الاخ بكرى البكرى وكل الاخوه السلام عليكم قرات البوست التالى ولم استتطع الكتابه من شده الدموع والبكاء على حال الاهل فى السودان الاخ بكرى البكرى وكل الاعضاء ارجو تكوين لجنه وارسال كل المبالغ من الاخوه الافاضل والاخوه القراء وكل من يقرا البوست عايزين ارقام حسابات بنكك لناس معروفين بالصدق فى مدن مختلفه فى الاماكن التى فيها العوز والمرض والجوع بالله عليكم توصل الفكره لكل من تعرفون وذلك اضعف الايمان تبرعوا بما تقدرون عليه عليكم الله الوضع صعب واوضع لايتحمل والله والاخوه من خارج القروب المغتربين من احياء مختلفه ومن مدن مختلفه ممكن الناس تجمع مبالغ من كل المغتربين ومن الذين لديهم امكانيه المساهمه والتبرع ممكن يقوموا بمبادرات فى القرى والاحياء التى لهم فيها اهل ومعارف محتاجين للمساعده وانا اعلم ان كل من فى السودان الان يريد المساعده والله ياناس الحقو اهلكم الجوع كافر نتيجة النزوح..زيادة واضحة للوفيات وسط كبار السن ولا من مغيث ✍️خالد ضياء الدين 🎯حرائر الخرطوم يتسولن في شوارع الولايات وبكل تأكيد مافي أسوأ من حالهن واسرهن الا حال المهجرين والمهجرات في دول الجوار خاصة تشاد. شاهدت بنفسي وغيري آلاف بكونو شافوهن وعرفوهن من ملبسن وطريقة كلامن،بتلقاهن بعد المغرب يتلبدن يشحدن الناس في اسواق وشوارع الولايات..بختارن الزول الممكن يديهن :السلام عليكم ياعمي نحن والله محتاجات ظروفنا صعبه شديد لو ممكن تساعدنا.. انا شخصيا حصلت معاي وانا واقف للمواصلات بنتين ماكنت مفتكر ابدا انهن يتسولن ولكن كيف لا والايجارات ب500 الف وبعضها تجاوز المليار؟! كيف مايتسولن وصابونة الغسيل وصلت الف جنيه وظرف الصلصة ب300 واسعار المواد التموينية كل يوم في زيادة؟ كيف ما يتسولن والمدارس في الولايات إتستفت نازحين من الخرطوم،كذلك السكن الشعبي الفي اطراف الولايات(لاكهرباء ولاماء ولا متاجر قريبة)منسيين هناك كانهم في مراكز عزل صحي (كرنتينة). بعض الاسر المتعففة بنت رواكيبها في اطراف المدن والميادين الخالية، والخريف بدق في الابواب؟ كيف مايتسولن وعضام الضلوع بدت تظهر والشحوب والبؤس بادي في الوجوه والوفيات وسط كبار السن زادت من سوء التغذية وعدم القدرة على مواصلة العلاج؟ كيف مايتسولن والدواء تضاعفت اسعاره ولقمة العيش بقت غالية وكل الناس حالها واقف حتى ناس البلد الفتحو بيوتهم للاهل والمعارف من اول ايام الحرب هم ذاتهم ضاق بيهم الحال،الفي يدهم إنقطع وسنامهم جف وظهر التململ وكترت الشكية بعد طول إحتمال وصبر "ربنا يجزيهم الف خير"؟ كيف مايتسولن واخوانهم الصغار في البيت منتظرين شاي الصباح والفطور والمضاد الحيوي؟ المهم ياشعب ياسوداني خاصة القاعدين في الخليج وامريكا وغيرها اوصيكم، بالله عليكم اتفقدو اهلكم ومعارفكم وماتكتفو لمن الواحد يقول ليك نحن كويسين الحمدلله ماعندنا عوجة،كويسين كيف وهم نازحين لامرتب لاشغل ولا سكن..كويسين كيف والقاعدين في الخرطوم لا شغل ولامشغلة وغير التهديد كل ثانية بالموت عندهم مشكلة في توفير الاكل والشراب والعلاج،وبراكم بتقرو وتسمعو عن فلان وعلان الماتو جوع،،معقول يااخوانا الناس تموت جوع ونحن بنسمع في الخبر ومايهز فينا شعرة ومانتحرك ولو بالقليل؟ اسمعوها مني، مافي زول اثناء الحرب والنزوح كويس،الناس محتاجة للعشرة الف ماتقول ماعندي قروش ارسلها..رسل ان شاء الله حق وجبة واحدة..رسل ثمن بخاخ ازمة اوحقن انسولين او حبوب ضغط وقلب،الناس محتاجة الف جنيه تشتري بيه عيش ياكلوه بي حبة ملح ويشربو عليها موية. في تطبيق بنكك لو زولك ماعندو بتلقى زول يوصل ليه تمن وجبة السخينة..