دراما تلفزيونية: نادرة في مطبخها بكوينز نيويورك تحضر في الأكل بمحبة شديدة لضيوف جاينهم المسا، سمعت دقّة خفيفة في باب الشقة، قبل تفتح الباب ضاقت ملاح الفرك بالمفارقة بطريقة ضواقة النسوان السودانيات وغشت يدها في المريلة الخضراء وفتحت الياس ومتعة طعم الملاح لسّ في خشمها، لقت ليها راجل أسود، قالت ليهو؛ الناس السود ساكنين فوق لينا، قال ليها أنا جاييك أنتي قالت ليهو لو داير تسرق، شيل الدايرو وخليني أتم ملاحي، قال ليها إنتي هسّ ميتة وأنا داير أسوقك معاي، عاينت في المطبخ لقت روحها واقعة في الواطة، قالت ليهو الواقعة دي أنا موش؟ قال ليها نعم، أرح معاي، التفتت إليه وقالت ليهو؛ أنا مسلمة شنو السبب البخليك يا انوبيس تجي تشيل روحي؟ قال ليها زمان وانتي صغيرة سمعتك بتحكي قصص عن الفراعنة جنب قيفة النيل بدنقلا، ابتسمت بفرح شديد وقالت ليهو صاح كنت أحبها وأتسامر بها مع أندادي، طلعت معاهو وطلع بيها تلّة عالية واستمتعت بروعة وسهولة الصعود بدون جسد، وقفها جنب ميزان عالي زي الموجود في سنتر الخرطوم زمان، وضع في الكفّة اليمين ريشة طائر وفي الكفة اليسار قلب نادرة، قالت ليهو مدافعة وقد تذكرت أغنية عثمان حسين؛ يوم الحق هناك يوم يسألكم الله، وحات النبي، يا انوبيس، عملت كل ما في وسعي لاسعاد الناس بالأكل، عاين للميزان والريشة طلعت أثقل من قلبها وقال ليها، نجحتي كل ما في وسعك وسع كل الدنيا، أرح معاي أوريك بيتك الجديد. —— هامش: * نقلت ليكم حلقة من المسلسل بطريقة سودانية
التوقيع: الأديب أبوبكر من مقهى ستاربكس
06-21-2023, 04:44 AM
Biraima M Adam
Biraima M Adam
تاريخ التسجيل: 07-05-2005
مجموع المشاركات: 27610
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة