|
|
|
 Re: قصتي بطانة أبعلي تفوز بجائزة… (Re: أبوبكر عباس)
|
يا – الصديق الصدوق – انا من ما – شفت السيارة – اللكزز المكندشة ومبخرة بدبي – بيني وبينك – هي ما دايرة منك مبخرة – ما انت محفوف بعطور مجالس هارون الرشيد وصقر عبد الرحن الداخل – فداخلها ناس اشبيلية دقاق وما دقاق رهاف وما نحاف طولن ما البتشابوا ليهو
لهيجن عنكوليب فداسي,, يرقشن رقشانا يعمي البراق.. لمست السكرات دييييك .. لفيت نفسي بتوب دبلان, وقلت احسن لي اقع في ضهرية اللكزز المكندشة .. شايل حنوطي متوكل على الله ومستني الراجياني .
• انت كنت وين الزمن دا كلو
• انت فنان مبدع
حمد ابراهيم محمد
+++
| |
 
|
|
|
|
|
|
|
|
Re: قصتي بطانة أبعلي تفوز بجائزة… (Re: حمد إبراهيم محمد)
|
Quote: قبل التحرك من السعدية خلوني أوصف الصورة قبل أركب اللوري.
الوكت كان أول يوم في ضراع الأسد |
| Quote: بعد عشرة دقائق من خروجنا من مرزوق الجابري نزلت المطرة من النوع البفلق في الرأس داك. |
إنتو يا مستنير كم لبثتم في اللوري دا عشان تقطعوا المسافة من السعدية لمرزوق الجابري؟
اوعك تقول لي لبثنا يوماً او بعض يوم.
وقد قال الشاعر:
جانا الخيرصان بمطرتو يطقِّع
ودر علي شوفة الفي مشيها تبدِّع.
| |
|
|
|
|
|
|
|
|
|
Re: قصتي بطانة أبعلي تفوز بجائزة… (Re: Hafiz Bashir)
|
المنبر محجوب عن السودان
المشاركة متعبة جدا
المهم القصة محيرة خالص
ما قدرت اربط البداية بالوسط بالنهاية
رغم انك معروف بالواقعية السحرية في السرد
هل الاصل هو البداية ام الوسط
ام ان الوسط كان قوسا كبيرا لسردية البداية؟
| |
|
|
|
|
|
|
|
|
|
Re: قصتي بطانة أبعلي تفوز بجائزة… (Re: Ali Alkanzi)
|
كم تمنيت يا حمد أن أكون في زمن عبد الرحمن الداخل أو هارون الرشيد ونكون جلساء السلطان المثقفين الحكايين نونسه وتحوم حولنا الجواري
وبالليل يتم توزيع أكياس الدراهم علينا لنصرفها بالنهار في مجالس الفقراء ونسرق منهم حكاويهم الشعبية لنعود بها ليلاً منمّقة في حضرة السلطان
| |
|
|
|
|
|
|
|
|
|
Re: قصتي بطانة أبعلي تفوز بجائزة… (Re: أبوبكر عباس)
|
الاخ أبوبكر تحياتي
نورت المنبر المظلم بكتاباتك الرشيقة (بكياتنا نحن ناس الخواض)... قريتها وجدتها تصلح أيضا كموضوع أكاديمي حول الهجرة الداخلية
واستقرار للقبائل...فهي أكثر ثراء بحثيا ومعرفيا من مفهوم "المركز والهامش" لأن الأول ديناميكي والأخير استاتيكي.. الأول بيتناول حركة المجتمع في حراكاته
بسبب كسب العيش أو الحروب أو الجفاف.
الموضوع شيق والكتابة فيها وصف ساخر جدا..
وقصة بطانة أبعلي كذلك تتميز بالتصوير الواقعي الساخر.. بس اللغة أحيانا تقف حجر عثرة أمام القراءة بسلاسة.
تحياتي
| |
|
|
|
|
|
|
|
|
Re: قصتي بطانة أبعلي تفوز بجائزة… (Re: محمد عبد الله الحسين)
|
بطانة أبعلي:
(١)
زمن أول:
مرّة في سنة ٩٠ قمت من قرية السعدية بلوري قاصد رفاعة وتمبول.
السعدية دي فريق كواهلة سعدية وهي آخر قرية تابعة للجزيرة شرق رفاعة وأهلها لحدي التمانينات كانوا رُحّل.
