من ناحية مشاهداتنا البصرية لوقائع العمليات العسكرية على الأرض من خلال المقاطع التي تظهر بين الفينة والأخرى على وسائل التواصل الاجتماعي وخلافها، فواضح برضو إنو الجيش عندو الكلمة العليا على أرض المعركة في مواجهة المليشيا المأجورة
ولو عاوز يقضي عليهم ويشتغل فيهم حرب إبادة ما تفضل فيهم زول واحد حايم على كرعينو ـ فهو برضو قادر
لكن من الملاحظ ـ ولسبب أنا شخصياً ما بفهم فيهو بطبيعة الحال ـ إنو الجيش بيستخدم أسلحة محدودة التفجير
فبتلقى مثلاً العربية أو المعدة العسكرية للمليشيا تم إعطابها لكن خرج من بينها ومن تحتها بعض الجنجويد يفرون مذعورين في كل اتجاه ـ وكل الفارين هم تحت مرمى وبصر الرامي وتحت بصر وسمع وشوف الجيش ـ وممكن تلقى المنظر ده اتكرر زي خمسمائة مرة في اليوم
وأنا ما عارف الغرض شنو من القصة دي ـ لكن وقت تشوف ليك جنجويدي بيمرق مذعور زي الفار من الموت عشان يمشي يمارس جريمته في مكان آخر ويعمل فيها ضكر بط في مكان تاني مع مواطن أعزل ، فأنا أظن انو الموضوع ده محتاج إعادة نظر من الجيش
10-20-2023, 00:00 AM
Elhadi
Elhadi
تاريخ التسجيل: 01-06-2003
مجموع المشاركات: 9588
العربة أو المعدة العسكرية الموجودة تدمرت تماماً واحترقت بما فيها ـ بدون احداث ضرر كبير بالجوار أو المنطقة السكنية ـ وده مفهوم ومقدر من الجيش ويشكروا عليهو
لكن برضو كمان عناصر الجنجويد البفروا مذعورين من بين أيدي الموت ديل عشان يمشوا يرتكبوا جرائم في مكان تاني ضد مواطنين عزل ـ بتوجع يا جيش
فحقو يكون في معالجة للموضوع ده ـ لأنو القصة دي زاتها مزعجة للمواطنين
10-20-2023, 00:22 AM
Elhadi
Elhadi
تاريخ التسجيل: 01-06-2003
مجموع المشاركات: 9588
مفهوم الجيش بيحاول يقلل من الخسائر والدمار بقدر الإمكان في تعامله مع الجنجويد بالمسيرات ـ وأظن ده واضح من المقاطع القاعدة تبث وهي بالمئات ـ وما عاوز ليهو غلاط كتير، وبندي الجيش كريدت في القصة دي
لكن العناصر البتفر مذعورة دي ـ هيا دي جزء أساسي من المشكلة الواجب التعامل معاها
الناس دي مفروض تتلقط من الشوارع ـ تمشي السجن ـ تمشي الآخرة دي ما شغلة المواطن دي شغلة الجيش وواجبه
أساساً أنا رأي من 2019 لمن زول كان يجي يقول لي : طيب والمليشيا دي نعمل معاها شنو ؟؟ كنت بقول ليهو ياخي المليشيا دي ما شغلتي أنا كمواطن ولا شغلتك أنت ـ ولا حتى شغلة السياسيين عشان يقعدوا يمسكوا بينا زمن في موضوع المليشيا ده
المليشيا دي أسسها الجيش ـ وأطلق يدها الجيش ـ وأدخلها في السياسة بدءاً من العام 2019 برضو الجيش، وقصة إخراجها من العملية السياسية وتجريدها من السلاح وتفكيكها ده مسئولية الجيش بنسبة 100%
ده ما موضوع سياسي على الإطلاق من 2019 ولحدي يوم الليلة دي ـ ولا كان في يوم من الأيام ولا حا يكون ـ موضوع المليشيا ده التعامل معاهو سياسياً ده بالأساس مدخل خاطيء وتعامل خاطيء
خصوصاً عندما تكون المليشيا هي مجرد مجموعة للجريمة المنظمة ليس إلا ـ وليست حركة قائمة على قضايا سياسية أو مطلبية يمكن مخاطبة قضاياها سياسياً ـ زي بقية الحركات المسلحة اللي الناس كلهم تقريباً متفهمين ظروف نشأتها وتكوينها
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة