ونسجد للكريم شاكرين ونطوي عتمة الظلمات

Quote: ●واحد رسل في قروب قال بيتخيل إنه بكرة نودع شندي وعطبرة وكسلا ودنقلا وسنار والأبيض ونتجه نحو الخرطوم تغمرنا الفرحة ومطار الخرطوم طيارة هابطة .. في كل نصف ساعة والبوري والفرحة والزغاريد بالعودة ..!! رد ليه واحد وقال : ●خيالك بكرة يتحقق وتنجلي للمحن صفحات•• ونسجد للكريم شاكرين ونطوي عتمة الظلمات•• ونصبح للبيوت راجعين وتبقى الفرحة ياها الجات•• نودع عطبرة وشندي تكون السيرة بالبصات•• ونترك في جبل توتيل صور للذكرى منحوتات•• ونرحل من قضارف الخير ونرفع للنصر رايات•• وفود العودة من بارا تغني عليها حكامات•• وطبل العز يدق في ام در .. وترقص بحري في شمبات•• وتمرق في الضحى الخرطوم تقالد في الوفود الجات•• ونعرف حكمة النيلين وكت اتلاقو منسجمات•• وشوق الأزرق الدفاق وسر جريانو في الفلوات•• وقدلة أبيض النيلين شموخ ومهابة عز وثبات•• نكبر نحن فرحانين نغالب نحبس الدمعات•• ونتقالد نبل الشوق بدون ما تطلع الكلمات•• ونفتح نحن باب البيت نقيف قدامو كم ساعات•• يقولو ادخلو خلو الفات•• ويقروا آية الكرسي وسورة الناس وكم آيات•• ينبهو فينا براحة واوع تحركو الحاجات•• وما تندهشوا يا أولاد ح تلقو الكدسة متكيات•• لا تلاجة لا دولاب لا بتوجازنا لا شاشات•• ما راح تلقو عربيتنا ما في أسرة لا لعبات•• بتلقو الريحة ما ريحتنا البسو ليكم كمامات•• بس لازم نكون حامدين ويبقى الصبر لينا سمات•• وناخد بكية بكية شوق ونبقى نكفكف الدمعات•• نشوف البيت ونتصبر ولازم نكتم الآهات•• عشان الأجر ما ينقص عشان تتنزل الرحمات•• ونمشي على المثاني هناك وتبقى اللمة والضحكات•• ونضرب نحن أجراسنا وفي الطابور تكون وقفات•• [منقول]