|
|
|
 Re: جاهزية! يا اشاوس.. (Re: محمد عبد الله الحسين)
|
دخل الجنجويدي الى المنزل، وهدد أهله بالسلاح ليحصل على مفاتيح سياراتهم. ثم حذرهم من البقاء. عاد في اليوم التالي - يركب احدى سياراتهم التي غنمها أمس - فعلم أنهم نزحوا واغلقوا ابواب المنزل باللحام. فذهب واحضر رفاقه وفضوا اللحام. وفتحوا الابواب، وعاثوا في البيت تخريباً ونهباً وتصويراً.
في الخارج كان ينتظرهم جار وحيد عجوز بقي بالحي. نظر الى الجنجويدي وصرخ: يا حرامي.
فثارت نخوة الأشوس من وقع الاهانة. جُرحت مشاعره وأحس بالظلم. الظلم الذي ذكره بكل مظالم دولة ٥٦. فرفع سلاحه وأطلق النار.
نظر الى جثة الجار الوحيد وقال في "شوس":
أنا تقول عليّ حرامي؟ أنا بحارب الكيزان وبحرر في منطقتك. تقول لي حرامي؟ يا كوز؟
كان الجار قبطياً لا يزور الكنيسة، وأقرب للالحاد، لكن انت تعرف طبعا كم هم مراوغين هؤلاء الكيزان.
في طريق عودتهم بسيارة محملة بغنائم محاربة الكيزان من بيوت المواطنين وعرق جبينهم، صادفتهم سيارة رفاقهم تحمل فتيات مختطفات يمضين الى طريق مجهول يرسمه الفزع.
تبادلت السيارتان التحية. ورمقت الغنائم الحية الغنائم المادية. وصاح أشوس: جاهزية.
-حمور زياده-
| |
 
|
|
|
|
|
|
|
|
Re: جاهزية! يا اشاوس.. (Re: محمد عبد الله الحسين)
|
نموذج من الكوميديا السوداء:
كتب احدهم في تويتر..
🔴 مشاهد من الارض
مدني
كتب احد أبناء المدينة:
العودة إلى اللا شيء
زي ما قلت أول ما دخلو الجنجويد ودمدني مرقنا من بيتنا أنا والحاجة وأخوي عشان الضرب جمب البيت كبير وغير كدا هو في قلب مدني مرقنا من غير ننظر ليه النظرة الأخيرة من غير نودع زكريات نشأتنا مرقنا ونحن بنحاول ننجو بي حياتنا ، بعد كم يوم من النهب والسلب ..
الوالدة أصرت إنو لازم ترجع تشوف بيتها الحصل عليه شنو قدر ما حنسنا وقدر ما عملنا وتركنا مافي فايدة أمس قلنا ليها خلاص نرجع كلنا سوا بس بي رجولنا عشان الناس ديل أي شي بمش بي عجلات بقلعو منك المهم في الطريق شفنا الفساد في الأرض الذكر في القرآن شفنا المنافقين المذكورين في القرآن ..
مافي حاجة إسمها مدني مخازن مارنجان بتتنهب وتتحرق الجملونات زايبة على الأرض الجنجويد فتحو كل دكاكين ومغالق وصيدليات المركزي وشغالين إغيرو في لساتك عرباتهم ومواترهم ويغيرو في الإسبيرات الجنجويد ما كتار كتار دي كلمة ما بتديهم حقهم ديل عبارة عن شعب كامل برفعو الناس في الشارع ...
وبقولو ليهم أرح أشتغلو معانا بنعزكم بملو البوكس فل وبمشو ينهبو ، اي راجل سايق عربية في مدني هو جنجويدي سايقين الحافلات الجامبوهات التركترات بي أكياسها جديدة لنج عربات المواطنين الناس ديل من شدة ما كتار ما بعرفو بعض زاتو قاعدين يسألو من مواقع المصانع والبنوك أحياء المنيرة أركويت
تم النهب والسلب وشغالين يخزنو في بيوتها السكر والمواد التموينية وساكنين فيها البكاسي رافعة البطاطير واللساتك مافي عربية ما بتدور معاهم واصلنا في طريقنا وسط وجود الجنجويد الكثيف بي طريقة مقلقة وفعلا في واحد إتسلبط في أخوي وكان عايز يدخلو جوة بيت من البيوت كان ما الحاجة كان فقدنا.
أخوي فيهم نوع بتفاهم وعندو شوية رحمة المهم ما وقفنا واصلنا لقينا الجنجويد بشترو في الخرفان وإياكلو في البطيخ عايشين البهجة ومشغلين أغاني ما سودانية ليبية تشادية كلماتها ما مفهومة والسلم الموسيقي مختلف جدا لمن قربنا نحصل البيت قلت لي الحاجة وأخوي كان لقينا البيت فاتح وفيه حركة ...
نواصل الشارع طوالي عشان الناس ديل شغالين بفتشو للذهب والقروش بيتسلبطو فينا وبقولو نحن داسينها المهم أول ما وصلنا البيت بيت جيرانا بابو فاتح لمن جينا علي بيتنا لقينا الأبواب مفتحة والجنجويد جوة عربتي سحبوها وموتر أخوي وعربيت الوالد ربنا يرحمو نهبوها وقاعدين جوة يقلبو في البيت ...
الحاجة خشت في حالة بتاعت صدمة وقفت قدام باب البيت وهي بتشوف كل البنتو مع أبوي بيتنهب قدام عيونا وإنو خلاص بقى ما عندها بيت وبتقول لينا خلوني أخش ليهم ونحن بنحاول نخليها تتحرك قبل ما ينتبهو لينا مافي مواطنين في حينا كل الناس مرقت في الجنجويد بس كل الحي أبوابو فاتحة وإتنهب ...
لقينا جارنا قدااام كدا مارق ليه مرتبة في الشارع وقاعد قدام بيتو وأبواب البيت فاتحة قال لينا هسه سحبو عربيتي وشغالين يخشو ويمرقو من البيت الكهرباء قاطعة ليها يومين وحاجة موية ماف المنطقة ما أمان ولا ممكن الإنسان يعيش فيها تاني أحياء الطائف الدرجة كلها في زمت الجنجويد ...
إنتو ما فاهمين تاني مافي حاجة إسمها مدني كان بقيت محظوظ إحتمال تلقى بيتك واقف ما وقع الناس ما ترجع الجنجويد كذابين قالو ما بسألو المواطن وهم شغالين يرهبو وينهبو ويضحكو فيه عشان واقف مع الجيش ومشى خلاه دي الحقيقة لاقانا جنجويدي قال لينا كان عايزين تسافرو ما تسافرو علي سنار نحن
ماشين علي كدا أرجعو علي الخرطوم أضمن ليكم هناك الأوضاع أهداء كسرو طرمبات النيل وبشاير والخرصانة وشغالين بغرفو في الجاز والبنزين بالجرادل والباغات السوق الكبير في زمت الجنجويد أمبارح الشفتو د ياهو الفساد في الأرض المذكور في القرآن زاتو حسبي الله ونعم الوكيل
أي كلمة أنا كتبتها هنا في الشهادة دي شفتها بي عيني ما حكوها لي وربنا يسألني منها يوم القيامة ألا قد بلغت اللهم فأشهد .
#انقذوا_السودان
#الدعم_السريع_مليشيا_ارهابيه
#Sudan_War_Updates
| |
|
|
|
|
|
|
| |
محمد عبد الله الحسين
Biraima M Adam
Yasir Elsharif
فيس بوك
تويتر
انستقرام
يوتيوب
بنتيريست