الفاتحة يا أحباب ما مجرد سبع آيات بنعدّيها في الصلاة ونسلّم. هي النص الوحيد في حياتنا البنعيدو كل يوم، سبعة عشر مرة على الأقل، وكأنها "تربية يومية" للقلب قبل ما تكون تلاوة باللسان هي ما افتتاحية للكتاب وبس، بل "افتتاحية وعي"، وبداية علاقة، وتصحيح اتجاه. سبع آيات… لكن في الحقيقة هي سبع "مرايات"، لو وقفت قدام كل واحدة بصدق، بتشوف نفسك بوضوح أكبر الحمد: قرار "الجوّاني" "الحمد لله رب العالمين" الحمد هنا ما جملة تقليدية ولا استهلال محفوظ. الحمد "موقف". هو قرار داخلي إنك ما تبدأ يومك بالشكيّة ولا باللوم، بل بنظرة أوسع وين لطف الله في الحصل؟ لما تقول الحمد، إنت بتعيد تعريف العالم قدامك بتشوف "التدبير" قبل الجوطة، وتشوف "الرب" قبل الظروف، والرحمة المختبئة جوة القسوة الحمد بيرتّب الجوّاني قبل ما يحاول يصلّح البرّاني، وبيخفف قبضة "الأنا" عشان تتسع المساحة لعظمة الخالق التوازن جناحين للطير "الرحمن الرحيم – مالك يوم الدين" الآيات بتمشي بخطوة موزونة بين الريدة والحساب. لا بتخليك تغرق في "العشم" لحدي التسيّب، ولا بتسلّمك للخوف لدرجة ال################. ربك رحيم… فما تيأس. وربك ملك يوم الحساب… فما تستهون هي معادلة دقيقة بتحفظ القلب من الانكسار، وبتحميهو كمان من الغرور زي طير ما بقدر يحلّق إلا بجناحين: "عشم" بيشيلك، و"خوف" بيوزنك النقلة الكبيرة من "الغيبة" لـ "الحضرة" في البداية كنت بتتكلم "عنُّو": (الحمد لله… الرحمن… مالك…). وفجأة، بتلقى نفسك في مواجهة مباشرة "إياك نعبد وإياك نستعين" من الغيبة للحضور. من المعرفة للوقوف. هنا ما في "تنظير"، في إعلان وموقف ما العبادة ما حركات محفوظة، بل عهد صادق، وتحديد واضح لمركز "الولاء" والاستعانة هي اعتراف سمِح بحدودك؛ إنو كل قوتك وخططك وصمودك براهم ما بيكفوا الاستعانة ما ضعف، بل وعي ناضج بإنك محتاج لـ "مدد" ما بينقطع لُبّ الموضوع: طلب الدرب "اهدنا الصراط المستقيم" بعد الثناء ده كلو، ما بتطلب مال ولا جاه ولا نصر سريع. بتطلب "الدرب" لأنو لو صحّ الاتجاه، الباقي كلو بيتعدل مع الزمن الهداية ما معلومة بتحفظها، بل "بصيرة" بتعيش بيها، وثبات لما الدنيا تكتر فيها الغباشة والالتباسات هي البوصلة وسط الضباب، والنور الخافت البيرشدك حتى لو السكة طويلة دروس السكّة "صراط الذين أنعمت عليهم غير المغضوب عليهم ولا الضالين" الفاتحة بتذكّرك إنك ما براك في السكة دي في ناس "سمحين" فاتوا قبلك، اختاروا الحق ومشوا وراهو فربنا أكرمهم وفي ناس عرفوا وأنكروا، فضاعوا رغم المعرفة وفي ناس تاهوا لأنهم ضيعوا "البوصلة" السؤال ما عنهم هم، بل عنك إنت: إنت ماشي مع منو في الدرب ده؟
عشان كدة الفاتحة تعالوا في رمضاننقراها كتير ونقول أنها سورة رمضانية بامتياز، بل تضرع إنساني في كل وقت لأنها بتمشي في خط “التخلية والتحلية” تفرّغ قلبك من الشكوى وتضخّم الأنا والتيه، وتملاهو بالحمد والرجاء وطلب الهداية هي تدريب يومي على تنتضف داخلك ما قصة تلاوة مكررة
بنكررها ١٧ مرة في اليوم؛ مش لأننا بننسى كلماتها، بل لأننا بننسى أنفسنا والفاتحة كل مرة بترجّعنا… بالعبادة قدام الله.
02-18-2026, 03:46 PM
Ali Alkanzi Ali Alkanzi
تاريخ التسجيل: 03-21-2017
مجموع المشاركات: 11335
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير ابو الزهراء
Ali Alkanzi
فيس بوك
تويتر
انستقرام
يوتيوب
بنتيريست