاف الحرب واحلال السلام!
من حق الشعب السوداني ان يكون له رأي سلبي في الاداء السياسي للقوى المدنية ولكن لا يمكن ان يفقد الشعب عقله وقدرته على التمييز ويخلط الامور لدرجة ان لا يلوم الاطراف المتقاتلة التي اشعلت الحرب ويلوم اناسا اخرين- مهما كانت درجة اختلافه معهم- لا علاقة لهم باشعال الحرب بل هم دعاة سلام بحكم ان السلام هو شرط وجودهم وفاعليتهم السياسية!
الشعب السوداني حاشاه ان يكون بهذه الغشامة والبلادة والظلم كما تريد له الابواق الكيزانية المنحطة!
ولكن بعيدا عن ذلك كله، انت يا كوز قبل ما تطرد الناس من السودان موش واجب عليك تسيطر على كامل الاراضي السودانية؟ بصراحة منظرك مضحك جدا وانت بتطرد الناس من بلد انت ذاتك مطرود من الجزء الاكبر منها ! معقول اثناء ما انت جاري من الدعامة بدل ما تقول للدعامة اصبروا لي انا راجع ليكم عشان اقلع منكم الولايات الطويلة العريضة دي وما بخليها ليكم ، تقوم تقول اصبروا لي يالقحاتة انتو ما حترجعوا السودان! ياتو سودان ؟ لازم تحدد لانو السودان هكذا المعرف بالف ولام التعريف اكثر من نصفه خارج سيطرتك وما عندك حكم عليه واي حكم طرد يصدر منك هو مثل طلاق رجل لامرأة ليست في عصمته اساسا!
انت اقصى انتصار بتقدر عليهو هو الاستيلاء على مساحة جواز سفر حنان حسن! يا عيب الشوم!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Nasr
فيس بوك
تويتر
انستقرام
يوتيوب
بنتيريست