جلسة عظيمة مروحنة عرفان وقرآن قصيد ونشيد عبد الله فضل الله أدار الجلسة وتحدث وأنشد شاهد الحاضرون فيديو كلمة الأستاذ محمود في المحكمة تحدث الدكتور ابراهيم الكرسني وألقى قصيدة بقية الإنشاد قامت به الجمهوريات وجمهوري واحد هو محمود محمد مجذوب وتحدث أزهري محمد على وألقى قصائد وتحدث مصعب الصاوي
Quote: عمر النفاج [7 مايو 2018] · أزهري محمد علي - بين ليل وليل دقدق صغار اتيمموا الزيف والرصيف واتقاسموا هموم الترتوار واقفين على باب الإشارات كل مرة ببقوا كتار كتار ديل تركة الجوع والنزوح وضحايا حملات التتار متشعبطين فوق القزاز بي الفوطة يمسحوا في الغبار وانت وراء الطراوة ولا عليك لا حننك حال الولاد لا لعب في عبك الفأر ووكت قريب ماكنا بنخاف دقة الباب في العشيات هوهوة الكلاب في زول غريب كشكشة الكدايس والصبر بيناتنا في وسط العناقريب ماكنا بنودي ونجيب لو جهجهت بيت الحمام أو حنكت باقي اللبن في المشاعيب تشبهنا في حيل النهار والدنيا لعبة يانصيب نختي ونصيب وكل حاجة تاخد قسمته والجاتنا جات قسمة ونصيب وأنا ذي ذي بستان خصيب تنبتا في عرقه الحياة تنفضا لوزاتو ويشيب تعجبني نمات المديح في الخلوة صلوا على الحبيب تعجبني لمات الولاد في القمرة والخاطر البطيب يعجبني والشيء العجيب بقة نويرات الحلب في قيهب الليل المهيب والليل مراجيح الطرب ترقد على حمير قفاك في السهلة ضارب الهمبريب تتأمل أسرار الفلك الونسة في الليل والحجي وطق الحنك كانت الأيام أخير تنده سريع النهمة الهميم ينسي روحه وهمو في الغير البقوم في الليل يتبن ويوم تلبن يأكلها الطير البيكرم جاره ويبرو بالضيوف بالفرحة بيطير البيكتم سرو في سرو لو يبوحلك سرو في بئر ببقي للغيم والمطر سرو والبحر ود خاله الكبير والزمان الكان زمانكم الله يطراهو بالخير كان كل فجة بتتسع بالحب تلمنا كلنا وكان ااي ضل في الواطة ممدود ضلنا وما كنا بنخاف من أي شئ وهسي بنخاف من ضلنا غنينا يا بوالسيد وقول غنينا قول ياضلنا المرسوم على رمل المسافة وماشي لي قاع الدرك نحن انتهينا على فراغ في حافة الوطن الشرك وانت بتحلق ذي فراش صاعد على الملكوت ملك المجد لك المجد لي غنواتنا زرقاء اليمامة في واسع الوطن النضير ركت على النيلين غمامة وطارت على العالم عصافير طلعت من اكمامها الوسامة وضوعت في الناس عبير الحافظة سري اظنها عشمانة خير إن شاء الله مايخيب ظنها يكفيها ماخاب من ظنون يكفيها ما خان من ولاد لو تبقى في الايد البلاد من أيدي كنت بفنها لكني عارف انها في عزلتها بتقعد تقوم مجنونة واشتر جنها مخنوقة بي ريحة العوادم والعناوين والسموم والاغتراب وخراب خراب معيونة والمؤمن مصاب اديتها من العين حجاب وعرق محبة ادتني من أحزانها حبة وحبة حبة تسوي من الحبة قبة تلاتة حاويات عند اللزوم وفي الليل تلملم كل نهارات الغياب وترميها في سبت الهموم وترمينا بي نظرة عتاب وكأنه مابطلع صباح ترقد تنووم تتمدا ذي قوس الكمنجة احلام من الخدر اللذيذ في فردة قنجة وطيف رزيين وبكرة بتقوم مختلة في روحها الموازين مغبونة والخاطر حزين ومقلوبة ذي بيت البكاء اطباق نميمة وهترشة وفايض احاديث المعزين ووكت قريب ماكنا بنخاف دقة الباب في العشيات
01-23-2024, 12:23 PM
Yasir Elsharif Yasir Elsharif
تاريخ التسجيل: 12-09-2002
مجموع المشاركات: 51130
مولد الحبيب المصطفي عليه أفضل الصلاة وأتم التسليم يااالطيف.. وين راحت أيامنا اللطيفة ؟ وهسي ذي المولدالفات كان نكون داخلين علي حوش الخليفة وفي امان الله جالسين جلسة ذي يوم السقيفة رفرفت في الساريا رايات هبت الارواح خفيفة النفوس الطاهرة نفحات ناعمة ذي لمس القطيفة المطايبة والتحيات هبة النسمة وحفيفة باركت روحنا الكرامات وضحكنا في وش القذيفة سمحين سماحة علي الصراط لاعترة لا اتوجسنا خيفة شلنا كيس السمسمية وعدنا للدار الوريفة بالكتير تلفتنا نوبات في رحاب الحضرة الشريفة لا انت طالبنا دانات لا نحن طالبنك حليفة وباللطيف.. وين راحت أيامنا اللطيفه ؟ لازم تقيف وترجع الحياة للحياة ازهري محمد علي
01-23-2024, 12:47 PM
Yasir Elsharif Yasir Elsharif
تاريخ التسجيل: 12-09-2002
مجموع المشاركات: 51130
Quote: لجنة مقاومة مانشستر الكبرى M.R.C� Omer H. Wadbadr · [23 أكتوبر 2023] 🇸🇩الخرطوم ضلمت جزء من مشاركة الأستاذ الشاعر ازهري محمد علي ضمن احتفالية لجنة مقاومة مانشستر بذكرى ثورة ٢١ اكتوبر
Quote: ضلــّمت و إتلفحت توب السواد طفت الثعالب ضحكتا وطوّلت ليل السهاد إنفضّ سامر فرحتا اللـّـمة والناس والوداد "فلق الصباح"، "الشجر أقلام جميع والنيل مداد" "الساقية" و"الحزن النبيل" و "من غير ميعاد" طال الشتات ودابت حشاشات القـُرى في المدن ذات العماد ولى الليلة لا بان لك صباح لا ملّت البوح شهرزاد وأنا كلما غابت سعاد غابات من الشك تشتعل يشتعل شوقي وأقول " بانت سعاد .. بانت سعاد" دلاّني آخر الليل نجـِـم انزع مخاوفـَك واتـَّحِد اصعد وسيم في المشنقة واضحك على وهج الزناد اصعد كما صعد الفراش جذوة النار واحترَق ولملِم رُفاتك وانتفِض تحت الرماد خليهو جرحك للهوام الخوف على جرح البلاد البلاد فى حافة النار إنت الوحيد المُشتبَه إنت الوحيد فى حضرة الموت إنتبَه بصرَك حديد وطيفك يجينا شَبَه شَبَهْ الريح مَحَت ريحة خُطاك دلـّت عليك دابة الأرِض وغناك دلـّت عليك فى العـَتمة دعوات الخلاص والأرض ماعون التعب ضاقت بما رحبت خلاص اشتعل غضب الحريق وخطوَك على خط التماس الهواجس لوّعت صحو الحنين ونعْـنَعَت خدر النعاس والصحاب من كل ناحية مصوبين وجسدك على مرمى الرصاص أتـَرَك وراك .. والفخاخ نُصبت على هذا الأساس وروحك من تسامى النشوة رقصت تحت حبل القصاص لا جرحَك الفاتح بـِرا لا مدّ ضُل العافية لعصب الحواس ضاقت خلاص، والدودَرَك للطعم من فوق الشرك دغدغ مشاعر الطِيبة فى حِس الدَباس ضاقت خلاص وإنت بتدارى الفرحة من حزن المغارب إنت بتقاوم لانتزاع الوردة من وسط العقارب فاتك قطار الأمنيات ندبْتَ حظـَك وارتديت زىْ المحارب ندمان على حلم السنين الضايعة في حقل التجارب وخائف على العمر الفضل والناس تسالمك بالمخالب الناس تسالمك والصحاب ضحكاتا زى طعم الطحالب ضاقت خلاص من كل جانب أمسينا في حد الكفاف وأصبحنا كلنا في البلد نحن المواطنين الأجانب ضاقت خلاص...!! __
01-23-2024, 01:05 PM
Yasir Elsharif Yasir Elsharif
تاريخ التسجيل: 12-09-2002
مجموع المشاركات: 51130
