بالنسبة للناس الجايطه ومولوله من البيحصل للجيش وسقوط الفرق.. وتلقى الجنجويد استلموا المدينة زى ما حصل في مدنى وسنجه خلال اقل من اربعة وعشرين ساعة والامور انتهت. انتهت على مستوى فرقه وما ادراك ما فرقة لا جماعة لا فصيلة لا سرية لا كتيبة لا لواء فرررررقة تتلاشى فى يوم كأن لم تكن.. وبعد شوية يبدأ الصراخ والعويل والمطالبة باقالة فلان والانقلاب على فلتكان وجيب داك وزحو دا هل الكلام دا جديد على الجيش ولا دا ياهو الجيش من زمان وياها عادتو بس المشكلة ان الحرب بقت قدام الناس؟ عشان نفهم المسألة مثلا من بعد انقلاب يونيو 89 تم تكثيف العمليات فى الجنوب طوال اكتر من خمسة سنوات الجيش بيزحف من جوبا الى نمولى والمسافة كلها حوالى 195 كلم يعنى قريب من مسافة الخرطوم مدنى بيزحف حته حته لامن بقى فى مشارف نمولى وكان شغال تبديل من متحرك لمتحرك ومن استنفار لاستنفار.. ثم وخلال اقل من شهر اواخر سنة ١٩٩٥ كل الكسبو من اراضى ونقاط خلال الخمسه سنوات مقوى وفلتاكا وونجبول وفرجوك ووووو تم فقدانه فى ايام اياااام.. قادر تستوعب خمسه سنوات قصاد ايام؟ مرة اخرى خلال اقل من ايام تم فقدان المساحة من قرورة اقصى نقطة فى الشرق مرورا بايتربا عقيتاى وعقيق وصولا الى منطقة وقر فى الجانب الاخر من دلتا طوكر المواجه لمدينة طوكر... الجيش طوال تاريخه حركته ابطأ من بطيئة فى التقدم واسرع من سريعة فى الانسحاب والانهيار.. الناس ما كانت بتشوف المسألة دى عشان الحرب كانت بعيدة فبيتخيلو واقع اخر للجيش وانه خطير ورهيب خصوصا شايفين اللافتات قيادة اللواء قيادة الفرقة الكتيبة الشنو ما بعرف والعنطزة بتاعت الضباط والرتب فى الاكتاف.. وياجنابو وياسعادتك ويا سيادتك فالموضوع ما برهان ولا فرتكان دا يا هو الجيش كما هو لا كما تتخيله وتظنه او كما يقول بعض العساكر (طلقة ثبات وطلقة شتات) يعنى تضرب طلقة وانت بتدافع والطلقة التانية تضربا وانت منسحب متخارج.. فانت زعلان من صورة متخيلا فى راسك.. ووجود الجنجويد نفسهم دليل على عجز الجيش لانه احتاج مليشيا تقاتل بدله فى دارفور (مقاولة).. دى طبيعة الجيش ودى فلسفته وفهمو وواضح انها ما بتأكل عيش ولا بتفيد عند المحكات والاختبارات الحقيقية... فقصة العسكر للثكنات والجنجويد ينحل مفترض تكون الجنجويد ينحل والجيش لاعادة التأسيس الحقيقى يتهيكل هيكلة حديثة ويتدرب تدريب حديث ويبعد من السياسة ويتجدع برا المدن. المدن للمدنيين والخلاء لوحدات الجيش. #حرب_عبثية
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Nasr
فيس بوك
تويتر
انستقرام
يوتيوب
بنتيريست