🟥 طبيعي أن تمارس مليشيا غير منضبطة كل أنواع الانتهاكات، ولكن أن يأتي الجيش النظامي - العمرو ١٠٠ سنة - بنفس الانتهاكات والفظائع بتاعة الجنجويد، فده (الما طبيعي).
🟥 منذ تشريدنا من بيوتنا قبل شهرين ونحن نمني أنفسنا بالعودة، بعد أن نزحنا لمناطق يقال (أنها أقل خطورة) لأنو حرفيا ماف منطقة آمنة، ولكن فوجئنا بأنها (مناطق مقفولة) شغالة بقوانين الانجليز، الداخل لها (مفقود) والخارج منها (مولود).
🟥 معلوم أن منطقة أم درمان شمال من (قسم ودنوباوي) حتى منطقة (وادي سيدنا) كلها تقع تحت سيطرة (الجيش)، وهي المناطق التي لاذ لها غالبية (أهل أم درمان القديمة)، بحثا عن الأمان المنشود.
🟥 لكن عوضا عن ذلك شاهد أهل أم درمان حلقة مكررة من مسلسلات النهب والضرب والسلب والتحرش بالفتية والفتيات والجرائم التي ارتكبها الجنجويد في حقهم، ولكن هذه المرة على أيدي حماة العرض والدين والوطن (القوات المسلحة السودانية)، وكان راجل (افتح خشمك)، لا مجال لأن تخرج إلى الشارع أو تمر بارتكاز (ديش) دون أن يتم (شفشفتك)، وإذا (لاويت) وعملت (راسك كبير)، تتملي حبل زي ما قالت (بت الماجدي)، وبعد ده تتشفشف، يعني يبقن عليك اتنين (نيلة وشرطة فنيلة).
🟥 أنكى الأوجاع إنو بقينا الأيام دي نشوف حاجاتنا (تلفزيونات، ثلاجات، بتوجازات، اثاث، ... إلخ) مشحونة في كوارو وتكاتك ودفارات وركشات، ماشة أسواق (ود الحلمان) نواحي الشنقيطي وصابرين وال(١٧) وال(٣٠)، والله يقدرك قول بغم.
🟥 الأيام دي ظهر شغل متخصصين كهربجية وميكانيكية للعربات شغالين مع (الديش)، ولانو الحركة صعبة ديل بشفشفو الاسبيرات الغالية، وبخلو العربات عبارة عن هيكل، واشتغلوا في مكيفات الجامعات الفي شوارع النص الوادي الشنقيطي فك زي الفك (التقانة الإسلامية الخرطوم القرآن الكريم) عدموها طفاي النار، والغريبة كل الجامعات دي يا (ارتكازات) قناصة يا (منصات) مدفعية، يعني الشغل تامي مع الديش.
🟥 الأغرب من ده تفكيك الكفتيريات ومكن الشاورما وأفران البيتزا ومكن الفراخ والثلاجات وثلاجات العرض، يعني تعب ناس (مساكين) عمرهم كلو شغالين في طبالي يا الله يا الله الواحد عمل ليهو محل، ياخ ديل حتى الترزية وبتاعين الأقمشة عدموهم (الطاقة) في الشوارع الشافتها عيني (الوادي الدومة الشنقيطي كرري النص).
🟥 بقت في (كنتة) جديدة دخول الحلة بالمسا ومداهمات على شاكلة في قناصة، تتم شفشفة التلفونات وما غلا ثمنه، والله يقدرك (تفتح ميتينك)، طوالي تتربط وتتجدع في أقرب حاجة متحركة يودوك مراكز الاعتقال، وأغلبها (أعيان مدنية)، مدارس، وشقق، ومركز مستشفى الأمل كان معتقل الجهاز جمب المستشفى السعودي، ومحلية كرري، وقسم الرابعة.
🟥 وقصة احتلال البيوت والأعيان المدنية دي قصة كمان، هل تعلم إنو أي شقة في عمارة عالية في كل الشوارع اتذكرها ليك دي، ساكنين فيها جياشة سكن عديل، وقايد القطاع بتاع الوادي ده قالو اسمو جنابو وليد من اولاد ابو روف، صاحب ياسر (كاسات)، وزول قعدتو، المهم الزول دي يا مؤمن متسنتر في شارع الوادي الآمر الناهي، وشغال مع الشفوت ديل (أبو القاسم) وعايش دنيتو صاح.
