قبل كده كتبت و طلبت من الناس انو يكتبوا لينا تاريخ المدعو فارس النور و كان رد الناس رد خجول .. حاليا" كل الناس عرفت تاريخ المستشار السياسي لحميدتي تاريخ معروف و طويل مع الكيزان جناح الشعبي .
لكن الحاجة الما عارفاها الناس انو المدعو عادل دقلو كان وزير الدولة بالسياحة ووزير الدولة بالنقل وعضو القطاع السياسي لأمانة الشباب بالمؤتمر الوطني .
و ما عارفة انو ( ود صباح الخير ) كان امين قطاع الطلاب سابقاً و وزير الدولة بالاتصالات و حاليا هو المستشار الاقتصادي لقوات الدعم السريع .
ما كده بس .. ابلع ريقك و هاك دي .. الكوز (ود السيد ) من سكان توتي و القيادي السابق بالمؤتمر الوطني حاليا" هو رئيس لجنة الخدمات بقوات الدعم السريع .
هل تعلم انو الكوز ( ابو بركة) الكان والي ولاية النيل الابيض هو المستشار السياسي التاني لحميدتي .. و هل كنت تعلم انو ( ابو محمد ) الكان مدير المؤسسة الشبابية للانتاج الاعلامي بالمؤتمر الوطني وعضو المكتب التنفيذي لاتحاد الطلاب هو الان مدير المراسم لقائد قوات الجنجويد .
يااااخ اقول ليك .. بتتذكر الوزيرة ( سفنجات ) ؟ ايوة المدعوه سمية أكد .. اها اخوها عثمان من قيادات الجنجويد .. طيب اقول ليك حاجة ؟ بتعرف ( المحفوظ ) الكان امين قطاع الإعلام بالمؤتمر الوطني المركز العام .. اها ده حاليا" المستشار الإعلامي لقائد قوات الدعم السريع .
جاك وجع بطن ؟ معليش استحمل لانو المستشفيات محتلينها الجنجويد عشان يحرروك من الفلول .. استحمل و هاك الكبسولة دي .. بتعرف المدعو ( حارب ) الكان امين أمانة الطلاب بجامعة بحري( جوبا سابقاً) اها ده مدير مكتب زوجة عبدالرحيم دقلو .. ده اكتر زول مفتح لانو قاعد في موقع دسيس .
جاك طمام ؟ لفة راس ؟ استحمل ياااخ و هاك دي .. بتعرف المدعو ( عويس ) الكان أمين اعلام أمانة الشباب بالمؤتمر الوطني في النيل الابيض اها ده هسه مدير النشر بالاعلام الالكتروني للجنجويد و المشرف على الإعلام الحربي .. يعني ممكن تقول ده مدير ناس ( الربيع و بقال و دخرو ) و ديل اساسا معروفين كيزان ما محتاج اعرفك بيهم .
عشان ما تزهج مني هاك الاخيرة دي .. بتعرف ( بقاري ) العضو السابق لأمانة الطلاب بالمؤتمر الوطني اها ده مدير الإعلام قطاع الشرق بقوات الجنجويد .
تاني دايرين شنو ؟ عارفكم ح تكونوا عايزين اسماء الكيزان المسؤلين من استخبارات الدعم و الكيزان القايدين الجنجويد ميدانيا" .. اها ديل بديكم ليهم في الحلقة الاخيرة ما تستعجوا .
اهم شي لازم تعرفوا انو حميدتي ضد ( الفول ) و بيحب الاقاشي و بيكره الويكة و الكيزان و ح يحقق ليكم الديمقراطية .. مش قبل كده و عدكم انو الديمقراطية دي بيجيبها رجالة .. بس انتظروه .
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبدالله محمد احمد بلة
فيس بوك
تويتر
انستقرام
يوتيوب
بنتيريست