يا ناس هوي بي صراحة شديدة لا تنزح من بيتك و لا ترك حقك خلفك المؤامرة أكبر من مجرد حرب بين قوتين مسلحتين\ ، المؤامرة تقوم على تغيير التركيبة السكانية للخرطوم كمرحلة أولى .. المؤامرة تقوم على مبدأ الأرض المحروقة و المستوطنين الجدد .. أرض بلا سكان !! تمسك بارضك ولاتتركها للرعاع أو مت كشجر النخل منتصبا .. #لاللحرب #ابووضاح
حرب الخرطوم إحدى تداعيات الحرب الروسية / الأوكرانية ، بوابة أفريقيا ومناجم الذهب و المواد الخام ، فاغنر تركت باخموت الأوكرانية بعد معارك دامت شهور ، من أجل تأمين إمداد الذهب المهرب من السودان ربما تشهد الأيام القليلة المقبلة تحول نوعي في الصراع و أدواته ربما دخول أطراف اخري لديها أطماع في خارطة السودان الفضل . ربما بداية الحرب العالمية الثالثة تبدأ من هنا .. الخرطوم عاصمة اللات الثلاث !! #لاللحرب #ابووضاح
براحه كدا وبدون إنفعال بمناسبة ذكري مذبحة القيادة هذا الفعل الإجرامي ينال كبره اخوان الشيطان وزبانيتهم من اللجنة الأمنية . عندما الناس دي إعتصمت في القيادة كان هدفها واضح ومحدد إسقاط النظام وإقامة دولة المواطنة حرية سلام عدالة، وكنا عارفين الشغلة ما حفلة وتنتهي وكل زول يرجع بيته دونها الأرواح والمهج . طيب الحاصل شنو ؟ تحت ضغط الشارع استسلم النظام لكن بشروطه وسقط البشير وبشر كثير وفضل القليل البقو لينا في رقبنا دي أهه القليل ديل شاركونا ثورتنا قصبا عنا من اجل حماية البشير والبشر الكثير ومصالحهم النهبوها مننا ، أهه في ملاوتنا ليهم سقط الكثير منا شهداء وجرحى ومفقودين وديل اشرف منا جميعا وفينا السقط اخلاقيا وتخازل وجبن وركب مع القليل وفي البتمني سقوطنا وفشلنا وبيسعي بشتي السبل من اجل ذلك . طيب الحصل شنو هل سقطنا ؟ طبعا لا ولكن كمان ما نجحنا إلا أننا مستمرين ودا في حد ذاتو نجاح طبعا نجاح نسبي .. انا البكلمكم دا من جيل أبريل أسقطنا النميري وهيصنا ورجعنا بيوتنا وسرقوا ثورتنا نفس الذي يحاولون الآن ، تعرفوا ان هذه الثورة عصية علي السرقة ليه؟؟ لان دماء الشهداء الطاهرة هي مهرها دي ثورة غالية مافيش حد يقدر يساوم عليها والشايفنهم هسي ديل مجرد مطبات في طريق وعر ولكن قطار الثورة لابد ان يصل لمبتغاه ، ومبتغاه خبزة كسره في بطن جائع ولبن حليب لطفل رضيع وحقنة تطبب مريض وكراسة لاطفال المدارس .. وطن نستحقه ويستحقنا . حينها فقط ترقد أرواح الشهداء بسلام . #ابووضاح
بكره الحرب بتقيف المطار ما بنصلحو إلا بعد نشكل الحكومة من سوداني الداخل ،، معقوله يا نخب نصحى نلقاكم شلتو جوازاتكم وهجيتو وخليتونا في عز الجمر .. وبدون خجله يطلعو لينا في الفضائيات يحللو فلان من القاهرة علان من لندن و زيد من تركيا وعبيد من الدوحة .. على الأقل اخجلو شوية وخندقو حتى يتضح الموقف ولا شنو؟!!! 😞 😞 غايتو الفيكم اتعرفت !! و هكذا .. برضو.. #لاللحرب #ابووضاح
في المعارك الكبيرة يا تنتصر بشرف أو تنسحب بكبرياء .. الكلام ده ما عندو علاقة بالجاي تحت دا 👇 مشيت المركز الطبي الجنبنا بتاع الإستقبال سألني عن عمري بعد ما كتب أسمي ، شلاقه مني قلت ليهو تديني كم سنة ؟ راح كاتب ٧٩ سنة !! 🙈🙈 انتو الطيارات ديل فكو حاجه لعبت في الداتا بتاعت الناس ولا شنو ؟ غايتو بعد الشفناهو في ابراهه بعد الحفرة كل شي جايز كم لبثنا في هذه الحرب اللعينة ؟!! برضو.. #لاللحرب #ابووضاح
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة