|
|
 كعلماني أنا ضد علمانية حميدتي
|
04:20 PM June, 23 2023 سودانيز اون لاين
ياسر ضحوي-
مكتبتى
رابط مختصر
وها هي الحرب لا تزال تستعر , ويستمر القتل والسرقة وفيديوهات إنتهاك الأعراض بدأت تنتشر , لا زالت أخبار القصف والحرب والمناوشات والإشتباكات تستمر ... ترى على اليوتيوب فيديو يبشرك بإنتصار الجيش وبل الجنجويد وجغمهم , يليه فيديو يحكي شخص معاناته من إنتشار الجنجويد ونقاط إرتكازهم وسيطرتهم , ولا زلت على موقفي الأول أنني ضد الجيش وضد الدعم السريع .
قررت كعادتي حين أعجز عن الوصول لخبر جديد بأخذ جولتي في برنامج كلوب هاوس , برنامج الكلوبهاوس بالنسبة لي هو مدخل لعالم الناشطين السودانيين , أقلية صاخبة تحاول أن تحرك أغلبية صامتة أو فلنقل حائرة ... قلت في نفسي لعل وعسى أجد قريباً لأحد اللواءات أو ناشطاً في كيان سياسي يعرف ما يحدث خلف الأبواب المغلقة والمكالمات السرية أجد عنده ما لا أجده في قنوات الأخبار العالمية .
وفي دخولي لعالم رومات الكلوبهاوس في اليومين الماضيين كان الحديث عن فيديو الإغتصاب اللذي هز الشارع السوداني , وطبعاً سمعت نفس الكلام المعاد اللذي اسمعه مع كل من ناقشته في هذا الأمر ... الجديد في الأمر كان الإتهام المباشر لنا نحن اللذين اعلنا الحياد ووقوفنا ضد هذه الحرب , وأننا في حقيقة الأمر دعامة متنكرين نخجل من المصارحة بولائنا للقاتل حميدتي ... ويسألون : كيف تساوون بين الجيش والدعم السريع وقد رأيتهم فيديو الإغتصاب الشهير ؟!
مشكلتنا يا عزيزي اننا نتذكر , ذاكرتنا قوية ... لا نعاني من قصر الذاكرة والنظر كما يعاني الكثيرون , لا نزال نذكر الجملة الشهيرة المنسوبة لعمر البشير : لو الجعلي اغتصب الدارفورية فهذا شرف لها , لا زلنا نذكر الإغتصابات التي تمت في مجزرة القيادة العامة أمام مقر جيشنا جيش الهنا , ونعلم جيداً أن الدعم السريع الذي دعمه الجيش بالمديح والسلاح والكوادر أنها ليست أول مره يقتل فيها أو يسرق أو يغتصب أو يرتكب جرائم الحرب ... إن ما تفعله هذه المليشيا هو إمتداد لتاريخها الطويل من القتل والنهب والإغتصاب في مناطق الهامش , كل الفرق أنها هذه المره تحدث في الخرطوم .
إنها إستراتيجية الديكتاتور التي لا تخيب , عمر البشير وحكومة الإسلاميين دمرت الهامش والأموال التي كان بإمكانها إعمار الهامش تم إستثمارها في القصف بالأنتينوف , ثم قال البشير وزبانيته : إن ثرتم علينا سيأتي الغرابة والجنوبيون ويدمرونكم فنحن خير منهم ... والإستراتيجة تتكرر الآن , مليشيا الجيش وضعت يدها في يد مليشيا الدعم لسنوات طوال , ارسلوا رتبهم لتعمل في صفوف الدعم السريع , باركوا لهم جرائمهم في الهامش السوداني , أقفلوا أبواب القيادة العامة ليأتي الدعامة ويقتلوا ويغتصبوا الثوار الأبرياء ... ثم يلقوا الجثث والحجارة مربوطة في أرجلهم في قاع النيل ... ثم يقول شيعة الجيش بعد فشل الجيش الذريع في حماية الأبرياء مرة أخرى أنه يجب أن ندعم الجيش الوطني !
ندعمه كيف ؟ طيب بالنسبة لمجزرة القيادة ؟
ياخ في النهاية دي مؤسسة وطنية لكن الدعم السريع مملوك لأسرة ! لا يمكن إصلاحه ! يعني بإختصار الجيش عارفين مشاكله لكن الجيش أخير من الدعم السريع ... وللأسف هذه هي الخيارات المتاحة للشعب السوداني , جيش فاسد أو مليشيا مجرمة .
طيب يا أخوانا ليه الجيش ما إنتصر لحدي هسه ؟ ما قادر يحسم الجنجويد ؟
لا هو قادر لكن قيادته فاسدة , في جنود كتار بالآلاف في معسكرات كتيره ما دخلوهم المعركة
ليه ؟
لأنه القيادة الفاسدة دي ما دايره تحسم المعركة , دايره تضغط الجنجويد عشان يخلوهم في موقع ضعف في التفاوض
يعني إنت عايزني ادعم الحرب وكيان فاسد ما عايز يحسم المعركة اصلاً ؟!
يا زول إنت جنجويدي وبعد نخلص من الجنحويد حنتلفت ليكم يا طابور خامس !
ما تقدم كان حواراً في إحدى رومات كلوبهاوس تم بعدها طرد أخوكم الجنحويدي , نسأل هل الجيش فاسد فيردون أنه جيش وطني عظيم مخلص ... لكن قيادته فاسدة , لقد اقفلوا مخازن السلاح حين قتل الجنجويد الثوار في القيادة , وغالباً المفتاح ضاع , والمؤسسة دي رغم مشاكلها لازم نصلحها !
ممتاز , نصلحها كيف ؟!
ياخ الجيش ده في كمية كبيرة من الشرفاء لكن الأحزاب طنشتهم لمن قيادة الجيش الفاسدة طردتهم وحولتهم للمعاش
كدي بغض النظر عن إني ما عارف عايز الأحزاب تعمل شنو لكن أنا مافي حزب في السودان أنا عشمان فيه , أها نرجع لموضوعنا ... الشرفاء ديل كم ووين وندعمهم كيف ؟
ياخ إحنا في حرب وده ما وقته يا جنجويدي ياخ !
وتظهر هنا إجابة كل المشاكل في السودان , إجابة ده ما وقته ... نسقط الكيزان الآن , بعدهم نحكم السودان كيف ؟ ده ما وقته , لازم نبيد الجنجويد الآن , طيب والجيش السمح ليهم يصلوا المواصيل دي وفشل في حماية الشعب نتعامل معاه كيف ؟ ده ما وقته ... ووقته ده حيجي متين بالجد انا ما عارف
وبعد طرد أخوكم الطابور الخامس من الغرفة الثانية من الكلوبهاوس وجدت غرفة يديرها أحد أعتبره أحد اصدقائي تدعم الدعم السريع وتدافع عنه وأن فيديو الإغتصاب فيديو مفبرك !
بعد صدمتي من تصرف هذا الصديق دخلت الغرفة وإتيح لي الحوار مع هذا الصديق :
يا ياسر ضحوي كيف حالك
الحمد لله يا ت , ياخ معليش داير اسألك سؤال
إتفضل
ياخ إنت بتدافع عن الدعم السريع كده ليه ؟ ليه إنت شايف إنهم أحسن من الجيش يعني ؟
إنت بتدعم الجيش ؟!
أنا ضد الإتنين
طيب فيديو الإتصاب ده مضروب
مضروب ليه ؟ الدعم حيدينا العذر الثابت بتاع زول لبس هدومنا الإستخدموه في مجزرة القيادة ؟
لا , زول قاعد يغتصب ... يصور نفسه ويجيب التهمة لروحه ليه ؟
يا حبيبنا ما صوروا نفسهم في مجزرة القيادة وهم بيدقوا الناس ويقولوا ليك كورك مدنية ولا عسكرية ؟ حصل ليهم شنو ؟
ياخ ديل جياشة بيحاولوا يخربوا سمعة الدعم السريع , يعني الجيش ده ما بيغتصب ؟
أكيد كل جرائم الدعم دي الجيش بيعملها وبيباركها بدليل شراكتهم معاهم كل السنين دي , لكن ليه الدعم أحسن ؟ ما هم الإتنين واحد ... فليه أدعم الدعامة ؟
لأنه حميدتي حيجيب لينا العلمانية
شنو ؟
ياخ إنت ما لاقاك بيان حميدتي ؟ حميدتي قالها واضحة إنه ضد الإسلام السياسي وحيعلنها علمانية , لو الجيش إنتصر حيجيب لينا الإسلاميين ... فهمت أن بدعم حميدتي ليه ؟
طيب فهمت وجهة نظرك , لكن عندي سؤال ؟
إتفضل
ياخ إنت عارف إنه حميدتي في الفوضى الإسمها سودان بقى غول وبقى دولة داخل دولة ... بقى عنده جيشه الخاص وجبل دهب يشيل منه ويصدر , هل إنت مقتنع إنه فجأة حيدخل الدهب ميزانية الدولة وجيشه جيدمجه في جيش الدولة ويبقى موظف عادي في الدولة ؟
قصدك شنو ؟
ياخ حميدتي في قطاعات من السودانيين بيدعموه دعم قبلي أو مناطقي , لكن برضو في قطاعات عريضة ضده ورافضاه , وهو عارف كده ... مش منطقي إني أتوقع إنه لو إنتصر حيبقى ديكتاتور متوحش وما يفرط في ثروته وجيشه الخاص ؟ تاريخنا مع حميدتي إنه ما زول مبدئي , زول ورا مصلحته ... مصلحته يقتل الثوار قتلهم , هسه مصلحته يقول إنه علماني .
ياخ ماف كلام زي ده بيحصل , أولاً حميدتي لمن يحكم بيجيب معاه عبد الواحد فغصب حيكون علماني , والمجتمع الدولي الداعم حميدتي عينه عليه وما حيخليه يعمل أي حاجة غلط , ياخ البلد فيها كم حركة مسلحة ؟ ما حيقدر يعمل فيها ديكتاتور .
