π أفشوا الغمتان بينكم£

∆ العيد لاجاب الناس لينا لا جابك!!
كان مناسبة سعيدة لإحياء سنة حسنة كادت
تندثر بنيران حرب بسوس داعش و غبراء.

«ألا ندلكم على خصلة إذا فعلتموها تحاببتم....
أفشوا الغمتان بينكم» { رواه مسلم،وأنا مسلم} .

الغمتة عادة سودانية حميدة قديمة جدن ومنتشرة جدن
نتمنى لها ألا تنقرض أبدن. ولو أنها قلت أو تكاد أن تختفي في السنين الأخيرة ..
أو ربما تحولت من شكلها التقليدي القديم وأصبحت تأتي في شكل تحويل بنكك
أو رصيد أو (شيرنق) في الزنقات بين الإخوان و الأصحاب أو الزملاء!!
+ وللغمتة طعم ومذاق خاص إذ أنها بتجيك أحيانا وإنت في أمّسَ الحوجة.
. و خجلان تشحد و تطلب قريشات من زول حتى لو كان قريب منك شديد
.. حتى لو كان اخوك.. ف (بجي) يغمت ليك.. لمن ترتاح إنت ذاتك..
وتشعر بإنتشاء وفرح يلامس عنان السماء. حتى لو كنت في سرادق عزاء
+ والأجمل في الغمت دا انك بتكون ما عارف (المغموت) ليك كم في حال
الغمت المباشر !!! . فتبتدي تسرح في حلحلة المشاكل وتخطط للمشاريع الممكن
تحققها بقيمة الغمتة دي .. وتكون متشوق للحظة الحتعرف فيها غمتو ليك كم ؟..
+ ودا ما بيتم إلا بعد مفارقة الزول الغامت ليك... (معقولة تحسبا قدامو طالبو انت... ؟)
تتعدد أشكال الغمتة. أحيانا تجي في شكل .. حاجة كدا تحت المخدة ودي بتكون دايما
في حالات المرض أو ود الطهور أو الولادة .. ونحو ذلك.. وغالبا ما تكون حصيلتا
جامدة لأنو المخدة ديتقول تحتا عقرب، ما بتترفع إلا بعدما يفرنقع الزوار.

تسلم أخوي ود عمي و شريك همي والعيد مبارك
عليك بكافة اللغات و لامن نبذنا الحرب في بوست بعنوان"
" Quelle Connerie La Guerre " كنت أول من خطر
على بالنا فيا ريت تجينا تتاوق بهناك و تعطر صفحتنا بدفء
أنفاسك ، كما نتمناكل سالماً غانما في غربتك المجيدة.