قبل التحرك من السعدية خلوني أوصف الصورة قبل أركب اللوري.
الوكت كان أول يوم في ضراع الأسد ستة صباحا، شيخ عوض الكريم خير الله قال لي: لو ما المطرة دي جاية كنا مسكناك معانا لحدي ما تاكل كرامة حاج الدابي، عاين شمالو وكورك للبنات السايقات حمير الري لبيارة أم طرطارة ورجعن وحماهن الورود، لأنو المطرة أكيد جاية.
اللوري وصل قرية الكاهلي زيدان، ودخلها من فريق أولاد عون، ركبوا فيهو أربعة رجال لابسين جلاليب بيضا وطواقي خضر، لفت نظري انو الجلاليب نظيفة كغير عادة متسوقي تمبول! ركبت كمان امرأة شايلة ليها جدادتين فيوميات - بسري قلت أكيد الفيومي دا دخلتو للعرب ديل جمعية بلان سودان- وواحدة بلدية وسخل أبيض أضانو مشرومة، ورجلو اليسار مربوطة مع يدو اليمين، الجداد علقوهو برّة اللوري والسخل توشك بدأ يكركم في رباط جزمتي الاديداس.
مجرد ما اللوري إتحرك واحد من الأربعة النضاف وقفو وقال لأخوانو: عيك نسينا عدة الشغل، قبل ما ينزل من اللوري واحد من أخوانو همس ليهو في أضانو الما مشرومة: مع الطارات جيب معاك حجر ولّ طوبة المرة دي واحدة في اللوري، الله يكفينا شرّها.
المداح جا راجع اللوري ومعاهو طارين في مخلاية، صاحبو قال ليهو: إن شاء الله إتذكرت الحجر؟ ردّ بالنفي، وقال البتجي من الله كلها سمحة.
دخلنا مرزوق حوالي تزعة ونص ومشينا نزلنا مكنة بابور عند ميكانيكي طرف الحلة، التنزيل أخد وكت طويل لأنو المكنة تقيلة، بالمناسبة مرزوق دي مولود فيها أحمد الجابري الفنان.
بقينا في اللوري أنا والكمساري، والمداحين الأربعة، والمرأة والسخل ًوتلاتة جدادات بجنب اللوري.
الكمساري خِلص من المرة حق نفرين بحجة انو السخل والجدادات بساون زول!
ضربت معاهو حجة شديدة وبعد قنعت منو قالت ليهو: خليتك ليوم القيامة إن شاء الله النار تشوشوك زي الشية، قال ليها إتي يا مرة مجنونة؟ نار شنو الربنا بشوي بيها الناس؟!
إتي ما عاقلة؟! معقولة ربنا يرمي ليهو زول حي في نار؟! هسع أنا بقدر أرمي سخلك دا حي في النار؟! دا كلام ساي ما في عذاب بنار ولا شيء.
لا شعوريا إنحزت للكمساري وبسري قلت الكمساري دا علماني!!
بعد عشرة دقائق من خروجنا من مرزوق الجابري نزلت المطرة من النوع البفلق في الرأس داك. بسرعة عمر الكمساري طلع ليهو تلاتة مشمعات صفر؛ أدى المرة واحد، وواحد غطى بيهو شوالات العيش والتالت إتكونا فوقو أنا والمداحين وخرتاية الطارين، بعد داك عمر جاب السخل وجا إتكوم معانا تحت المشمع، بسري قلت: الكمساري دا علماني وحنيّن.
المطر صبّ صبيباً بدّع (علي وزن خبّ خبيباً بدّع بتاعت ود بادي)، السواق شاف ليهو حتة عالية وتكّل فيها، سيد اللوري الراكب جنب السواق نزل وكورك للمرة وساقها ركّبها قدام وجا إندفس معانا تحت المشمعات، بعد المرة نزلت، المداح قال للمداح: ما قلت ليك جبيب معاك طوبة؟ المداح ردّ للمداح: وأنا موش قلت ليك البتجي من الله كلها خير؟ ووقف على حيلو ورفع يدينو الإتنين لفوق واستقبل المطرة بصدرو.