طيب ياخ البشير كانت كل الحركات المسلحة في زمنه موجودة وكان المجتمع الدولة محاربه ومدينه , وكمل في ديكتاتوريته وفساده وجرائمه عادي ...
إستمر الحوار بعدها طويلا , أنا أحذر من حميدتي وصديقي يؤكد أن الوضع هذه المره مختلف ... لكن الحمد لله المره دي ما طردوني ومرقت بإحترامي , والمخيف في هذا الحوار والذي جعلني أفكر طويلاً هو محاولة خلق حاضنة لحميدتي في أوساط العلمانيين ... وبما أنني علماني كتبت عدداً من المقالات وسجلت كماً في الفيديوهات عن العلمانية فبالتالي لا بد أن أدعم حميدتي !
ولهذا الطرح أقول بكل وضوح : لا شكراً , لا وألف لا ... نقطة سطر جديد .
إنها الإنتهازية التي دمرت السياسة ولا زالت تدمرها حتى الآن , لماذا نقدم طرحاً سياسياً ونحاول أن نصل الى الأغلبية لنصل الى الحكم في عدة سنوات ؟ إنقلاب وقتي وإنتهينا يا معلم ! ليه نشتغل ونبني قواعدنا ويكون عندنا ثقل حقيقي في سنين ؟ شلة كده نسمي نفسنا حزب سلاحف النينجا ضد قطوعات الكهربا ونخش في تحالف كبير ومبروك يا معلم ! ليه نستمر في الثورة ومحاربة العسكر ؟ ياخ نفاوضهم ومبروك منصبك وإنتهينا يا معلم !
فعلاً ... إنتهينا يا معلم
أوريكم أنا كعلماني عايز شنو , أنا عارف إنه حتى مافي إحصاء اساساً للسودانيين في السودان , عارف إنه لو جات إنتخابات حيجي حزب من الأحزاب البتعارض كل نظام في النهار عشان تنوم معاه بالليل في نفس السرير , عارف إنه وصول حزب إسلاموي للسلطة وارد جداً ... عارف .... والله عارف
كل العايزه مستوى من الرفاه والحرية ... رفاه يكون للسوداني فائض من المال والوقت , فايض يقدر بيه يشتري كتاب يقراه ويحضر مسرحية أو فيلم أو ندوة ثقافية , فايض يخلق وعي وتنوير ... فايض يخلي السوداني يقدر يدفع إشتراك شهري لحزب يمثله , ورغم مشاكلي الطويلة العريضة مع الأحزاب إلا أني عارف إنه عشان يكون في ديمقراطية لازم يكون في أحزاب ... تقوم أحزاب جديدة بتشبهنا وتندثر الأحزاب القديمة , وعشان الأحزاب الجديدة تشتغل لازم مساحة حرية عشان كل سوداني يكون ليه الحرية يفكر ويعبر ويعتقد كما يشاء , ولا الأحزاب الجديدة حتكون زي القبلها وما علمنا حاجة
أنا فعلاً علماني , وعايز سوداني علماني يحترم تنوعنا ويحتويه ... لكن ما حأكون في صف مليشيا بترتكب جرائم حرب بحجة إنها علمانية ! هم يحشدوا للعلمانية العسكرية وهم يحشدوا للجهاد الإسلامي وأنقلب عليك الليلة وإنت إنقلب عليك بكره ...
المشكلة ما في قيادات الجيش الفاسدة , المشكلة في كيان فاسد ممكن العسكري يقتل المواكن بالتعليمات , المشكلة مافي حميدتي ... المشكلة في مناطق وقبايل شافت في هذا المجرم المسلح زول بيمثلها , والحل لا مع مليشيا الجيش ولا مليشيا الدعم السريع , الحل يطلع جيل من الكلية الحربية يمثل السودان بكل إختلافاته , جيش عقيدته وطنية ما يرفع سلاح على مواطن , وقبال ما يجيني زول طاير يقول الأحزاب هي الأفسدت الجيش وجرته للإنقلابات أقول ليك الجيش ما شافع برياله , لو هو ما مؤدلج ما بيعمل إنقلاب لحزب ضد حزب تاني , وبغض النظر عن الذاكرة والنظر القصيرات ... قلتوا حل مشكلة الدعم السريع إنهم يبادوا لآخر جندي , طيب لو قلنا آمين مشكلة الجيش نحلها كيف ؟ ياخ ما وقته ياخ !
وفي الختام اللعنة على المجلس العسكري بتاع حدس ما حدس , واللعنة على حمدتي يوم ولد ويوم يموت ويوم يبعث حياً
والإنسان والوطن من وراء القصد
د. ياسر ضحوي
|
|
 
|
|
|
|
ياسر ضحوي
كمال عباس
فيس بوك
تويتر
انستقرام
يوتيوب
بنتيريست