اخوكم اليومين دي مشغول مع الشباب في تأسيس منظمة سدرة السودانية ّ”العالمية“ بادرة أحسبها ساطعة .. ومن ضمن أهدافها العديدة المساهمة في إصلاح وترقية دور المجتمع المدني نفسه كمنصة إنطلاق.. وبما شابه من شوائب ضمن الأزمة المدلهمة الشاملة.
المطلوب هنا: أي زول داير يتعرف على سدرة دي شنو (يقول عووك) كمان داير تنضم لسدرة برضو تقول عووك (مافيش أي إلتزامات مالية) ولو عند الضرورات: عندك خت ما عندك شيل (معادلة للمستقبل) نحن لسا بنأسس.. المهم كل زول عنده مكانة خاصة بيه ومحجوزة ليه وبتشبهو وحده لا غيره .. ومعاً نرسم اللوحة المشرقة.. هنا تتعرف على الرؤية الجديدة.. لا نسميها منظمة بل رؤية إنسانية جديدة تجمع الناس الحساسة والحاسة بالإنسان المطلق.. ونحن لسا في مرحلة التاٍيس منذ عدة شهور خلت ومتوقع ننجز التاسيس إن ربنا هون في شهر 9 الجاي.
كمان شغالين في فيما نسميه مشروع دولة المواطنة.. مشروع غاية الاهمية في تقديري.. بلدنا في حالة الوحدة تحتاج هذا المشروع وفي حالة الإنقسام لا قدر الله فهي أحوج.. برضو إنتباه هنا.. دولة المواطنة وثقافتها ضرورة مهما طال السفر وفق هذا التصور.. إنضم إن شئت إلى النقاشات الجارية حول مشروع دولة المواطنة ومخيالها عبر هذا الرابط:
كمان برضو وطبعا (الناس المهتمة عارفة) عندنا مشروع السودان200 ودا قلبنا وحبنا الأساسي.. ما اظن بتكلم عن نفسي بس بل كتيرين .. وبرضو وطبعاً ومؤكد مفتوح للجميع بلا فرز وهو صناعة جميع المخلصين.. تعرف إن شئت على مشروع السودان 200 عبر هذا الرابط: https://www.facebook.com/share/1Bj9KEL7KP/https://www.facebook.com/share/1Bj9KEL7KP/
في الختام: كل المشاريع التلاتة دي متوفرة تفصيليا كمسودات (رؤى ورسائل وأهداف وإستراتيجيات كما بعض الأعمال في أرض الواقع وأبحاث منجزة) ويوجد لها منشورات عديدة على حيطتي المتواضعة على الفيسبوك ومنابر عديدة اخرى وأي زول داير نسخة خاصة بيه في أي مكان آخر على الرحب والسعة
وهذا ما لزم النداء به إلى أصحاب القلوب الرهيفة.. كمان انت برضو عندك حاجة عاجلة نعملها معاك طبعاً وجداً نحن جاهزين بما نستطيع.. بس انت قول عووك!.
مع ملاحظة: اننا نعمل في اوضاع صعبة وبجهدنا الذاتي ويتعاون معنا الكثير من المخلصين .. وفي نفس الوقت نعاني سوء الفهم من بعض الانحيازات الحزبية والجهوية والايدولوجية والشقاقات العامة التي تسود الساحة.. ولكن كلنا عزم في انجاز ما خططنا له في الضوء.. ونعرف اننا غير مشهورين واي قونة او لايفاتي جهبوز بيجذب اهتمام الشباب اكتر ممنا.. نعرف ذلك ونعرف اننا كلنا اصرار .. وكم فئة قليلة مخلصة انتصرت للتاريخ.. التاريخ يحدثنا (الكلام الاخير دا ونسة غير رسمية)😅💥 نشوف المهم♥️🌹✌️
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد جمال الدين
فيس بوك
تويتر
انستقرام
يوتيوب
بنتيريست