عمر الكمساري طلّع ليهو من خّرج جنبو تمر بركاوي ووزعوا علينا بالخمشات، وبحركات الكماسرة السريعة ديك مدّ للمرة والسواق القدام خمشتين، بسري قلت: الكمساري دا علماني، حنيّن وكريم، وبسري برضو شكرتو شكر شديد علي فكة الجوعة الدخلها فوقنا برد المطرة.
شوية والمطرة هِدت، عمر شال واحد من المشمعات ومعاهو حبال وظبط لينا تاية بجنب اللوري في دقائق (كنت داير أسري وأضيف للكمساري صفة سريع، لكن خلونا من الجمل الإعتراضية دي)، شلنا المشمع التاني جلسنا فوقو وإنضم لينا السواق. سيد اللوري قال للمداحين أمدحوا لينا، نزلوا الطارات لقوها مرخية، قلت ليهم أنا عندي بابور غاز في شنطتي، وأضفت: نحن برضو عندنا عدة شغل.
شدينا الطارات وكل زول حمس يدينو في البابور والمداحين قعدوا جنب بعض، وبدوا بمدحة: شيء لله يا حسن، يا حسن، الأداء بتاعم أحسن مية مرة من أداء الجمهوريين لهذه المدحة، والمداح الما جاب الطوبة صوتو لو ما أحسن من صوت إخلاص همد، بكون زيها.
قلت ليهم إتوا جمهوريين ولّ ختمية؟
ردوا لي بمدحة سريعة:
شيء لله يا أب جلابية ويا عثمان شيخ الختمية
شيلوا الفاتحة وأعقدوا النيّة، التمساح جيبولوا أذية
بعد مدحة التمساح وقفت على حيلي منتشياً وقلت للمداح الما جاب الحجر: اسمك منو؟ قال لي: يوسف، قلت ليهو: شوف يا أب شرا، إتّا صوتك دا أسمح من فنانين ام درمان الحاليين ديل كلهم، ومديح الرسول (ص) حاجة سمحة بلحيل، لكن الزمن عندو حكمو، وحوامة الحلال دي للمديح يمكن بطنك دي ما فايتها، دحين أقلب حقيبة، حافظ غنا حقيبة؟ قال لي: شوية، قلت ليهو ما مشكلة هسع بكتب ليك واحدة وبقول ليك اللحن ونجرب،
بتقرأ؟
هزّ راسو لتحت.
كتبت ليهو جزء من الشاغلين فؤادي:
الشاغلين فؤادي .. وفايقين تائهين
يكفي البي زارف .. دمعا ما يقيف
تالي القبلي شايف .. لي برقاً لمع
والصيد في الخمايل .. ياناس إجتمع
قوموا يا أحبّة .. نسترق السمع
ما بطيق القعدة .. والمها اجتمع
وخلطها مع ما بين تبري ناصع وأخدراني اللون
وقفت على حيلي وريتو اللحن كيف، البشوفني يقول اللحن حقي!! عبد الوهاب وردي بس!!
يا أخي، يوسف دا لمان وصل حتة والصيد في الخمايل يا ناس إجتمع، قلبي قرب ينقلع.
(٢)
زمن تاني:
أول مرّة أسوق عربية من مدني للخرطوم كانت خريف ٩٣ والعربية كانت بفلو بيضا.
أول ما طلعنا من مدني وجنب برج الإذاعة الفي ود المجدوب، صبت مطرة
طلعت العربية من الشارع ووقفت في حتة عالية
بالرغم من الوقت كان نهار إلا إنّو الواطة ضلمت وجابت ليها برق قوي، فكرت إنّو برج الإذاعة دا بشتغل مانع صواقع،
جات رعدة قوية جدا جدا، قبلها بثواني ظهر برق ما شفت زيو مباشرة شرق النيل وتحديدا في ابحراز.
ما في زول بصدقني، لكن من محلي داك شفت قبّة الشيخ يوسف ابشرا بأبي حراز شرق ود المجذوب وشرق النيل الأزرق، البغنن ليهو البنات:
بالضرى بالضرى يا ابشرا
بالضرا ان شاء الله راجل مرة
يا ابشرا
شفت الصاقعة امتصّاها الهلال الفي قمة القبة، وشفت ابشرا قاعد ليهو في كرسي أخضر في نص القبة ومتوشح بشال اخضر بالدهبي، وشايل سبحتو.
