قحت.. أفضل ما نملك.. منقول،،، الهجمة الإلكترونية ضد قحت، وحشر اسمها في كل انتقاد هو عملية منظمة.. بروبغاندا بتنتهج منهج إشاعي كلاسيكي استحدثه وزير الإعلام النازي "جوبلز" ببساطة (اكذب وكرر الكذبة حتى يصدقك الناس)
بتطلق كذبة.. مثلاً (قحت وافقت على فض الإعتصام).. وتنشرها بكثافة بتترسخ الكذبة.. وبتجي تستخدمها كقاعدة، تبني عليها أكاذيب جديدة.. وسط ضبابية كثافة المعلومات، الناس حتنسى الحقائق.. حقائق زي، انو الجيش لمن طلع ببيان (وحدث ما حدث) ذكر بالتفصيل الجهات الخططت، وشاركت في فض الإعتصام..ولم يذكر قحت.. كذبة زي قحت قالت (الإطاري أو الحرب) مع انو العنوان محرف.. والفيديو الإتاخد منو المانشيت موجود..كاملا صوتا وصورة ليس كما بتره الكيزان،، و إفادات الإسلاميين في إفطارات رمضان عن نيتهم إشعال الحرب موجودة بالصوت والصورة..
دي الفكرة.. استغفل الناس.. أكذب بإصرار.. وسيب كلابك الأسفيرية واللايفاتية التابعين ليك ينشروا الكذبة.. وراهن على جهل بانقا..
الحقائق المجردة بتقول لينا انو قحت لم تفرط في ثلث البلاد.. قحت ما اشعلت الحروب في الجنوب، ودارفور، وجنوب كردفان، والشرق، والنيل الأزرق.. قحت لم تقتل الناس في الفاشر وفى بورتسودان..
قحت ما صنعت ال9 طويلة والنيقرز.. و أرهبت شعبها وأفقدته أمانه ليطلب العسكر لحمايته.. قحت لم تغلق ميناء بورتسودان وتفرط في أهم مورد حيوي في البلاد.. ولم تدمر مشروع الجزيرة.. وسودانير والخطوط البحرية والسكة حديد ، قحت لم تولغ في الدم، وتقتل الشباب في 2013..ولم تفض الإعتصام، في أكبر مجزرة في تاريخ السودان الحديث..ولم تقتل الشباب بعد انقلاب البرهان المشئوم،
قحت هي من ادخلنا العالم الخارجي.من اوسع ابوابه واخرجتنا من مستنقع الارهاب النتن،، ادخلتنا النظام المصرفي الدولي.. قحت لم تلجأ لروسيا وتشتكي بمذلة وتطلب الحماية.. وندخل مليشيا فاغنر للبلاد.. قحت لم تحاول إغتيال الرئيس المصري حسني مبارك، ثم فرطت -خوفاً من المحاسبة- في حلايب وشلاتين.والفشقة،،، قحت لم تدمر الإقتصاد.. ولم تتسبب في تدهور الجنيه.بل ولاول مرة يتساوي سعري الدولار الرسمي والموازي وتختفي تجارة العملة اللعينة،.ولاول مرة يتوفر احتياطي للبنك المركزي بقرابة مليار ونصف دولار مع احتياطي من الذهب،، ولم تقصف أطفال دارفور، بصواريخ التصنيع الحربي.. ولم تصنع أكبر فتنة عنصرية في تاريخ السودان..
قحت لم تصنع مظالم عند إنسان السودان.. ولم تفتح بيوت الأشباح.. والمعتقلات السرية.. ضد كل من يعارضها.. قحت لم تبتدع وظيفة (مغتصب) في دهاليز معتقلات الأمن.. اتخيل واحد بصرف راتب شهري، انت بتدفعوا من ضرائبك.. عشان يغتصب المعتقلين السياسيين.. و عنده علامة صلاة.. وممكن يكون بصوم خميس وإثنين..
قحت لم تتسبب في خلق الحركات المسلحة.ولم تقتل المحتجين في المناصير وكجبار،.ولم تقفل الميناء وطريق الشرق القومي في وجه صارات البلاد ووارداتها من اجل هدف سياسي ضيق قحت لم تصنع مليشيات عنصرية مثل الجنجويد، والبراء بن مالك..والامن الشعبي والطلابي والبنيان المرصوص والنصرة عشان تقتل مواطني بلدها.. وقننت وضعها.. وقوتها.. وسلحتها.. لمن وصلنا لمرحلة حرب الشوارع دي؟؟
مين عمل كل ده.. ؟ هو نفس النظام البحاول يشيطن قوى الحرية والتغيير.عصابة مجرمة تربطها مصالح مادية وتستثمر في تجهيل الشعب.. ولم وجه سلاحها إلا لصدر بني جلدتها.. أسوأ عصابة تتسلط على السودان في تاريخه..هؤلاء. اللا اسلاميين..
طيب.. ليه بهاجموا قحت، وبحاولوا يشيطنوها بالهوس ده..؟! فكر فيها.. نظام البشير قعد 30 سنة.. وماف حزب سياسي قدر يزحزحه من مكانه.. ووصل مرحلة من الثقة انهم قالوا حنسلمها عيسى والزارعنا غير الله اليجي يقلعنا.. وألحسوا كوعكم.. جات قحت.. ونظمت اكبر تكتل سياسي مضاد للحركة الإسلامية.. وصنعت عملية سياسية قوية تحالفت فيها مع الثورة.. ونجحت في إسقاط نظام الحركة الإسلامية.. قحت هي مصدر تهديد كبير جداً للحركة الإسلامية.. واكتر حزب عنده قاعدة مضادة..
بتكره قحت لأنها هي الأسقطتك ياكوز.. وبتكره الثورة لنفس السبب.. عشان كده صنعت عندك حاجز نفسي وكراهية شديدة..فكانت (فوبيا قحت)كالجرب،، لأنهم نزعوك، كما ينزع الضرس الفاسد.. بأمر الثورة.. من كرسي السلطة.. وقطعوا عنك نثرياتك، وسرقاتك وفسادك الممنهج.. ده هو السبب.. ببساطة شديدة..
حطمت عبارة (البديل منو) الكانت بتتقال في زمن البشير، وقدمت نموذج حكم مشرف بقيادة حمدوك.. بديل حقيقي ومشرف..
قدمت نموذج حكم محترم.. نموذج ناقص أيوه ومعيوب.. وبرغم تآمر الإسلاميين عليه من اللحظة الأولى.. بس كان برغم عيوبه أنجح من نموذج الإسلاميين.. نموذج كانت فيه المسيرات السلمية بتوصل لبوابات مجلس الوزراء، وبطلع رئيس الوزراء يستلم من المتظاهرين مطالبهم.. بكل أدب، وسلوك ديمقراطي، لحاكم بحترم شعبه..وعندما سدت في وجهه الطرق قدم استقالته بكل ادب وانسحب باحترام يحسب له، كانت فيه المسيرات بتحرسها الشرطة.. مقارنة بنموذج كانت فيه المسيرات السلمية بتجابه برصاص الشرطة وجهاز الامن الحي.. كما في عهد البشير.. وعهد حكم العسكر..والبرهان،،
نموذج مشرف رفع الحظر عن البلاد.. و أعادنا بعد عزلة لحضن العالم.. وعالج الديون المتراكمة.. و ثبت سعر الجنيه بعد سنوات من التدهور.. ولأول مرة -بعد سنوات من الظلام- شاف السوداني رمز سيادته بتم إستقباله بالأهازيج الموسيقية في عواصم العالم الأول.. بدلاً عن رئيس مذلول.. مهرج.. ملاحق دولياً.. كان يرقص ويحلف الطلاق ويكذب كما يتنفس،.. و يتم تهريبه للخارج -كالأغنام- في طائرات البضائع..
قحت، وبعد الإنقلاب عليها.. كل وزرائها خرجوا من الحكومة بذمة مالية نظيفة.. لم يسرقوا المال العام.. ولم يهربوا الذهب.. ولم يتملكوا العمارات والقطع السكنية في كافوري.. ولم ينتشر فسادهم كفساد من سبقوهم.. قارن ده بعراب الإسلاميين كرتي وزوجة المعزول.. ووقائع فسادهم وحيازتهم للأراضي.. قارنه بممتلكات اي كوز من الصف الرابع.. شئ يفوق المتخيل..
ذنب قحت، إنها صنعت دولة محترمة.. عاشها السوداني بعد تجهيل 3 عقود.. وضحت للمواطن السوداني، فشل وزيف شعارات جماعة شيطانية.. مجرمة.. دمرت السودان في فترة 30 سنة.. و أذلت البلاد والعباد.. جماعة بدت عهدها بمسمار في رأس طبيب.. وأنهته بعصا في دبر معلم..
ذنب قحت انها قدمت أمل حقيقي للإنسان السوداني.. ضوء اشتعل لبرهة في وسط الظلام.. ثم أطفأه..الظلاميون، ضوء قال لينا إننا بنستحق دولة حقيقية.. وحكومة محترمة.. حكومة ديمقراطية نقدر ننتقدها.. ونطلع ضدها مليونيات.. دون ان تقتلنا اوتعتقلنا.. وده ياصديقي تهديد حقيقي لطيور الظلام.. فشيطنوهم.. ولا زالوا..
فياصديقي.. دع بانقا يعوي.كالكلب العقور . فهو مجبول على الكذب.. والغباء.. ما تنساق.. وما تكون ضحية بروبغاندا الظلاميين.. ما تسمح لأي كائن يهين ذكاءك.. ويحاول ان يستثمر صوتك كبوق مجاني في عملية دعاية منظمة..
فكر.. شغل مخك.. وقارن الوقائع بنفسك.. وحلل الداتا.. عبر عن رأيك.. أنشر الوعي.. ما تخاف.. وألعن شياطين الحركة اللا اسلامية
#الحركة_الإسلامية_تنظيم_إرهابي منقول من مهند رحمة
10-06-2023, 03:57 AM
adil amin adil amin
تاريخ التسجيل: 08-01-2002
مجموع المشاركات: 37022
قول ليهم القال ليكم منو قحت افضل ما نملك يا مخذولين مشروع حسنين كان جاهز من 2016 علم ورؤية ودستور والعودة للحكم الاقليمي اللامركزي الحركة الشعبية شمال دستور 2005 والمحكمة الدستورية وتنفيذ الاتفاقيات العالقة بسبب البشير شخصيا وخاله في المنطقتين اتفاق نافع عقار 2011 وبناء السلام في كل الاقاليم بمرجعية نفياشا انا عايز بس واحد يجاوب في البورد ده طوالي نباري شيوعي وبعثي وناصري لي شنو ؟؟؟؟ وقاعد بالاميتاز الرخيس ده في راسنا علي شنو من الاساس بعاعيت مايو ديل فاشلين من 1969 وديل اولادهم بس بعدين نصفي الكيزان بي الدعم السريع ليه مش ممكن نصفيهم بالمؤسسات المحكمة الدستورية والمراجع العام والدكلاريسن ودستور 1973 وقوانين 1974 والاعلام الحر المسؤل مش شغل المشاطات في فضائيات الخليج وهو شيوعي وبعثي وناصري لي شنو ؟؟ مركب ليه شريحة لحدي هسة وينا رؤيتو السودانية من الاساس هل هي الوثيقة الدستورية المخستكة2019 ولي سلام جوبا البيض 2020ولي اطاري2023 الاغلف فوكلر مهندس خراب سوريا ؟؟ وعلم مايو القبيح ده بعبر عن منو في االسودان والمؤسسين الاربعة ديل قالو شنو من اتاسست الدولة السودانية مؤتمر الخريجين 1938لحدي الاستقلال 1956 https://dcars.net
وجون قرنق قال شنو مع ناس الصمم الايدولجي توهو الشباب المسكين ساكت
https://dcars.net احسن من القووونات ديل والعولاق ديل نصهم بعثيين عايزين يصفو حسابات مع االمؤتمر الوطني فقط والبشير شخصيا ومرتو وما عايزين ياسسو دولة ولا بعرفو ياسسو دولة كيف ربع دماغ حدهم للفة وصابرين والتسكع في الدول العربية الغبية بس والورجغة في فضائيات الخليج المبهرجة ساكت ياخ من ابحديات الوعي ذاتو تباري رؤية مش فلان وعلان وحمدوك وفشلوك والون مان شو الدولة مؤسسات وليس راعي ورعية وريع ورعاع وفعلا استمر النهب لحدي هسة لذهب السودان من نفس الدول بسبب الفنقليات ديل وبعد يظل السؤال عايزين نوعى ولي نشرمط ؟؟؟
10-06-2023, 05:06 PM
Nasr Nasr
تاريخ التسجيل: 08-18-2003
مجموع المشاركات: 10841
Quote: ذنب قحت انها قدمت أمل حقيقي للإنسان السوداني.. ضوء اشتعل لبرهة في وسط الظلام.. ثم أطفأه..الظلاميون، ضوء قال لينا إننا بنستحق دولة حقيقية.. وحكومة محترمة.. حكومة ديمقراطية نقدر ننتقدها.. ونطلع ضدها مليونيات.. دون ان تقتلنا اوتعتقلنا.. وده ياصديقي تهديد حقيقي لطيور الظلام.. فشيطنوهم.. ولا زالوا..
10-06-2023, 09:13 PM
Hafiz Bashir Hafiz Bashir
تاريخ التسجيل: 12-04-2004
مجموع المشاركات: 7215
Quote: حطمت عبارة (البديل منو) الكانت بتتقال في زمن البشير
المقال برمته يسوق لقحت عبر مقارنتها بالكيزان. المقال دعوة للإلتفاف حول قحت ودعمها للوصول إلى السلطة لأنها أفضل من سئ الذكر. وكأنه يقول ليس بالضرورة أن تكون قحت في مستوى من الأفضلية بقدر ما تستحقون أيها الشعب العظيم. لكن البديل منو؟
10-06-2023, 09:45 PM
كمال عباس كمال عباس
تاريخ التسجيل: 03-06-2009
مجموع المشاركات: 17155
افضل ما تفعله احزاب . قحت هو الشروع في نقد ذاتي لكامل تجربتها السابقة من المشاركة وما تلاها وحل هذا التحالف. والشروع. في بناء. تحالف محدد الاهداف والروي. يتفادي سلبيات التجربة الماضية. وينحاز لمطالب الشارع والثوار - بعيدا عن المشاركات مع العسكر -
10-07-2023, 03:25 AM
adil amin adil amin
تاريخ التسجيل: 08-01-2002
مجموع المشاركات: 37022
حتى في البورد في ناس لسه موهومة بتشوف نحن نكتب كلام فارغ ولافين صينية البديل منو ؟؟؟ ولي البديل شنو يا ربع الدماغ 1- رؤية وعلم ودستور حسنين 2019 2- رؤية الحركة الشعبية والمهدي الثالث جون قرنق 2005 3- اتفافية اديس ابابا 1973 وقوانين 1974 - الحل الجذري للخروج من متاهة السامري الترابي الذى صنع لهم ثلاث عجول لهم خوار من 1978 نميري البشير البرهان 4- الحزب الجمهوري اسس دستور السودان 1955 5- حزب الامة وثيقة استقلال السودان 1953 طلعت الانجليز بمنتهى الاناقة 1956 وبعد 67 سنة من الاستقلال جات القردة تلهو في السوق ويقول ليك البديل منو عايز لي صنم العروبي المازوم البديل صدام حسين وعبدالناصر او خجيجة ام كحل قحت لمة بلامشروع ادوات الامارات في السودان وهم و الدعم السريع والجنرالات ادوات الشركة القابضة المصرية وقحاتي واحد عنده وعي ومعاصر ولي رؤية مافي كان قلت ليه بريكس دي شنو ما بعرفا افق ابعد من مصر والامارات ما عنده السؤال المسنين صديق يوسف وسنهوري ديل قاعدين في الساحة السياسية يعملو شنو ؟؟؟ سببب بلاوي السودان بعد الاستقلال مشاريع الصرف الصحي العربية والمصرية دي الشيوعي والبعثي والناصري من ناحية والاخوان المسلمين والسلفيين من ناحية تانية وزايغين من المواجهة الفكرية مع الاحرار السودانيين وكل واحد فيهم يلهض في فضائية والسؤال قائم نحن في البورد عايزين نوعى ولي نشرمط؟؟؟ لو عايزين نوعى في 5 برنامج سودانية بعد الاستقلال جبتها هنا مليون مرة ,وقلنا ترجع المؤسسات اولا وبي علم الاستقلال وهي 11 مؤسسة 6 في المركز و5 في الاقاليم ونملاها بالمشورة الشعبية فقط لو عايزين نلهث اهو زمان السيد عبدالرحمن بدللكم بي كلاب الحر كلاب الحر الخمسة في السودان والعالم العربي كلب يحسو مواطن الجرب" الاخوان المسلمين " كلب يلهث من فرط التعب"السلفيين " كلب قايل نفسو من العرب "البعثيين" كلب كامل العطب "االناصريين" وكلب بين غفوة وعفوة يهر دون سبب "االشيوعيين " االثورة ما بدت لسه يا ابو الزهور ولم تكتمل اشراطها
10-07-2023, 03:30 AM
طارق عبد الله طارق عبد الله
تاريخ التسجيل: 06-30-2016
مجموع المشاركات: 446
قحت علامة مضيئة في الممارسة السياسية السودانية ورغم قصورها لحداثة التجربة ومحاربة طيور الظلام لها، إلا أنها حققت نجاحا ملحوظا في الملفات الأساسية، الشيء الأساسي بالنسبة لي هو رفض وضعها في كفة مقارنة مع الكيزان والعسكر لأن أخطاءها هي اخطاء سياسية وليست جنائية اجرامية مثل العسكر والكيزان
10-07-2023, 06:00 AM
Hassan Farah Hassan Farah
تاريخ التسجيل: 08-29-2016
مجموع المشاركات: 9196
Quote: دي الفكرة.. استغفل الناس.. أكذب بإصرار.. وسيب كلابك الأسفيرية واللايفاتية التابعين ليك ينشروا الكذبة.. وراهن على جهل بانقا..
Quote: فياصديقي.. دع بانقا يعوي.كالكلب العقور
الكلب العقور هو الكلب المصاب بداء السعر الذي لا علاج له. وداء السعر مبرر كافي لقتل الكلب.
من السهل جداً دمغ كل من يخالف قحت ببانقا. المهم نفس البانقا قد يكون سبق أن اتهمه امن الكيزان بالكفر تمهيداً لقتله او تعذيبه او تشريده لا لسبب سوى لقوله لا. البداية بتشبيه بانقا بالكلب العقور كتمهيد لتجريمه لا يبشر بخير لو دانت الأمور لقحت.
توصيات 1. ما عارف من هو مهند رحمة كاتب المقال ولكن على قحت أن تتبرأ من مثل هذه الخطابات التي تضيق بالآخر المختلف معها. 2. يا زهير عليك الله ما تخم من طرف.
10-07-2023, 09:10 AM
Hafiz Bashir Hafiz Bashir
تاريخ التسجيل: 12-04-2004
مجموع المشاركات: 7215
Quote: حتى في البورد في ناس لسه موهومة بتشوف نحن نكتب كلام فارغ ولافين صينية البديل منو ؟
اوعك يا جنكيز تكون فهمت "البديل منو؟" دا سؤال مني أنا. "البديل منو؟" دا ملخص المقال المنشور كما اراه أنا. أو بمعنى تاني أن قحت تمارس نفس ما كان يفعله نظام البشير في التسويق لنفسها بتكرار نفس السؤال "البديل منو؟".
10-07-2023, 10:12 AM
نعمات عماد نعمات عماد
تاريخ التسجيل: 03-08-2014
مجموع المشاركات: 11404
Quote: افضل ما تفعله احزاب . قحت هو الشروع في نقد ذاتي لكامل تجربتها السابقة من المشاركة وما تلاها وحل هذا التحالف. والشروع. في بناء. تحالف محدد الاهداف والروي. يتفادي سلبيات التجربة الماضية. وينحاز لمطالب الشارع والثوار - بعيدا عن المشاركات مع العسكر
سلام أتفق مع الأخوة كمال و حافظ . ربما كانت قحت هي أفضل ما عندنا في ٢٠١٩ .التجربة أثبتت إن أفضل ما عندنا لا يكفي لتفكيك الإنقاذ و مليشياتها.بعد ٤ سنوات و بعدما إنقسمت الإنقاذ الى ٢ متحاربين .هل إعادة نفس تجربة قحت كافية لإنقاذ المواطنين من جرائم الحرب و هل تكفي نفس التجربة لبقاء السودان موحداً؟ و لماذا لم ينجح تحالف المدنيين مع العسكر؟ماذا كان ينقص المدنيين لكي ينجح الإنتقال الديمقراطي؟ نحن لسنا في إنتخابات حتى نتحدث عن مزايا قحت مقارنة بالكيزان أو الجنجويد لكننا في مرحلة لا تحتمل المجازفة بتجربة المجرب من تحالف قحت مع العسكر أياً كانوا جنجويد او كيزان. هل منبر جدة يعني تفاوض الكيزان و الجنجويد و الحركات المسلحة و قحت ؟ هل هذا يعني استمرار نفس الصراع القديم على السلطة في الفترة الإنتقالية؟
10-13-2023, 06:53 AM
adil amin adil amin
تاريخ التسجيل: 08-01-2002
مجموع المشاركات: 37022
البديل ذاتو انواع يا حافظ في بديل واعي وفي بديل مخستك البديل الواعي للانقاذ كلها 1989-2023في السودان من مؤتمر الخريجين 1938 لحدي الليلة 2023 هو الخمسة ديل
Quote: البديل منو ؟؟؟ ولي البديل شنو يا ربع الدماغ 1- رؤية وعلم ودستور حسنين 2019 2- رؤية الحركة الشعبية والمهدي الثالث جون قرنق 2005 3- اتفافية اديس ابابا 1973 وقوانين 1974 - الحل الجذري للخروج من متاهة السامري الترابي الذى صنع لهم ثلاث عجول لهم خوار من 1978 نميري البشير البرهان 4- الحزب الجمهوري اسس دستور السودان 1955 5- حزب الامة وثيقة استقلال السودان 1953 طلعت الانجليز بمنتهى الاناقة 1956 وبعد 67 سنة من الاستقلال جات القردة تلهو في السوق ويقول ليك البديل منو عايز لي صنم العروبي المازوم البديل صدام حسين وعبدالناصر او خجيجة ام كحل
وضايع بين الجهل النشط ايتام الترابي 1989 والجهل المتغطرس ايتام بابكر عوض الله 1969 كلاب الحرة الخمسة المالين البورد ومغطين دقنم وفي السودان ما يتجاوزو 5% من المشهد الجماهيري الحقيقي
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير ابو الزهراء
adil amin
Nasr
Hafiz Bashir
كمال عباس
طارق عبد الله
Hassan Farah
نعمات عماد
فيس بوك
تويتر
انستقرام
يوتيوب
بنتيريست