إحياء لذكرى 3 يونيو

Quote: Yasir Elmalih 8. Juni 2019 · Mit Öffentlich geteilt منقول من الفيسبوك: شاهد عيان اعتقله الجنجويد صباح اليوم ثم أفرجوا عنه مساءً: كنت ماشي في الشارع جات عربية جنجويد لقت ترس قاموا وقفوني واي زول ماشي في الشارع و بدؤوا يضربوا فينا بسيطان العنج والعصي وقالوا لينا تزيلوا الترس ده.. بدينا نشيل في الحجار وهم يضربوا فينا وفيهم واحد كان مستقصدني شديد قال لي انت شكلك ود راحات السارقين البلد دي وبقى يضرب فيني زيادة.. بعد ازالة الترس قام أصر الا يرفعوني في التاتشر يسوقوني معاهم.. قعدوا يلفوا بالعربية وفي النهاية مشينا الساحة الخضراء البقت عاملة زي معسكر كبير للجنجويد كمية من عساكرهم وتاتشراتهم واقفه هناك.. نزلوني وبدوا يضربوا فيني بالسيطان.. شفت عدد كبير من الشباب محلوقين صلع ومعتقلين هناك مافي زول بيقدر يتكلم مع التاني والا حيتعرض للضرب. الجنجويد شغالين معانا زي العبيد الواحد منهم يديك سوط ويرسلك يقول ليك امشي جيب لي موية، تجيبها ليهو يشيلها منك وتاني يديك سوط. وشغالين فيها شتائم بالفاظ نابية يا لو.....ة الخرطوم و يا ود العزباء وغيرها من التهديدات بالقتل والذبح والاغتصاب والاساءات التي يعف اللسان عن ذكرها. سمعت بعضهم يتحدثون الى بعض باللغة الفرنسية وبلغات اخرى لم استوعبها ولم افهمها. أحد ضباطهم في المساء لقانا مجموعة مقعديننا قال ديل مالهم؟ قعدوا يحكوا ليهو ده عمل كده وده قبضناهو في الحتة الفلانية وهو يقرر يفكوك ولا يخلوك.. لامن جاء دوري قالوا ليهو ده لقيناهو في الشارع قلنا ليهو تعال فك الترس ده قعد يفك فيهو لكن بمرضنة ومياتة .. قال ليهم جزو تفته دي وادوهو كم سوط عشان يرجل وفكوهو.. فعلاً حلقوا لي شعري من المقدمة بصورة مشرتمة بعد داك اتناوبوا فيني كم واحد بالسيطان وبعد داك قالوا لي يلا أجري اجري قبال ما نديك طلقة. فجريت وانا أسب والعن فيهم وفي حميدتي وبرهان وعمر البشير الكان سبب وجاب ناس النهب المسلح ولبسهم كاكي وسلحهم واداهم رتب. في لحظة من لحظات الألم النفسي وانا ماشي في الشارع وبتذكر في حجم الاذلال والاهانة جاتني رغبة اني اتحصل لي على سلاح واقنص للجنجويد ديل والبلقاهو منهم اقتلوا لكن ارجع واتذكر شعارنا الرفعناهو من بداية الثورة دي والظل شهداءنا بيرددوه حتى في لحظات خروج الروح "سلمية سلمية". فما حنخون العهد وما حنحقق لهم مآربهم وننزلق بالبلاد الى النموذج السوري.. صامدون ومتمسكون بسلميتنا وحننتصر. وحسبنا الله ونعم الوكيل فيهم. #عيد_شهيد #تسقط_بس #تسقط_تالت #العصيان_المدني_الشامل #مجزره_القياده_العامه