كتبت داليا الكباشي: بعد 30 يوم من الحرب انظر خلفك يا عزيزي وتأمل!
📌 اختفاء خطاب (بل بس) و (دحر التمرد) الذي تبناه مطبلاتيه الحرب واستبداله به (لابد ان تتوقف الحرب) و (تعالو إلى كلمه سواء).. نفس جموع حارقي بخور الكيزان الذين جرمونا واتهمونا بالخيانه عندما كنا نهتف (لا للحرب) أصبحوا يصرخون (لا للحرب) برضو بعد ان أججوا النيران و ارتقى الشهداء مدنيين وعسكريين ودمرت العاصمه تماما.
📌 اختفاء تام للخبراء الاستراتجيين من القنوات الإعلامية، نفس ذات الخبراء الذين وقفوا ضد العملية السياسية وضد دمج الجيوش ورموا تهم الخيانه بكل من يتحدث عن الإصلاح الأمني والعسكري وعمليات الدمج والتسريح وانهاء المظاهر العسكرية.. نفس استراتيجيي الكيزان الذين كانوا يقمعوننا عندما نتحدث عن خطورة الدعم السريع وانتشاره ، ويهاجموننا عندما كان هتافنا (العسكر للثكنات الجنجويد ينحل) ويرموننا بوابل البمبمان.. حينما كان هتافنا يواجه زخات الرصاص، والكثير من رفاقنا استشهدوا وحلوقهم تنضح بهذا الهتاف!
📌 اختفاء تام لجماعه (ليه الاتفاق الإطاري والدستور الانتقالي) ما مكتوب فيهو (بسم الله الرحمن الرحيم)! ودا اتفاق (علماني كافر) وكيف ما يبدأ بالبسمله! حاليا اتفاق جدة الموقع بين الجيش وقوات الدعم السريع لا فيهو بسم الله الرحمن الرحيم لا فيهو حسبي الله ونعم الوكيل ومافي زول فتح خشمو ولا يستطيعوا!
📌 اختفاء تام للتوم هجو وجبريل ومناوي واردول وجمعه الوكيل وادريس اللقمه ونور الدايم ومحمد زكريا والمك عجيب ابو الخرطوم والشيخ تف تف والطيب الجد وترك مرق ومبارك الفاضل وجحافل الحمقى اللي كانوا بيفلعوا في الاتفاق السياسي ، وعملوا إنقلاب 25 أكتوبر بعد اعتصام موزهم الشهير، وهددونا بالحرب في حاله اتمام الاتفاق الإطاري.. الحرب قامت يا شبوبه.. ما منكم خبر لعل المانع خير! جميعهم عبروا الحدود و (كبروها) واطلقوا شائعات انو الحريه والتغيير هربت إلى الخارج!
وانت الطيرة المبارية السيرة شابكنا القحاطه هربوا.. القحاطه جت عليهم قاعدين في السودان وبيتحملوا المسؤولية مع السودانيين وبتبحث عن الحلول وتتكلم في القنوات وتشتغل في الوساطات واللي هرب فعليا انت ما جايب خبرو!
📌 اختفاء تام لحسابات الجداد اللاحم والبياض قارعي طبول الحرب اللي وصلت بيهم الجرأة يهددوا قائد الجيش نفسو ويقولو ليهو (لو اتفاوضتا بنملاك حبل ونرميك في الكركون).. حكمه الله! القوى السياسية لما بتتكلم عن اصلاح الجيش ودمج المليشيات الجيش بيزعل ويتهمها بالخيانه لكن عادي وحدة تقول لي قائد الجيش بنملاك حبل والموضوع عسل على قلب الجيش!
📌 ورش قضايا الانتقال الخمسه ومسودة الدستور الانتقالي والاتفاق الإطاري وعملية سياسيه تضمن اصلاح المؤسسات العسكريه ودمج المليشيات ونزع السلاح واعادة النازحين وإصلاح اقتصادي وتدبير معاش الناس وعلاقات خارجيه متوازنه وحكم محلي مستقر ودستور جامع لكل السودانيين رفضتو دا كلو وشتمتونا وخونتونا وهددتونا واكلتوا لحمنا..
اشتغلنا بي يدينا ورجلينا عشان الحرب دي كنا شايفينها هديييك جايه.. قلنا ليكم لو ما حصل اتفاق سياسي وما اندمجت الجيوش حا تقوم الحرب.. قلتوا لينا دي حركات الكيزان بتاعت حا تبقوا زي سوريا واليمن!
ان شاء الله الدرس القاسي علينا جميعا دا وقع.. لانو مافي طريقه لي (اعد في الصفحه المقابله تاني) والخسارات دي بيتحملها كل من أعان هؤلاء البلهاء يوما ولو بي كلمه!
أنا خصيمه كل من تسبب في هذا الخراب يوم القيامه عند العدل الذي لا يظلم عنده أحد!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
مصطفى نور
فيس بوك
تويتر
انستقرام
يوتيوب
بنتيريست