القوى المدنية كل شوية تطلع لينا بورقة جديدة، وميثاق جديد، وخارطة طريق جديدة، لدرجة الزول بقى محتاج فهرس عشان يعرف الليلة شغالين بأي وثيقة الورق ما شاء الله جميل... منتهي الجمال سماحة جمل الطين وقف الموت وحرب، وعدالة انتقالية، دولة مدنية، فيدرالية، جيش قومي، إصلاح مؤسسات، مواطنة متساوية... كلام لو قريتو براهو تقول السودان داخل الجنة الأسبوع الجاي لكن المشكلة إنو الزول القاعد في معسكر نزوح، أو في بيت ما فيه كهرباء ولا موية ولا علاج، أول سؤال بيسألو ما- "الفيدرالية حتكون كم مستوى؟"
بسأل - الرصاصة دي حتقيف متين؟ الرغيفة حتجي من وين؟ الدواء؟ مافي كيف الناس تعيش الأمان؟ بقينا نمشي لا تلفون لا قروش في زقاقات البلد
يعني المواطن واقف في الصف حق العيش، والنخبة واقفة في الصف حق الدستور القوى المدنية شايفة الحل يبدأ من "عملية سياسية تأسيسية" والشارع شايف الحل يبدأ من "عملية إنسانية إسعافية"
هم قاعدين يناقشوا شكل الدولة بعد عشر سنوات... والناس قاعدين يناقشوا الليلة حيتعشوا شنو وبرضو عندهم عبارة جميلة -"لا شراكة مع العسكريين."
طيب... بعد الحرب دي كلها، منو القاعد ماسك الأرض؟ ومنو القاعد شايل السلاح؟
الناس ما بتقول ارجعوا للشراكة القديمة... لكن بتسأل - كيف حتصلوا للدولة المدنية وإنتو ما شرحتوا الطريق؟
لأنو أحياناً الخريطة فيها نقطة الوصول... لكن ما فيها الطريق , أها نجي لأزمة الثقة , دي أكبر من أي ميثاق
الشارع بقى يسمع البيان المدني بنفس الطريقة البسمع بيها نشرة الطقس يمكن يحصل... , ويمكن ما يحصل ودا كلام كتير ساي
ليه؟
لأنو نفس الوجوه... ونفس اللغة... ونفس المؤتمرات... لكن البلد كل يوم بترجع خطوة لورا وبرضو في حكاية بقت تضحك كل مرة يقولوا- "نحن بنتحدث باسم الشعب." والشعب يقول - "معليش... الشعب دا وين؟" لأنو أغلب الناس حاسين إنو في فجوة كبيرة بين الفنادق البتتكتب فيها المواثيق، وبين المدارس البقت مراكز إيواء والشارع برضو عندو حساسية شديدة.
أي كلمة زيادة... يقولوا الجماعة منحازين ولما تزعل وقلب يكزون محرق علي البلد وخايف من التقسيم دا كوز أي كلمة ناقصة...يقولوا الجماعة ساكتين وأي بيان دبلوماسي طويل... الناس تقول - "يعني بعد الكلام دا... الحاصل شنو؟"
والأطرف من دا كلو إنو السوداني بقى حافظ البيانات عن ظهر قلب "وقف الحرب..." "الممرات الإنسانية..." "العملية السياسية..." "الدولة المدنية..."
لكن لما تسألو - "طيب بكرة شنو؟" يسكت شوية... ويقول - "الله أعلم." المشكلة ما في إنو الرؤية غلط -بالعكس... فيها كلام مهم، وعدالة، ودولة مدنية، وإصلاح، وكلها أهداف تستحق السعي إليها لكن أي مشروع سياسي، مهما كان جميلاً، إذا ما بدأ من وجع الناس الحقيقي، حيفضل بالنسبة للمواطن زي كتالوج عربية فخمة... وهو ما لاقي حق البنزين الشعب السوداني الليلة ما داير معجزة داير زول يحس بيهو قبل ما يكتب عنو وداير يسمع خطة توقف الحرب اليوم، قبل ما يسمع محاضرة عن شكل الدولة بعد عشر سنين لأنو السياسة في النهاية ما امتحان نظري السياسة شطارة في إنك تخلي المواطن يحس إنك شايف معاناتو، قبل ما تطلب منو يصدق رؤيتك#
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير ابو الزهراء
فيس بوك
تويتر
انستقرام
يوتيوب
بنتيريست