ما تشيلَكْ الهَاشْمِيَّة فِي زَغْرُودَة أوْ هَزَّة ضُرَاع لمْنُو بْيَغِيب عَقلك يَفُـوت لمنو بتموت ******** مَعدومَة سَاحات الكِتَال والناس تَمُوت بالصَّوَارِيخ الهِنَاك بالشظايا المِن سِلاحك بي هنا مَوتُورة أسْبَابَ الهَلَاك لا تْغَيـِّب الشُّـوف بالطَّشَاش بِي دَانة طايْشَة وُانْتَ طاش لمنو بتموت ********* لمنو بتعمِّر للسلاح لمنو بتدمِّر في البلد لمنو بتموت
لمنو الحرب لمنو الضَّرِب لمنو بتموت ********** لا تشيْلَك الهاشميَّة فِي هَزَّة ضُرَاع أصْلُو الحَرِب تَدمِير مُدُن وُضَياع أُسَر وُخَرَاب بُيُوت لمنو بتموت ********** وعشان منو كلَّ البَلَد أصبَح حَرِيق عشان منو قَـفْـل المَنَافِذ وَالطَّرِيق وَالشُّــفَّع البَايْـتِين جِيَاع مَا فَـكُّـوا رِيــــق نَفْــس الدُّيوش الْجُو القِيَادة بتباهو بي كَـتْـلَ النفوس نفس الأباليس نفس الدَّبَالِيس الملاقيط كوم مرارة يا مرارات التويس والكانوا لابسين زي بواليس جنجويدهم والجنادب الاجنبية سحقت كل الساحلي القيادات الثعالب بالمقالب واجهت حرب البسوس لمنو بتموت
العقول الفاقدة حوبة يا دعا الحبوبة في زمن العقوق شهقت مشرقة بِالقِبَل لمَّ انكشف حال الشرف ضاقت على الناس السُّبُل عيَّانَة حبوبة وبِـتَـنْدَه غرقانة في بحر المهانة كل القيادات في الفشل يا المن متين منهوبة يا كل الحقوق في حضرة الباطل البطل وصِبحتَ باطل يا بطل لمنو بتموت
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
علي تولي
فيس بوك
تويتر
انستقرام
يوتيوب
بنتيريست