|
|
 Re: الانصرافي كشح الزيت لن نسكت يا البرهان / د� (Re: Hassan Farah)
|
ظاهرة الإنصرافي في السودان ظهرت بعد حرب أبريل 2023 كواحدة من الطرق المستخدمة عشان تخمد نار الثورة وتبعد الناس عن القضايا الأساسية اللي بتهم الشعب. الظاهرة دي تعتمد على استخدام وسائل التواصل الاجتماعي لنشر كلام مضلل وخلق جدل حول مواضيع ما عندها علاقة بالأسئلة الحقيقية اللي مفروض الناس تسألها. بدل ما الناس تركز على منو الجاب الحرب دي؟ وليه بس حرب والثورة كانت سلمية؟ ليه الأطفال محرومين من الغذاء وليه ما بيقروا؟ وليه المستشفيات ما شغالة؟ وليه الطيران يضرب المواطنين؟ وليه التنمية متوقفة؟ وليه الحرب دي لسه مستمرة. مع كل هذه الأسئلة الجوهرية، قامت ظاهرة الإنصرافي لتغطي عليها وتوجه الناس لمواضيع جانبية.
الإنصرافيين قاعدين ينقدوا أي حاجة مرتبطة بدول زي الإمارات أو تركيا، لكن ما بيتكلموا عن الدور المصري في السودان، مع إنه التدخل المصري أكبر وأخطر. مثلاً، في جنيف، الإنصرافي بينتقد حضور الإمارات كمراقب، رغم إنه وجودها منطقي لأنها بتساعد في تمويل عملية الاتفاق، لكن ما بيجيبوا سيرة وجود مصر، مع إنه مصر متغلغلة في الدولة السودانية تنهب فى مواردها وداخلها فيها بكل قوتها الأمنية والعسكرية والسياسية.
أما بالنسبة للبنوك، الإنصرافي يهاجم قيام بنك تركي ببورتسودان،وأنه بمثابة تجسس تركى على السودان لكن هو ساكت عن البنك المصري الموجود في السودان. كمان ما بيتكلم عن تزوير مصر للجنيه السوداني أو وجودها الكثيف في الدولة السودانية من كل النواحي. المصريين بيحتلوا أراضينا، وبقصفوا فى بنيتنا التحتية، ومتحكمين في الشأن السوداني، برضو تكلم عن مدنى وقال تأخر الجيش فى دخولها وكأن الإنصرافى عنده جيش ممكن يدخلها، لكن الإنصرافي شغال يوجه الناس بعيد عن القضايا الأساسية لماذا الجيش إنسحب منها..! ولماذا أصلا الحرب تصل لمدنى؟.
كمان قاعدين يستخدموا الرموز الوطنية والدينية عشان يشرعنوا كلامهم ويزيدوا تأثيره وسط الناس. بالطريقة دي، أثروا على الرأي العام الثورى وخلوه يتقسم بدل ما يكون متماسك. الهدف من كل ده إنهم يضعفوا الثورة ويخلوها تركز على مشاكل إنصرافية، بدل القضايا الجوهرية.
عشان كده لازم يكون في وعي أكبر وسط الثوار. لازم الناس تركز على القضايا الأساسية وما تنجر ورا الكلام المضلل بتاع الإنصرافى الوكتو كلو مسطول ، على الثوار أن يتعلمو كيفية التحقق من الأخبار والمعلومات ضروري جدًا. لازم يكون عندهم إعلام مستقل يركز على الحقائق ويكشف الأدوار السلبية اللي بيلعبوها هؤلاء الإنصرفين، خاصة مصر، عشان الناس تعرف الحاصل بالضبط.
كمان ضروري على الثوار ان يفضلو متحدين وما يخلو الإنصرافيين يقسموا صفهم. لازم كثوار تواجهو كل محاولات التغطية على الأسئلة المهمة وتعملو على فضح الحرب دي وتعملو على بناء مستقبل جديد للسودان، مستقبل فيهو تعليم، صحة، وتنمية حقيقية. الثورة دي ما ممكن توقف، ولازم نعرف إنه كل الظواهر دي ما هي إلا أدوات عشان يخلونا ننسى قضيتنا الأساسية، حرية ، سلام وعدالة.
| |
  
|
|
|
|
Hassan Farah
Mohamed Adam
فيس بوك
تويتر
انستقرام
يوتيوب
بنتيريست