🟥 في السابعة في واحد اسمو (محمد عبدالله بقولو ليهو جبرة)، ده كان ضابط في جهاز الامن، اسي يا مؤمن يا مصدق ولا قائد كتيبة البراء بن مالك، عامل شغل براه، وداسي (شريحتو) في اي زول، ومخوف شباب الحارات الجمبو بقو يا مستنفرين يا فارين.
🟥 تعال شوف التاسعة وال ١٣ ديل الكيزان اللبدو طوال فترة الثورة جو طلعو للناس لسانهم، ولو راجل ارفع راسك عاين لواحد فيهم، شغالين بمزاجهم، تحت مسى العمل الخاص، وفي دي ضبحوا أولاد شغالين في افرام وواحد ما عنده علاقة بالجنجويد، بس لأنو من قبيلة معينة، القصة دي في كلامي وكلامكم ده مستمرة.
🟥 تعال شوف سلوك الضباط القاعدين في ارتكاز صينية الجرافة، ديل عديل المرة الفي الركشة ولا الماشة برجليها، يقابضوها عادي، وكدي ما تديهم رقم تلفون، يا ناس ديل ما جيش عقار ديل لابسين كاكي عديل والواحد مرات يكون متفشخر بعلامات المظلات والصاقعة، يعني لا الجندي نافع ولا الضابط فيهو رجا.
🟥 الكارثة إنو في سلاح كثير جدا اتوزع لمراهقين وشفع ومدمنين، ومجرمين، ديل بقو شغالين عمليات جووووا الحلة، ومعاهم حكمدارات من الجيش، تتكلم تقول في مخالفات الحنك القصير، (ديل جيش عقار)، المهم القصة دي حتفرتق البلد وحتولد مرارات للقيامة ما تتنسي.
🟥 المستشفيات شغالة مستشفى (النو) ودي بقت شايلة أم درمان القديمة والثورات وغرب الحارات لحدي صابرين، لكن الأولوية في العلاج للجيش، بقت زي السلاح الطبي، والله يقدرك احتج على دورك ولا انت جيت أول، تتردم وتترجم وتتصنف دعامي.
🟥 وقلة الأدب الجديدة، الأيام دي فكو فينا شفع الكتائب الجهادية، مفتكرين نفسهم في أحد ولا خيبر، أي جامع بعد الصلاة ينط ليك واحد حافظ ليهو آية وحديث وما فاهمهن، والله يقدرك (تطلع) قبل ما يتم (كلامو الفارغ) طوالي انت طابور وداعم للمليشيا، ديل كرهو الرجال الجوامع.
🟥 تعال شوف المدارس كل المدارس اللي منعو تحويلها لدور إيواء بقت منصات مدفعية (موجهة)، مع العلم إنو للمدارس دي كلها أغلبها جوووه الحلة (شبرين، ومدارس الثانية، والرابعة، والأولى، وماجك لاند وجامعة القرآن الكريم والإسلامية والتقانات كلها، ومستشفى تبارك للأطفال والمستشفى الصيني والرباط كلها بقت ارتكازات قناصة، منطقة البلك (المستشفى ومبنى المحلية والقسم) منطقة عسكرية.
🟥 مستشفى الروضة لأنو عالي ده ثكنة وسكنات للقناصة بتاعين الوادي، وديل غالبيتهم أولاد حلة لكن (وا خسارة أولاد الحلة)، اشتغلوا ارشاد ودلالاء على زملانهم أولاد اللجان الرفضو (حنك) الاستنفار.
🟥 المجموعة الشغالة بزنزس صاح ديل ناس الاغاثات، اشتغلوا مع المنظمات البتستلم من الجيش وشغالين بيع للأحياء ولدكاكين الاجمالي، أظرف شيء باعو سكر لبتاع مصنع باسطة في الأولى بالنهار. بالليل جو داهموه شالو السكر، واتهموه إنك متعاون مع المليشيا، يا عمك الزول ده اتفرك فرك الجن لليوم ما قام من السرير.
🟥 المهم نحن للآن شهرين وزيادة بنمني روحنا نرجع بيوتنا (عفوا خراباتنا)، وظاهر ما حنرجع قريب، والله يستر على أم درمان شمال ومحلية كرري، الأيام دي الضرب مستمر بالساعات، والقصف من وإلى بصورة شبه منتظمة، وعنيفة جدا، القصة دي اذا ما وقفت ما حيكون في أم درمان لا قديمة ولا جديدة وما أظن لقدام يكون في سودان زاتو.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Yasir Elsharif
فيس بوك
تويتر
انستقرام
يوتيوب
بنتيريست