ضىى المصابيح "القريبة" -" أنعش "عيونك - "ما" أنطفأ

Quote: راجعين أكيد لمة الناس الحنان ضي المصابيح البعيد يصبح قريب ريحة التراب طعم الجنان حضن امهات جية حبيب والشوق شديد مرحب تعال واهلا حباب راجعين أكيد بعد الشتات والدنيا عيد

Quote: اهلا هدى هنالك فئة اخرى: الذين سيرجعون إلى بيوت الآخرين.

Quote: اهلا اختي هدى معظم الفئات التي كانت اصلا خارج السودان، بنت منازل تم تهجيرهم منها. هنالك اقلية ليست لها بيوت لتعود إليها: هي خارج الوطن أصلا، ولم تؤسس بيوتا. وعندما كانت تعود ، كانت تعود إلى بيوت "الآخرين". هنا العودة هي للذكريات الوطنية فقط.

Quote: سلام هدى كلما مامرت الايام بعدت المسافة غايتو حيرة غريبة ….قلنا ايام بقت شهور وماشية على السنين ….تمعن التفكير تصاب بالذهول وطنك بيتك اهلك أصحابك دخرى عمرك …..أنا شلت معاى وانا مسافرة شنطة كرى أون هل بتتخيلي كرهتا أشوفا وفى لحظة رميتا فى الزبالة بقيت اهرب من الذكرى والتذكر لكنها تطاردني فى كل وقت ……غلبنى اتأقلم على اى مكان ذهبت اليه!

Quote: شكرا هدى على الرد الوافي الكافي. يمكن كل التفاصيل التي ذكرتها تندرج تحت مسمى: الذكريات الوطنية. وبالمناسبة هل كتبت عن التجربة الجديدة في الغربة؟

Quote: الأخت هدى تحية وتقدير هو واقع فرضه الظالمون علينا قسرا فاوغلنا فيه.... غياب تحول فيه الوطن الي حقيبة ورحيل........تراجيديا الخوف من سقوط اسماء الاحباب من ذاكرتنا أو سقوطنا من ذاكرتهم سهوا حين ياخذنا الغبن الي مدن ووحوه غير أليفة....ومطارات تسرق منا السمرة والضحكة... نخشى من تحول الإغتراب إلى لجوء ومعافرة الرزق إلى منفى وهل من عودة تاني

Quote: تحياتي يا هدى والتقدير دا ما اظنه محض تفاؤل بقدر ما هو تمني نوع التمني المسنود بوقائع المنطق والحسابات ابتداء من " لا بد من صنعاء وان طال السفر" وهنا حتما تقرأ لا بد من خرطومنا وان طال السفر كل العبث المؤلم والمهلك الحصل واللسه بيحصل عنده محصلة نهائية ومنطقية وواقعية واحدة وهي عودة الأوضاع زي ما كانت وربما بأفضل مما كانت قولي لي ليه وكيف اقول ليك الحصل مأساوي بمعنى الكلمة وربنا يكون كمان أشد مأساوية في مقبل الأيام لكن لا مليشيا الدعم السريع حتسيطر علي واقع وحياة السودان والسودانيين ولا السودانيين برضو انه تكون نهاية حياتهم بالشكل المتخيل والمتصور الحالي السودانيين قوم مختلفين عن كل أقوام وشعوب الكوكب ولا حتى كمان الجيش، الجيش المهزوم دا والحائر في أمره قبل ما تحتار الناس فيه، حيرضى ويقبل بالشي الحاصل مش حبا في السودان وفي السودانيين المساكين، لكين لأنهم وقبل كل شي سودانيين وحتى لو بقو كيزان، وهم شر خلق الله انسانا، لكن برضهم ياهم السودانيين المختلفين اقول ليك شي كمان زيادة يا هدي حتى ناس الدعم السريع النحن شايفنهم ديل، برضو ومهما بلغت بيهم سطوة يد الأمر الواقع وبقت توجه وتتحكم في أفعالهم وتصرفاتهم دي هم برضو من عينة ونوع السودانيين المختلفين الأنا بصر وبراهن عليهم وبتجي لحظة ما، ما معروف متين، وتلقي وتشوفي كلامي الخيالي والمتوهم دا بقى حقيقة وبرضو ما تفاؤل يمكن عشان انا مؤمن بمعنى السودان وطبيعة وعجينة السودانيين ولا اقول ليك خلينا نسميه، ولو مؤقتا، تفاؤل

Quote: سلام هدى وضويفك الأكارم وضيفتك الكريمة أميرة أول مرة أقرأ القصيدة وأستمع للأغنية شكرا لك ولأسامة الخواض وسنة جديدة سعيدة وسودان جديد

Quote: هدى اجرتْ تعديلين على نص مدني النخلي، حتى يناسب المقطع الشعري موضوع البوست، أو ما تريد أن توصله لقارئة وقارئ البوست. وحتى مصطفى سيد أحمد عدّل كلمة "المواعيد" إلى "المصابيح"....

Quote: حسب تعبيرك أسامة عن اختلافات النزوح "ميماتيا"