ماتقول شوية،الشوية الإنت شايفها دي ممكن تنوم اسرة شبعانة فول وعيش وباكر ربك بفراجها متل ما سخرك إنت وفرجها بيك الليلة . عارفييين انكم مابتقصروا وحملكم تقيل ومن زمان ياكم شايلين التقيلة بتلحقو العيان وبتمو الفرح وتنصبو خيمة البكاء،والبلد اصلا كانت متحركة بيكم إنتو المغتربين قبل الحرب، لكن كمان الليلة جات حوبتكم الجد جد،استرو البنات الطلعن يفتشن لقمة العيش وابعدوهن عن سكة ضعاف النفوس"الله يستركم" شبعو البطون الجاعت واسندو الكبار البدينا نفقدهم شوية شوية، ومافيكم زول ينتظر حول الذكاة{مافي حول ياناس} طلعوها قبال تتم الحول وقسموها وزيدوها من عندكم صدقة،وبرو اهلكم وحتى المابتعرفوهم الحقوهم،ربنا يخدر ضراعكم ويزيدكم من نعمه،انتو قدرها واكتر وياها المحرية فيكم. عارفنكم والله تعبانين وظروفكم صعبة وحملكم تقيل وزاد بعد الحرب،لكن إذا ممكن الواحد منكم يفط وجبة او ينقصها من قوت عيالو المعاه هناك اليعملها ويرسلها لعمه او خالته او جارتهم ام اليتامى،والمثل بقول(نواية البلحة بتسند الزير)ولو ممكن وانت في امريكا او الخليج تاكل وجبة تكلفك مايعادل 500 جنية سوداني وتوفر باقي قروش وجبتك وترسله لي زول محتاج تكون ماقصرت تب، وزي ماقلت ليك ماتقول شوية(عيب الزاد ولا عيب سيدو). الحقو ناس الخرطوم القاعدين فيها والنزحو منها،وناس دارفور الإتشتتو،والله وبالله اوضاع الناس فاتت الحد وخلااااص الرهيفة انقدت فما تنشغلو لي بالجيش بل الدعامة والدعامة جغمو الفلول،ركزو في الاول في حال المواطنين وفي اهلكم ومعارفكم.. الحقوهم مرة ومرتين وتلاته بالقليل المستطاع المستمر لحدي ماتنقشع الازمة،الناس هنا تعبت شديد مقضين نهارهم وجع وليلهم دموع،والبشحدن ديل والجيعانات ديل عندهن اولاد عم وخال واخوان وما بعيد اختك وبت خالتك وقريبتك تكون واحدة من المضيومات البتسولن ديل "ممكن جدا واحتمال كبير" انت مفتكر لمن تتصل وتسأل خالتك النازحة او المحاصرة في بيتها في الخرطوم وتقول نحن كويسين بتكون فعلا كويسه..انت منتظرها تقول ليك بتي بتمرق المغرب تشحد عشان ناكل؟ياناس البنات بقن موجودات في مناطق ارتكازات الجيش والدعامة يبيعن في الشاي والجبنة ويتقاطعن بهناك في مناطق الخطر والموت وسط الجنود،عارفين ليه؟؟؟؟ لذلك الحقو اهلكم قبال تسمعو فيهم الشينة وقبال الفاس تقع في الراس... ياناس(إتقو النار ولو بشق تمرة). الا هل بلغت اللهم فاشهد ..الا هل بلغت اللهم فاشهد..الا هل بلغت اللهم فاشهد☝️
السلام عليكم الاخوه الاعضاء والاخ بكرى ابوبكر وكل الساده القراء وكل رجال البر والاحسان من يقروا البوست ارجو منكم التبرع بما تجود انفسكم ولو بدينار درهم جنيه دولار يورو اى شى وترسل التبرعات فى حسابات بنكك لى ناس ثقه من معارف الاعضاء فى مدن مختلفه وممكن ترسل القروش ويتم شراء وعمل مبادرات فى بعض الاحياء والقرى والمدن المحتاجه مثل مبادره قدره فول كل يوم ع عشره رغيفات وسعر شوال الفول 70 الف جنيه والعيش يتفق مع افران الاحياء المختلفه فى المقام الاول نشوف من الاخوه الاعضاء التبرعات وطريقه ايصال التبرعات عن طريق بنك اوتحويلات ويسترن يونيون او عن اى طريق ساهل للناس الفى السودان وانا عارف ان هناك اعضاء ومعارف ثقه فى السودان ممكن الناس تعتتمد عليهم يلا نبدا على بركه الله ونشوف الناس بتقدر تعمل شنو فى انتظار الردود والتشاور فى الامر وربنا يبارك فيكم كل على حسب الاستتطاعه لا يكلف الله نفسا الا وسعها
08-31-2023, 09:28 PM
مصطفى نور مصطفى نور
تاريخ التسجيل: 05-13-2022
مجموع المشاركات: 5019
فى انتظار الراى والله ارجو من الاخوه الاعضاء ان يناقشوا الفكره والراى كيف فى ان نقدر ان نساعد الاهل والناس فى السودان الوضع لايتحمل الطناش الموضوع اانو الناس تحاول تساعد بقدر الاستتطاعه انا والله فى هم وحزن على ما ال اليه حال الناس بالله عليكم الرد والتشاور فى الامر مع تحياتى مصطفى نور
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
مصطفى نور
فيس بوك
تويتر
انستقرام
يوتيوب
بنتيريست