قول لي يا حبيبي إيه أعمل معاك؟ ولّ اسيبا مدني وأجي أسكن حداك؟ دي قصيدة في شكل ونسة كتبها الشاعر الوناس، المثقف الكبير، رئيس تحرير صحيفة الصحافة؛ فضل الله محمد من أولاد مدني وعشاقها، قصيدتو الفوق دي أداها لود مدني الفنان محمد مسكين، القصيدة اتلحنت بلحن فريد لمان تسمع الصفارة ومحمد مسكين يستجدي؛ قول لي يا حبيبي أنا حيران معاك؛ الحنين والحب يقد صدرك. نسج غيرها أغاني كثيرة بنفس السهولة وطريقة الونسة والأغاني الحلوة كلهن أداهن لأولاد مدني محمد الأمين وأبو عركي.
قاعدة واحدة جنبو في بص سفري وعاملة تقيلة قال ليها؛ ساعة مرت وأكتر وأنتي مشغولة بالجريدة؟! عايز أقولك ولّ سيبك أقري أحسن عليكم الله، كلمة سيبك وأسيبا غير فضل الله في زول قدر ينقلها من الونسة للغناء؟! نحن لمان نقول ليكم أي زول ما من مدني ولّ قرأ في مدني أو عاش شوية في مدني، ما قاعدين نعترف بيهو حتى لو نقطا، تعبير لو منقطا دا جاي من وين؟ بكون من زمن الحجاج المهم، نرجع لحبيبنا فضل الله واصل قال ليها: سارحة ما لك؟ يا حبيبة ساهية وأفكارك بعيدة بتقري في إيه؟ كلميني يا سلام! يعني لازم تقري هسّ مقال بحاله؟ أو قصّة كاملة؟ عندي ليك خبر أهم؛ جايبو بأشواق شديدة فتشو القصيدة أو اسمعوها مرتبة تلقوها ونسة بس الفرق بين الوتسة العادية ونسة فضل الله إنو فضل الله رقيق ومن مدني.
واصل مع محمد الأمين وأداهو زاد الشجون، وكلام زعل انت ما بتقصدو، وأشوفك بكرة في الموعد تصور روعة المشهد، وقالوا متألم شوية يا أخي، بعد الشر عليك والله ما صابرين دقيقة حتى من مرضك نغير زول بقدر يونسك ويكفر ليك ويحبك ويغني ليك وبعد دا يقول ليك حتى من مرضك نغير ما بتقوم تترب؟ لو زول غنى ليك كدا؟ وبعد داك أدى أبو داوود أغنية بس كدا نظام ما يقولوا عليهو جهوي، أداهو؛ في حب يا أخوانا أكتر من كدا؟ وكانت ونسة بوعدك يا ذاتي يا أجمل حبيبة بكرة أهديك دبلة الحب والخطوبة من نصيب الزعيم أبو عركي.
عليكم الله، يا أخوانا، مدني السني موش لينا حق نزعل منو؟ بعد أولادو الحلوين قالوا الكلام السمح دا كلو، يجي يسمح للتتر يحتلوا القبّة ويقعدوا في حديقة كعكاتي؟! روحي ليه مشتهية ود مدني؟ الله يرحمك يا فضل الله والخليل
06-01-2024, 09:42 AM
بدر الدين الأمير بدر الدين الأمير
تاريخ التسجيل: 09-28-2005
مجموع المشاركات: 23395
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أبوبكر عباس
بدر الدين الأمير
فيس بوك
تويتر
انستقرام
يوتيوب
بنتيريست