في اللحظة ديك مرت بخيالي تلاتة حاجات:
- شوف السيدة آمنة بنت وهب للنور الذي أضاء مدائن كسرى يوم وضعت الرسول
- عمر بن الخطاب من المنبر يقول لسارية: الجبل الجبل
- قصة يوسف ابشرا وهو صبي برعى بالغنم في الصفيّا وبرد (يرد الماء) بيهن الرهد في ابحراز (قول ٧٠ كلم)، بشرب من الرهد، لمان يصل الصفيّا، قطرات الماء البلن شنبو بكونن ما نشفت!!
(٣)
زمن ثالث يجمع الأزمان:
بعد سبعة سنين سنة ٢٠٠٠ والسبعات ليهن دلالات في الأديان، وتحديداً شهر اتنين سنة ألفين، أخدت رخصة القيادة من بر دبي، بشرت الكفيل بالعين، قال لي:
بكرة تعال استلم السيارة عشان تفتح فرع دبي.
جيت العين وبيتّ (بمعنى نمت) في بيت العزابة بالبريمي، العزابة كانوا لمان أجيهم بفرحوا بي زي فرحة الشايقية بزيارة أبوهاشم، واحد من العزابة ديل مسميني غرونوي،
قال لي: وحات الله، يا أبكر، إتّا أعفن زول يلاقيني في الدنيا دي، أعفن دي ما شتيمة زي حمبرّة، أبداً دي شكر، حتى إنّو لما قال لي كدا قلت ليهو: القلوب عند بعضها يا عفن.
العزابي دا أهديتو في بداية تعارفنا رواية العطر لباتريك زوسكيند، الزول دا كان حافظ كل المقاطع المعفنّة الفي الكتاب
ونسوني ونستهم وماخلينا واحد من اصحابنا المتزوجين ما قطعنا فوقو وحددنا درجة هرشتو من مرتو،
قعقعنا قعقعة من لا يخشى الفقر ، ولَم نستغفر، وسخرنا من أي شيء في أي شيء لي أي شيء،
اليوم داك لقيت معاهم محاسب أنصاري جديد لنج، وعندو إبريق بلاستيك بلو للصلاة.
قلت ليهم: روضوهو لي الأسبوع دا، بجيكم الويك اند الجاي ببكي ليهو بعين واحدة زي المهدي عشان نحفظو الراتب الجديد.
استلمت العربية برادو بابين ذهبية الموديل البحبوهو اليمنيين، كانت في التسعينات وبداية الألفية عربية الشرطة السائدة في السعودية.
جيت بيت العزابة دخلت العربية في الحوش وبعد غسلتها توجهت لدبي، قبل ما امرق من البيت عفصت الابريق بتاع الأنصاري باللستك متعمداً
كبيت بترول في محطة العوهة، العوهة دي آخر نقطة في العين المدينة، هسع الاسم قلبوهو الفوعة، ما عارفو عملوا شنو؟! لكن غيروهو.
اشتريت سندوتش نقانق زيادة طماطم وخالي طحينة، وعصير مشكل، ومسكت الظلط.
لمان وصلت كبري غباشة، نفس المطرة بتاعت ود المجدوب دوّرت، والدنيا انقلبت ليل، برق رعد خطيرين
طلعت العربية من الظلط، لمان البرق شدّ، شيطاني قال لي:
ديك مرقك منها ابشرا، دي بتمشي منها وين؟
تذكرت عفصة الإبريق، قلت ليهو:
الله ما بعابي ولا ينفعل وابشرا "لحاق بعيد"
الغريبة، تعبير "يا لحاق بعيد" دا كان كاتبو بابكر سالم ابو سنون في كل لواريهو (جمع لوري) في مدني
ما عارف جاني من وين نابل؟
كمال ود عمي قال لي، وكنت قاعد ابني ليهو في قفص حمام بحي مايو جمب جامع بابكر سالم ابوسنون، وأنا بالمرحلة المتوسطة، قال لي:
لو تقول كل يوم الصباح "يا لحاق بعيد" تلاتة مرات، أصلا ما بتفقر.
