عضو المنبر .. أبوبكر عباس .. يكتب "معًا من أجل العفو عن خالد بحيري"!

Quote: كَتَبَ أبوبكر أحمد عباس خالد بحيري صدارة المشهد أوردته التهلكة: حكم مؤبد لتعاونه مع الدعم السريع بمدني: خالد بحيري والده الأستاذ الكبير صديق بحيري، وجده صالح بحيري خريج كلية غردون، وصالح دا كان مَسكِّن معاه في البيت الرئيس محمد نجيب وبعد نجيب بقى رئيس زار السودان ومشى زار فريق البحيرية في مدني وأداهم التحيّة العسكرية. وخالو عبقري الاقتصاد ووزير المالية السابق الوجيه مأمون بحيري كل القروش الطرادات الحمر الزمان ديك كان موقع فيهن إسمو. حبوبتو ست الدون زكريا ناظرة مدرسة الدايات، استقبلت كل مواليد المدينة في الستينات والسبعينات ومسحت وجهوهم وقبلتهم. أخوهو ياسر حداثة أعظم لاعب بمدني بعد بابكر سانتو كانوا بغنوا ليهو بصوت القطر في شوارع مدني: "حداثة لاعب صغير في سنو كل البنات حابنو". ود خالته حارس فريق الاتحاد محمد التيجاني (أبو الناس) أظرف ظرفاء المدينة، وود خاله الكوتش بكري بحيري أصغر مدرب حائز على شهادة التدريب الدولية وكل فرق مدني دربها. نشأ خالد بحيري في فريق البحيرية، كل أهله أعلام والبحيرية ديل الببدع فيهم في حاجة بجضمها، أها خالد بحيري دا مبدع في حاجة عجيبة؛ مبدع في صدارة المشهد: المدينة فيها منتدى شعري، تلقى خالد بحيري لابس كرفتتو وهو شاعر، شال المكرفون وقدم الحضور وقال ليهم شعره، تاني يوم جوا الفنانين التشكيليين، كان خالد بحيري التشكيلي يشرح في اللوحات ويتحدث عن بيكاسو ويغالط في حسن موسى، الأسبوع البعدو تلقاهو مع علي السقيد وفتاح السقيد في منتدى غنائي، بغنوا لمدني؛ قلتي مدني الجميلة، مدني يا أجمل خبر، وتلقى خالد بحيري حاضن المايك ويتحدث عن غناء الحقيبة، لا يقل معرفة عن السر قدور، جوا ناس الهلال يزوروا حداثة، خالد بحيري مدير أعمال حداثة والمتحدث والمرحب بالطيب عبد الله. الكيزان عندهم احتفال في تلفزيون مدني هو قاعد قدام جنب الوزير، هو متحدث لبق وحافظ الشعر والغناء والتاريخ وهو مؤنس جداً ودائماً مهندم. انكسرت ماسورة في الشارع، قبل ترتاح في كسرتها تلقاهو وصل الإدارة المركزية، لكن لو انكسرت في بيتهم ما بشتغل بيها. الجيران عندهم حفلة هو البقدم الحفلة وينظمها وبكون أشيك من العريس، غايتو بس ما عارف قاعد يرفع فراش البكا ولّ لا! جاء الجنجويد المغول وهرب الناس والقعدو أصابهم خوف شديد، وحبيبنا خالد بحيري قاعد في فريق البحيرية ما عليو، كل يوم يطلع في كرسيهو قدام البيت يصور في المشهد. جاءه كيكل في البيت وشَكَّر خالد شُكُر شديد وصاحبنا بحب الشكر حب شديد، دخل عليه كيكل من نقطة ضعفه؛ معشوقته مدني، قال ليهو دايرنك تكون معانا تحلل مشاكل المواطنين ونعينك في الثقافة والإعلام، وافق بحذر، وتاني يوم من الصباح رجّع للناس الموية في البيوت واتصور مع الجنجويد وهم فاتحين بَلِف الموية، تاني يوم جوهو ناس الدرجة يشكوا من السرقة، مشى لكيكل وحاول يحل المشكلة. بعدها حلّ مشاكل المستشفى والأدوية، ومع كل دِرِب يركبو لمريض بكون في جنبو جنجويدي أتصور جنبو، شاعت صوره وفيديوهاته مع الجنجويد وحكومتهم. أصبح للموجودين بمدني مُنقذ، وللذين يشاهدون صوره في الوسائط وهم خارج المدينة أصبح خائن. صحيح خالد بحيري كان في بعض صدارة المشهد أيام الجنجويد كعادته في السلم، لكنه لم يسرق ولم يقتل ولم يساعد في ظلم، نقول شنو فهو خالد بحيري عاشق صدارة المشهد ومدني، لكن صدارة المشهد الأخير أوردته التهلكة وحكم عليه بالسجن المؤبد. فشنو أيها السادة؛ ولقائد المعركة السيد الرئيس البرهان والسيد الوالي: خالد بحيري تصدَّرَ بعضًا من مشهد أيام الجنجويد لمساعدة الناس، لكنه لم يلحق أذية بأحد. نحن أصدقاء أسرته بمدينة مدني نسألكم بحق ست الدون وحق مأمون بحيري وما قدمته أسرة البحيرية للمدينة، نسألكم اللطف بخالد والعفو عنه فهو من عشاق مدينة مدني وأيقوناتها، وحتى بالأمارة ممكن تسألوا الفنانين، الشعراء، الرسامين وستات الشاي وبائعات الكسرة وناس الكورة في الساحة وميدان السلك وكل ناس مدني، هل أحفاد صالح بحيري ممكن يخونوا مدني؟!. معًا من أجل العفو عن خالد بحيري أبوبكر عباس ع/ أصدقاء البحيرية

Quote: عن عائشة رضي الله عنها، أن قريشاً أهمهم شأن المرأة المخزومية التي سرقت، فقالوا: من يكلم فيها رسول الله ﷺ؟... فقال ﷺ: "... إنما أهلك الذين قبلكم أنهم كانوا إذا سرق فيهم الشريف تركوه، وإذا سرق فيهم الضعيف أقاموا عليه الحد، وايم الله لو أن فاطمة بنت محمد سرقت لقطعت يدها".