كتبه محمد عكود وجعني في الجيش لمن الجنجويدي رفع كلاش عسكري وقال بتهكم : دا سلاح دا .. وكان عندو حق .. لانو الكلاش الرفعو في ظني سلاح تعليم ما بينفع الا لو للبيادة .. ناهيك عن انو تدي لمقاتل في معركة
وجعني في الجيش العسكري الشايل بصل في جيبو .. وجعني شديد والله
ووجعني اني عارف ان ميزانية الدفاع من الميزانيات المفتوحة والاتقلعت من ميزانيات الصحة والتعليم والطرق وخلافه
ووجعني اني عارف وشفتا وعشتا مع عساكر بشيلو السلع من الخدمات الاجتماعية بالقسط عشان يبيعوها بالكسر برا عشان يتصرفو ويصرفو اولادهم
وجعني وانا في المظلات جبل اولياء الفرقة التاسعة المحمولة جواً في بواكير الصبا .. وصولات ورقبا اوائل بجو يحشو لاولادهم سندوتشات المدارس من فطور المستجدين ويلقطو بواقي العيش في اكياس يشيلوه معاهم البيوت في الوقت الشوية صعاليك اسمهم منسقين وتوجيه معنوي سايقين احسن عربات في البلد وفطورهم سمك من سوق الجبل يوماتي
بوجعني جدا وانا شايف الجيش كل عسكري لابس مموه شكل براهو .. لدرجة للمابعرف الحاصل حيظن ان الجنجويد هم الجيش النظامي والجيش هو المليشيا من شكل اللبس والانتظام الكامل
وجعني للجيش وهو ماعندو منصة اعلامية موثقة وااحدة ومخلي شوية تافهين لابسين رسمي يتكلمو بأسمو .. ويكرهو الناس فيهو اكتر واكتر .. لانهم مقدمين الانتماء للحركة الشيطانية قبل الانتماء للصرح العظيم اللابسين المموه حقو وحتى على الانتماء للوطن
في جيش في مخيلتنا .. نواتو كانت قوة دفاع السودان في كرن ومصوع والمكسيك والكويت وأرضاً ظرف .. والغنت ليهم الفلاتية يجو عايدين بالمدرع والمكسيم يا الله الخبرا المهندسين يا الله .. وفي جيش في الواقع .. اللاقادرين نكرهو لانو مننا وفينا ولا قادرين نحبو لانو الانجااس اخوان الشيطان هدوهو وحولوهو لسوط يجلدنا كل ما سمعو لينا صوت ووزعو رتبو على اليسوا والمايسوا .. لكن بنشفق عليهو وبنحزن جدا والله من حالو الوصل ليهو .. ولما نتكلم .. كانو بسمونا الخوناا العاوزين يفرتكو الجيش .. وبياخدونا بعلو الصوت .. وهم حتى مابصرفو ليهم لبس منتظم الا لو في استعراض عسكري
كل الافكار والاحاسيس دي داهمتني وانا قاعد في سموم بعاين لسقف بنزل موية وكهربا قاطعة وبغالب والله في دموعي .. وبفكر في كم التاتشرات والمدرعات والطيارات التم تدميرا .. قروشا كان ممكن توصل كم نهر صناعي لبورتسودان من النيل وكان ممكن تبني كم مدرسة ومستشفى .. ومحطة كهربا وموية في كل السودان
لعنة الله علي الكيزان مدمري الجيش .. صانعي الجنجويد لعنة الله عليكم وعلى ذرياتكم وعلي الارحام المتقيحة الشالتكم الى يوم يبعثون وحسبنا الله ونعم الوكيل
اللهم إليك نشكو ضعف حيلتنا .. وهواننا علي الناس يا الله اللهم ارنا فيهم عجائب قدرتك يا الله
07-08-2024, 11:26 PM
Mohamed Adam Mohamed Adam
تاريخ التسجيل: 01-21-2004
مجموع المشاركات: 5585
فقط أزعجك إستهتار "الجنجويدى"بسلاح الجيش الصدئة، ولم يزعجك عندما قاموا، بحبس قيادات الجيش: البرهان، الكباشي، ياسر العطا، طارق كيجاب.. وهربوا من الخرطوم لينزحوا ببورتسودان(اول مرة يحدث هذا بتأريخ الحروب كونة حكومة تهرب وتنزح من مقراتها.ثم، أسروا مفتش الجيش ومعه عدد كبير من قيادات الصف الأول والثاني. وأسقطوا حاميات وولايات بأكملها، وتسببوا في نزوح عدد كبير من الجيش خوفاً "أحمر" من"الجنجويد"، حيث سلموا أسلحتهم "الصدأة" لدولة تشاد ودولة جنوب السودان. كما أسقطوا العديد من الطائرات الحربية واستولوا على كمية هائلة من عتاد الجيش. كل هذه الإهانات لم تزعجك، ولكن أزعجك استهزاءهم بكلاشنكوف لأبلدة أم قاس..!!!!
07-09-2024, 05:35 AM
عبدالرازق يوسف الحاج عبدالرازق يوسف الحاج
تاريخ التسجيل: 06-19-2017
مجموع المشاركات: 371
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبدالرازق يوسف الحاج
Mohamed Adam
فيس بوك
تويتر
انستقرام
يوتيوب
بنتيريست