Quote: أزهري محمد علي 3. Oktober 2019 · أزهري محمد علي خريف الدم اتلاقينا في شارع القيادة العامة من كل فجه وفرقة فجينا الارض ووقفنا دي الوقفة التشوفها قيامة ماراحت شمار في مرقة بتزيدنا ونزيدا وسامة يوم جرد الحساب بالورقة حاسب نفسك اللوامة حاسب والمتاريس درقة والشدر البيمشي يمامة عينو علي الرغيف والطرقة وانت علي المعاك يتامى بينك والمشارع فرقة والبحر الكبير دوامة قول لحسين هناك في الشرفة حمدالله الوصلنا سلامة زي يوم الوقوف بي عرفة والنَّاس الهناك أياما شاهرين الهتاف سلمية رافعين الأيادي علامة أتنين بالكتير في المية والباقي بنتمو شهامة لو تصبر علينا شوية والصبر إن كمل نتسامى فوق كل الجراح الحية والنار التذكي ضراما ما بتعرف كلمة أحيا والنضم الوراهو ملامة والعمر البروح إيدية هدر في مسخرة دعامة ما بناخد فداهو الدية ما بنقبل قصادو غرامة نحن علي الفداء إتواعدنا وإتعاهدنا حب وكرامة زي سرب القماري صعدنا في لحظة وقوع الطامة إتوسمنا خير وقعدنا في جحر الأفاعي السامه شن طعم القيادة بعدنا شن معناهو طولة القامة في القلعة المشيد سورا قايلين الوراها نشامه في ذاكرة شعوب محفورة في صدر المعارك شامة تبت دوشكتا المأجورة تاكل من حلالا حراما تتلامع سماحة صوره وأولادنا بتموت قداما يا عار القيادة العامه الاعتصام رفه جناح اللهفه في روح عبد السلام روعة جساره عظمة و الشهداء الكرام غضب المتاريس العصية و دقه اوتاد الخيام الاعتصام انفض في شارع القيادة العامة لكن نبت في كل قطرة دم و قام في كل بيت في كل قصة ثورة قدام في كل شهقة و زفره في صدورنا اعتصام في كل شهيد صعد عند الله محمود المقام الليالي المالحة يا ليل المناحات الدروب الفاتحة شريان البراحات كانوا في صدر القيادة كما السنابل و الرياحين احلامن اجنحة الفراشات ارواحن انفاس البساتين متوسدين تعب السواعد الخضرا و الاحلام قمم سمحين وعالين الهمم ذاكرين وحامدين الكريم شاكرين علي الخير والنعم قابضين عروق الواطة ذي شدر السلم هذه الارض لنا فليعش سوداننا علما بين الامم واا حسرة الاولاد علي حسرة نشيدك يا علم انحل توب السترة و اكشفت عروض في الساحه و اتباعت ذمم تبت ايادي القتله و العسس الرمم ياللألم ياللمصاب من كل فج طلعت ذئاب طلعت خبائث الارض من تحت التراب طلعت كتائب الظل و آلهة العذاب طلعت نفوس متناسيه ويلات السؤال عند الله في يوم الحساب بانت نوايا الحية وانكشف الحجاب عتمة في عز الشروق و كتمة في دم الشفق و فجة يا رب الخلوق و صرخة في اعلى النفق و طعنة في ضهر البشاشات و الوسامة و فطرة القلب السليم و طعنة في الاذان و في صوت الاقامه و حرمة الشهر الكريم و طعنة لي يوم القيامه بتحيا في غضب الحليم و طعنة لا يلقاها الا الذين صبرو ولا يلقاها الا ذو حظ عظيم نحن مشينا يادرب الرجوع هيهات ما فضل الا القليل و لسه في خاطرنا كلمات من صباحات المواويل لو بتغشى السدره غنوات كان عرج بي عازة الخليل و كان بننسج للحبيبات من خيوط الضوء مناديل المعاني بتخبؤ مرات و تشتعل زي اية في الليل و نحن شلنا عمرنا رايات جيل يسلم رايه لي جيل ما استكان ليأس وسواس و ما استجاب لسؤال البديل همو في الحرية و الناس و التزام الصبر الجميل عندك خت ما عندك شيل البعبؤ الروح سماحات و يمشو بين الناس قناديل و ناس بزيدو الهم مناحات