السلام عليكم اخوانى الافاضل اسف على الانقطاع والله مشغوليات استقبال الاهل والاصدقاء والمعارف وكل سودانى من الفارين من القتال المندلع فى الخرطوم والذى راح ضحيته الاف من الارواح الطيبه البرئيه التى لا ناقه ولاجمل لها فى موضوع الحرب التى مازالت تفتتك بعشرات من ابناء السودان الشرفاء والمواطن هو من دفع الثمن فى ظل المعارك الاف القصص التى سمعتتها من القادمين والفارين من السودان من الاهل والاسره والاصدقاء وكيف استغل ضعاف النفوس من الناس الظروف بتاعت الناس المساكين من خرجوا من بيوتهم مجبرين خائفين وتركوا وراهم كل غالى ونفيس وتركوا كل شى عرضه للنهب والسلب اخى وصديقى عبدالحليم الذى وصل امس الى القاهره ومعه عائلته التى تتكون من ثلاث ينات ووزوجته دفع بعد شد وجذب حوالى 3 مليون جنيه سودانى ما يعادل 200 الف مصرى الى تجار الموت والحروب لكى يقدر ان يوصل الى القاهره وهذا المبلغ فى الظروف العاديه يمكن ان يشترى به شقه والله فى القاهره والاسف الشديد ان كل تجار الموت والحروب هولاء الذين لا ضمير لهم ولا اخلاق ولا رجوله ولا نخوه للاسف من السوداين سمساره الموت والقصص كثيره تبكى القلب وتدمع العين وانا اقول وبلا ادنى شك اننا كلنا لصوص الا من رحم الله ربى من الذين تبقوا من الشرفاء من السودانين كلنا لصوص ياعزيزي .. البسرقو حاليا ديل ما كلهم حرامية محترفين ولا هم جعانين او معدمين سرقو كسرة خبز لا .. ديل سرقو شاشات وتلاجات وغسالات وبنوك وصرافات ودقيق ومواد تمونية .. وركشات وعربات وبيوت ومصانع واسواق .. ديل ناس بجلاليب وبناطلين وقمصان وكانوا ماشين مشوار عادي او قاعدين لمن شافوا حاجة بتتسرق قاموا عليها .. هل كل البينك وبين السرقة إنك تلقي فرصة ؟؟ هل انت عمرك كلو قاعد مستني فرصة عشان تبيع نفسك ولمن لقيتها ماصدقت؟؟ البسرقو ما نفر او اتنين ياجماعة .. ديل ملايين عشان مانسمع كلمة تصرفات فردية. الاستغلاليين برضهم مارسوا ابشع انواع السرقة .. لمن تدس المواد من دكانك وتخزن بنزين وجاز وتغلي سعر بيتك او شقتك وتضاعف الاسعار بتاعت المواصلات اربعين مرة وتقولي بتاع الجاز زاد سعره نبقي كلنا حلقة ممتدة لممارسة الاستغلال البشع. كلنا حلقات ممتدة من الجشع والطمع الغريب .. نفسي افهم الوصف الشعب السوداني بالاوصاف الحايمة زمان ده منو؟ قابلوهم وين الاصناف الاتكلموا عنها دي؟ عشان ما تقول لي دي الحرب .. نحن زمان لمن يجي رمضان بنزيد حتي سعر العجور والخيار عشان مستكترين علي الناس حبهم لسلطة الروب .. ولمن يجي رمضان بنضاعف سعر السكر وفجأة المصنع بقيف والتلج بقيف وكل حاجة ليها علاقة برمضان بتختفي وسعرها يزيد .. يبقي الموضوع ما ظرف حرب ولا نكذب علي روحنا. الموضوع سلوك مغروس جوانا للأسف الموضوع انه شافع عمره عشرة سنة بشيل فحمة ويشخبت ليك في الحيطة الانت ضربتها بوماستيك قبل يومين او يكسر ليك لمبة الشارع الانت عاملها عشان الناس تشوف .. او يرمي ليك حجر جوة الزير ويشيل الكباية حقت الشراب ده لو ما كسر الزير زاتو. الموضوع تكون عربيتك واقفة تلقي واحد جاري ليك البوهية بمسمار من اول العربية لاخرها الموضوع موضع جينات وراثية اتشبعت بالمضرة والحسد والحقد دون اي سبب واضح لكده. أخيرًا.. عاوز زول يوريني من وين جات فكرة اننا شعب كريم وأمين واصيل ووووو .. من وين؟ او وينهم هم الناس الاتقالت عنهم الاوصاف دي؟ عشان ما نتعب اعصابنا ساكت وكل يوم نتفاجأ بسلوك جديد! كيفما تكونوا يولي عليكم.☝️😞☝️
05-09-2023, 10:40 AM
محمد الأمين موسى محمد الأمين موسى
تاريخ التسجيل: 10-30-2005
مجموع المشاركات: 3470
ما تتحدث عنه أخي مصطفى، هو أسوأ ما افتضحته الحرب. أول ملاحظة لي حول الأسواق قبيل العيد، عندما انتقلت إلى الخليج في بدايات هذا القرن هي: يتبارى التجار في الخليج في التخفيضات، بينما يتبارى التجار في السودان في رفع الأسعار.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
مصطفى نور
محمد الأمين موسى
فيس بوك
تويتر
انستقرام
يوتيوب
بنتيريست