قال لي ما عندي علاقة بوسائل التواصل الإجتماعي والميديا.. الفيني مكفيني.. بمرق من المكتب آخر اليوم للبيت.. والصباح من البيت للمكتب.. لحدي ما يوم جاني زول داير يشتكي مستأجر ما قادر يدفع قروش زيادة للإيجار.. رغم إنو إيجار المثل في البيوت الجمبو زادت زيادة كبيرة.. وقال مرات الزول بتأخر حتي في القيمة القليلة البدفعها.. قال لي هو والله زول طيب.. بس كمان الحالة بقت صعبة.. وداير امرقو عن طريق المحكمة. لقيت الموضوع ساهل خاصة إنو بتأخر في الدفع.. سالتو عن إسم الزول دا؟ لما سمعت الإسم قعدت أستفسر عنو أكتر.. ووعدتو خير.. تاني يوم إتصلت علي المشتكي لو عندو صورة للمستاجر دا؟ وفعلا جاب لي صورة وتأكدت تماما من شكي وظني.. إتصلت علي كم زول في الدفعة.. ووريتهم الحاصل.. وبعد أسبوع كنا جمعنا قروش تلاتة شهور سلمناها لسيد البيت.. وقلنا ليهو عمك دا كان دفع ليك شيء.. شيل منو.. وكان ما دفع ليك ما تسأله.. ونحن بنديك إيجار المثل بس الموضوع يكون سري بيناتنا..الزول حلف ما يشيل قرش إلا يعرف الحاصل شنو..!! قلت ليهو الزول دا كان أستاذنا في المدرسة..ودايرين نعمل ليهو نظام معين بدون ما يعرف.. في النهاية عملنا قروب في الواتس.. وضمينا ليهو الدفعة كلها.. وبدينا نجمع في القروش..عرفنا عنده قطعة أرض في الإسكان.. كلها كم شهر والأمور بدت توضح والقروش جات تباعا.. شيء ريال.. وشيء درهم.. وشيء دولار.. وشيء إسترليني.. وشيء يورو.. والبنيان قام..
والغريبة حتي سيد البيت الكان داير يشتكيهو.. خش في الرصة.. وجاب لينا إثنين لوري طوب.. أستاذنا قرب يجن.. وبقى يمشي يقعد يعاين في بيته.. وما عارف البحصل دا شنو !!.. مرة يسأل.. ومرة عيونو تدمع براها.. ومرة يتونس مع البنايين.. ___ هسع خلاص.. أستاذنا الحمد لله رحل بيته.. مع أسرته وأولاده..
والقروب العملناهو لسع شغال.. وكل مرة بنشوف زول في المجموعة نزبط ليهو مواضيعه.. ......... يا أخوانا.. الميديا دي فيها حاجات كويسة.. لو استغليناها صاح !!! وقفلنا باب السياسة والنقاشات التي لا تسمن.. ولا تغني من جوع.. لأنها ما منها نفع... ونحن كبرنا.. لا بنغير في مفاهيمهم.. ولا بقنعونا بأفكارهم !!!!! وناس السياسة الفوق لا بعرفونا... ولا بنعرفهم... (والحميير في طينو...) الدنيا حرب ويا ريت نتفقد إخواننا.. وزملائنا.. وجيرانا... وأهلنا.. بدل نزيد الطين بلة شباب الخير... وكل من يعمل في مجال العون الإنساني... هؤلاء أفضل مننا بكثير... فلندعمهم.. ونشد من أزرهم.. ونشاركهم الأجر بدلا من التشاحن.. والتنافر.. وجلب الحقد والبغضاء..ونحن في النهاية أهل واخوان واحباب أولا وأخيرا.... هدانا الله... وإياكم لما فيه الخير 💚منقول💚بحب💚 هذا البوست حقيقة توقفت فيه كثيرا واتمنى أن يغير من مفاهيم الكثيرين بأن يكون تعاطيهم مع الميديا فيما ينفع الآخرين وأن يبتعدوا عن المهاترات التي لا تفيد ولا تغير من الواقع المرير .. فلنتبع السلوك الإيجابي أينما كان
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
مصطفى نور
فيس بوك
تويتر
انستقرام
يوتيوب
بنتيريست