نزلت من العربية قلت انزل تحت جسر قباشة دا، آخد لي بولة، النصيحة أنا زي النوبيين بهرش من الرعد هرش شديد، قلت وأنا نازل من العربية:
يا لحاق بعيد
تلاتة مرات
دي كانت أول مرّة استعمل وصيّة ود عمي
حصلت حاجة غريبة جداً جداً
دي ما ظنيت زول واحد يصدقها، أكبر من ديك
حيدر حسن ميرغني ذات نفسو ممكن ينكرها، وفِي أخفّ الأحوال يقول:
"ان كان قد قال، فقد صدق"
حصل برق وسيفو فصل بيني والعربية، بقى قدامي زي بوابة التنقل بين الماضي والحاضر البجيبوها في الأفلام الامريكية الخيالية.
-أول مرّة أدخل إستاد مدني كنت في بداية المرحلة الابتدائية، مع ود أختي عبد المنعم سعيدالذي يكبرني بسبع سنوات.
المباراة كانت بين المريخ العاصمي والنيل مدني، سبّطت مطرة شديدة، نزلنا ادسينا في ضهر اللوحات الجانبية، كل مرّة كان يقول:
جايّة رعدة
فعلا تجي بعد كلامو
أدهشني صدق التنبوء بتاعو
لاحقا شرح لي إنّو الضوء يسبق الصوت-
أها سيف البرق لمان شقّ بيني والعربة، شاهدت نفسي طفلا تبلله الأمطار في إستاد مدني، وانتظرت الصوت، لكنني وجدت نفسي في زمن مختلف خالص عن ود المجدوب وأستاذ مدني وعن غباشة!!
لقيت روحي في زمن مختلف ومكان مختلف، فتحت عيوني لقيت ارض خضراء منبسطة على مد البصر، تزين الخضرة زهرة التبر البيضاء
المكان عرفتو بطانة اب علي، وقاعدين في ضَل تاية، وجنبنا بهم ضان وشاي مشدود في نار بعر، ونغني واشيل معاهم وأقول:
تالي القبلي شايف لي برقا لمع
والصيد في الخمائل يا ناس اجتمع
الصوت الأساسي في الغنا عرفتو صوت المداح الحكيت ليكم بيهو قبيل
قلت ليهو:
أبشرا، اللماك بي شنو؟
قال لي: اللماني بيك اتّا عارفو، لكن قول لي:
بنطلونك وجزمتك ديل غيرتهم متين؟ ووين؟
| |
|
|
|
|
|
|
|
|
 Re: قصتي بطانة أبعلي تفوز بجائزة… (Re: أبوبكر عباس)
|
| Quote: • انت كنت وين الزمن دا كلو |
| Quote: الناس مشغولة بالفول شغلة شديدة |
فول؟؟؟؟ المفروض السؤال أين أنت الآن؟ أو كما قال مولانا كم لبثتم؟
| Quote: قلت ليهم إتوا جمهوريين ولّ ختمية؟ |
شقة عبد اللطيف - فريق بن عمران - الدوحة في زمان غير بعيد
في الصالة مجموعة كانت قاعده في الكنبة تحت الصورة الكبيرة
لمولانا الميرغني وفي الجهة المقابلة صورة تانية للأستاذ محمود
محمد طه (أخيرا إتذكرتك)، كنت تبحلق في الداخل والخارج كأنك
بتفتش في زول ! قلت لي صحبي يا ربي دكتور الغنم الضيف ده شايت وين؟
قال لي مالك وماله نسمع المديح ونتعشي ونبق مارقين بكرة ورانا شغل 😁
| |
|
|
|
|
|
|
|
|
|
Re: قصتي بطانة أبعلي تفوز بجائزة… (Re: أبوبكر عباس)
|
صل برق وسيفو فصل بيني والعربية، بقى قدامي زي بوابة التنقل بين الماضي والحاضر البجيبوها في الأفلام الامريكية الخيالية.
---------------------
الكوت فوق ممكن يبرر النقلة
من استاد مدني الي زمن اللوري
من جديد
انا غايتو سبيت ليك دين
لما قطعت حكوة اللوري ودخلت
في زمن العربية
| |
|
|
|
|
|
|
احدث المقالات بسودانيزاونلاين اليوم
| |
أبوبكر عباس
Amira Hussien
حمد إبراهيم محمد
Hafiz Bashir
عبداللطيف حسن علي
Ali Alkanzi
محمد عبد الله الحسين
محمد محمد قاضي
فيس بوك
تويتر
انستقرام
يوتيوب
بنتيريست