#ليه_الحرب خالد شقوري كانت .. بيوت الحلة تصدح بالنشيد والشفع أيام الحصاد لبسو الملون والجديد والناس خفاااف مارقين لطااااف زي كل عيد والناس أهل نايمين وصاحين بالأمل حتى الشقى الفقران سعيد لكن عيون الشر هناك نصبت شراكا على الدرب من كل روح شالوا الهنا وفى كل بيت زرعوا الحرب طال الدمار عش الصغار والغنية نامت بالغصب وإتستفت شنط المدن بالحسرة والهم والعويل والحاصل الما بتحسب ليه الحرب؟ ليه الحرب؟ **** حرب القبايل ..في الديار حرب الحدود حرب البوار حرب السياسة ..بلا عمار حرب (الكبار) وجع الصغار ستين سنة .. ونتقلّه نار ستين ونزرع في العدار وجمعينا سالب ومنسلب **** ايه يعنى.. يعنى وساع بلد وصدورنا في ضيق اللحد خيراتنا يتوطاها شر وعددنا زاتو بلا عدد ايدينا من قداح اللئام ممدودة تتمنى المدد وضكارة في الارحام تضيع وحياتنا كلها في الحرد لمتين نشيل حال البلاد البى قفانا بتتخرب ليه الحرب؟ تمن الكلاشات من منو تمن الطبنجات من منو البنتصر ..يهزم منو والبنهزم ..ينصر منو والحرب زاتا هي في شنو وكيف المعادلة تتحسب؟ (شقوري)
10-24-2023, 06:39 AM
Hassan Farah Hassan Farah
تاريخ التسجيل: 08-29-2016
مجموع المشاركات: 9203
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Hassan Farah
فيس بوك
تويتر
انستقرام
يوتيوب
بنتيريست