ارخبيل الدم و قابيل الببادلوك العناق و يرجموك في الليل ابابيل ضحكة تحت اللحية القناع و كم غريق في لجة النيل يبكوا بدموع التماسيح و يمشو في جنازة القتيل و نحن عبرنا يا درب الخلاص وصّلنا باقي من الغناء التلميح و باقي من المعارك سِنه و نان باقيلك اتبوهمنا و لا مِحنا نحن برانا من كترت سُكاتنا خجلنا يوم لاقينا مجنون ليلى في شارع القياده نصيح و يا محبوبة ما فيك إنه فيك سماحة الزمن الوسيم و مليح و لا كانت مشاعرك مِنة يوم رسلنا لي حضرة جنابو اجنا اسرع من كلاب الريح و انتي متلنا ما شفتينا لما كتلنا و اتفرقنا ما بين شهيد و جريح و ما جيناك لي خت حِنة جابتنا المآتم و النحاس الربه آنات الهوا التبريح جينا محبة صبينا المتاريس صبه و اتعافينا من قُرح السرير القيح و كانت ذكرى احلام المدينة الفاضلة سودان بكرة اطياف الخيال و الفكرة و الحب الكبير و صريح سودان المعاني البِكرة متعافي و سليم الفطرة صارم و بالهداوة مريح رنة الاجراس و نقرشة المديح الرسومات الكمنجات المزازيك لمة الاطفال على صخب المراجيح همهمات الباعه و الشعراء المطاليق و الشيوخ المارقه من عبق الضريح البجردو السبحة من اهل الطريق التراتيل التسابيح النِبال يا عازه الجبال سلسبيل العدو و الصليح الزنوج الدم الحار و اللسان العربي الفصيح في المآذن سطع الهلال و الظلال في الجمعة صلبان المسيح من اريج نسمات الشمال قدله في الوطن الفسيح السجود في ارض المطار الوداعات التلاويح الحديد يا عطبرة النار التزاكر و التصاريح و العجب يوم وقف القطار و اشتعلنا مع المصابيح النضال و مواقف الرجال السِجال و الساسه الجُداد المعايش و سترة الحال الغناوي و عقد الجلاد الجدال في الجد و الهظار التهجد و التراويح انت زيد العتمة إقفال ونحن في ايدنا المفاتيح بكرة يصبح كلو قول قال و ما بصح الا الصحيح المواجع و الدم السال و كم سؤال في قبضه الريح كم صباح في الافق البعيد الواحدة ميقات التجلي ميقات صعود الثورة في هرم المواعيد زغرودة والشارع يقوم وتبدا الملاحم بالزغاريد من وين بنبداها الحكايات يا حرفنا المختصر المفيد انهدا حيل الكلمة وإنفضت ملمات يا دمنا المسفوح قبائل العيد نتلاقي في وهج البشارات والمعاني الخالدة في بيت القصيد دقت النوبات ودندنة الأناشيد للولاد المارقة حوبات الشهيد تلو الشهيد وَيَا خريف الدم سلامات نحنا بي موتنا بنزيد والبموت شان وطنو ما مات بتولد من أول جديد جينا من رحم البسالات جونا من بره الأجاويد خلينا بالنا علي البلاد ختولنا في الجرح المراويد جات كلاكلات إيد علي إيد بري شمبات المسيد جبره وأمدر والحشود المارقة من كبري الحديد إنت بتكيد والشعب يفعل ما يريد يحيا الكفاح وينبغي وتسقط كتائب الجنجويد
01-23-2024, 05:15 PM
Yasir Elsharif Yasir Elsharif
تاريخ التسجيل: 12-09-2002
مجموع المشاركات: 51130
Quote: mer Mahmoud BoShadi Elsiddig mit Mahasin Hamed und 50 weiteren Personen 10 Std. · يا شعبنا 🎤 رجاء محمود سعيد Rajaa Mahmoud Saeed كلمات: تاج السر ابو العائلة لحن وتوزيع: يوسف الموصلي تنفيذ: بوشادي
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Yasir Elsharif
فيس بوك
تويتر
انستقرام
يوتيوب
بنتيريست