بمناسبة مرور خمس أعوام على نشر هذا النص الباتع في الزمن الجميل:
جك الفول:
سنة أربعة وتزعين كنت شغال في شمبات المرسى، ومؤجر في شمبات الأراضي مع صديق صيدلي اسمو عماد عبد العزيز عندو هايلكس موديل تزعة وتمنين. تقريباً تقريباً، كل يوم بعد المغرب ما عدا الخميس والجمعة، كنا بنمشي نزور صيدلي تاني بأبي روف إسمو نادر حُسين إبراهيم، بيتم فاتح على البحر. بمجرد وصولنا لبيت نادر قاعدين نلقى الكراسي مطلعة قدام البيت، والواطة مرشوشة، والشاي باللبن جاهز. أول ما باب الهايلكس بتاع السائق ينقفل؛ صوتو بجيب حسين الصغير ود أخت نادر لبرا البيت ومعاهو ألعابو وبطلع ضهر البوكس يلعب. حسين دا، كان عندو ميزة في كلامو وهي إدخال كلمة "جنّكم" في أي جملة يقولها، مثلا: أول ما نكب الشاي يقول بنص إنتباه وهو بلعب في ضهر البوكس: جنّكم تشفطوا الشاي باللبن! أو أول ما نكورك لعمك بانقا بتاع الدكان عشان يصلح الفتة، يقول: جنّكم تضربوا الفتة بالزيت! أو أول ما نبدأ الونسة، يقول: جنّكم تتونسوا بالدويات (الأدوية)!
استمرّ هذا البرنامج بنفس هذه التفاصيل لثلاثة شهور إلا انو كان في تفصيل آخر شال ملل التكرار وساعد على إدماني للروتين دا، وخلى الأحداث دي ممكن تبقى موضوع ونسة تتحكي، وهو خروج رحاب عصام العاقب بت جيران ناس نادر متلفحة بتوب الصلاة وشايلة جك بلاستيك أصفر تجيب فوقو فول من بانقا. كان حسين الصغير ينبهنا بمرورها بقوله: جنّكم تشتروا الفول فوق الجكاكة! طبعا الزمن داك، الصعلكة لسع ما كانت تمكنت، وكونك تشوف ليك بنوتة بهذا المشهد الرومانسي المتكرر؛ بتحبا بتحبا... واحد ح يقول لي ما دام عشتوا زمن قبل التمكين، كيف عرفت اسمها بالكامل؟ مرة، بعد فتات كتيرة، أصريت أدفع، وأنا بحاسب في عمك بانقا خليت ليهو الباقي وسألتو عنها حتى كمان قال لي باقي ليها شهر تتخرج من كلية الاداب، جامعة الخرطوم لغة فرنسية.
آخر أربعاء جينا فيها راجعين من أبي روف كانت باردة وتخيلت نفسي حزينا، لا أدري بسبب كآبة البرد ولّ غياب رحلة رحاب من البرنامج لأكثر من أسبوعين؟؟ يوم الخميس العصر عماد جدع لي مفتاح البوكس وقال لي: عليك الله، يا بلبل* قبل تمشي السينما أغشى بيت ناس نادر رجع لعبات حسين الصغير النساهن في ضهر البوكس أمس، لانو لو إنتظرن للسبت؛ بجننا، وأخوك عارفو جبان ما بقدر يتخلف عن خميس بيت الخالة وبتّها بالصافية!! قلت ليهو: جنّكم تلخبطوا للناس سينماتم بحبكم! وقفت العربية قدام بيت ناس نادر ويجي حسين من بعيد قاشر ومعاهو أصحابو شايلين قزاز الببسي، وطلع نزّل لعباتو وهو جاري قال لي: جنّكم تشيلوا لعبات الاولاد الصغار! قلت ليهو: حسين، أقيف، دا، عرس منو؟ قام جاري ما اشتغل بي. مشيت الدكان وقبل أسأل بانقا قال لي: صاحبتك قلت ليهو: جنّهن يعرسن بدون يكلمننا! اليوم داك بدل السينما قعدت في كبري شمبات أُراقب إنعكاس أنوار الزينة على شاطئ أبروف. انتهت ـــــــــــــــــــــــــــــــ * اسم الرآوي في القصة نبيل
07-07-2023, 05:38 AM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3480
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أبوبكر عباس
فيس بوك
تويتر
انستقرام
يوتيوب
بنتيريست