|
كتب الكاتب الفاتح جبرا المتوفرة بمعرض الدوحة
|
|
 Re: الى اللذين يتمنون هزيمة الجيش او اضعافه (Re: بدر الدين الأمير)
|
Quote: جمال المنصورى
هو الحكمنا ثلاثين سنة
كان الجيش ؟؟؟؟ |
بدرالدين
سلام يا صاحبي
ما افتكر ده حكم موضوعي لتبرير اضعاف الجيش
اللي خكموا السودان من العسكريين هم الضباط وليس الجنود
الجندي اللي الناس بيتمنوا اضغافه يقاتل برغم ضألة الراتب الذي يقاضاه
الجنود ديل كان ممكن بكل بساطة ينضموا للدعم السريع عشان الرواتب وكده لكنهم ما فعلوا
تفتكر من الاحسان نتمنى ليهم الموت بدل نساندهم ونشجعهم للعمل البطولي البيقوموا بيه !!!
بنشجع الجيش عشان حاجات كتيرة اكبر من الحكم وبنتمنى انو الجيش يصحح بعض الاوضاع الشاذة فيه ومن ضمنها وجود مليشيات تحمل السلاح خارج القوات المسلحة
بعدين متنسى انو السياسيين هم اللي افسدوا الجيش بزجه في السياسة منذ انقلاب عبود
مودتي
| |
 
|
|
|
|
|
|
|
|
Re: الى اللذين يتمنون هزيمة الجيش او اضعافه (Re: دفع الله ود الأصيل)
|
Quote: ينصر دينك ،منصوري يا جميل
يا رايع و يسلم لي ضراعك |
شكرا يا ود الاصيل هلى الدعوات الطيبات، عسى ربي ان يتقبلها منك قبولا حسنا ويجزيك بها ومعها كيل بعير
هؤلاء الجنود الاشاوس لا يستجقون منا كل هذه القسوة وكل هذا الجحود
تركوا عيالهم واسرهم ليدافعوا عن اسرنا وعيالنا ضد الارهاب والاغتصاب
المجد والخلود لشهداء القوات المسلحة
| |
|
|
|
|
|
|
|
|
|
Re: الى اللذين يتمنون هزيمة الجيش او اضعافه (Re: دفع الله ود الأصيل)
|
اهلا استاذ جمال
الحرب هي بين فرعين من اصل واحد:
الكيزان
اما حجتك الاساسية التالية فضعيفة:
| Quote: اضعاف الجيش معناه ان كل الدول التي تشاركنا الحدود في اي من هذه الاتجاهات الاربعة ستتعدى على هذه الحدود وتحاول الاستيلاء على اراضي سودانية تعتبرها تاريخيا جزءا لا يتجزأ منها |
معظم او كل الدول التي اشرت اليها كان بامكانها هزيمة الجيش السوداني قبل الحرب الاخير بين طرفي المشكل الكيزان، ل
و كانت المسالة اصلا هي ضعف الجيش او قوته.
لكن هنالك عوامل اخرى تمنعها من اجتياح السودان.
| |
|
|
|
|
|
|
|
|
Re: الى اللذين يتمنون هزيمة الجيش او اضعافه (Re: osama elkhawad)
|
Quote: معظم او كل الدول التي اشرت اليها كان بامكانها هزيمة الجيش السوداني قبل الحرب الاخير بين طرفي المشكل الكيزان، ل
و كانت المسالة اصلا هي ضعف الجيش او قوته.
لكن هنالك عوامل اخرى تمنعها من اجتياح السودان. |
مرحب استاذ اسامة الخواض
حللت اهلا ةنزلت سهلا
تعرف يا استاذ اسامة ما حصل طيلة حياتي دخلت نقاش اذا لم اكن مستعدا له..
نجيك للأقتباس الفوق ده
جربت اثيوابيا، وجربيت ارتيريا، وجربت تشاد، وجربت افريقيا الوسطى نفس الجيش ده
الدولة الوحيدة الما خاض معها هذا الجيش حرب خي مصر، والعاقل من عرف قدر نفسه فالجيش المصري من اقوى جيوش المنطقة في الوقت الحاضر ومن الغباء بمكان الدخول معه في صراع في المستقبل القريب لأن قدراتنا الحالية لا تقارن بقدرات الجيش المصري
يبقى السؤال هل انتصرت بقية الدول على هذا الجيش ام لا ؟
بالنسبة لأنفصال الجنوب حين توقيع الاتفاق مع الجيش الشعبي لتحرير السودان لم يكن هذا الجيش مهزوما، برغم التجريف الذي حصل له منذ حكومة المرحوم الصادق المهدي، حين كان افراد الجيش ينتعلون القمر بوبا
محبتي
| |
|
|
|
|
|
|
|
|
|
Re: الى اللذين يتمنون هزيمة الجيش او اضعافه (Re: جمال المنصوري)
|
جمال المنصورى من الذى نادى باضعاف الجيش وما معنى اضعاف الجيش؟ هل يعنى ذلك نزع سلاحه؟ ما نادى به الناس هوتطهيره من عناصر الكيزان واعادة كل الشرفاء للخدمة الذين تمت احالتهم للمعاش لانهم لا ينتمون لتنظيم الكيزان هل لديك اعتراض على ذلك؟
يا منصورى هل نسيت كيف كان عسكر الكيزان ياتون لابوحمد مرارا وتكرارا بشيرهم ومانافعهم ينشرون اكاذيبهم ويذهبون واهلك واهلى- ونحن ابناء عمومة- قلوبهم تتقطع على الكارثة التى حلت بالمناصير نتيجة انشاء خزان مروى هل غابت عن ذهنك فاجعة مركب اطفال المدرسة؟ ماذا فعل لكم عسكر الكيزان؟
| |
|
|
|
|
|
|
|
|
|
Re: الى اللذين يتمنون هزيمة الجيش او اضعافه (Re: Hassan Farah)
|
| Quote: من الذى نادى باضعاف الجيش وما معنى اضعاف الجيش؟ هل يعنى ذلك نزع سلاحه؟ ما نادى به الناس هوتطهيره من عناصر الكيزان واعادة كل الشرفاء للخدمة الذين تمت احالتهم للمعاش لانهم لا ينتمون لتنظيم الكيزان هل لديك اعتراض على ذلك؟ |
حسن فرح
ياصديقي
قديما قيل الحكمة هي وضع الاشياء في موضعها الصححيح
هل تفتكر ده الوقت المناسب لأثارة هذه المواضيع والبلد على شفا حفرة من نار؟
انت معانا هنا في المنبر وتعرف موقفي وكتاباتي جيدا لقيتني يوم قاعد اؤيد الكيزان؟
سلامي
| |
|
|
|
|
|
|
|
|
|
Re: الى اللذين يتمنون هزيمة الجيش او اضعافه (Re: Hassan Farah)
|
* الجيش السوداني تم إختطافه وأدلجته ـ بنسبة كبيرة ـ خلال ال 30 سنة الماضية ـ لصالح فئة محددة ومنبوذة ـ رفَضها شعب السودان في ثورة شعبية شهد عليها كل العالم ـ في 2019م
* مافي شخص عاقل بيقيف ضد جيش وطنه .
* وما يجري على الأرض الآن في السودان ـ هو صراع بين قوتين عسكريتين ، إحداهما تسمى " دعم سريع " ، والأخرى " كيزان وكتائب ظل وجهاديين مهووسين بالجهاد وحُب السُلطة والتسلُط على الناس " ـ أسموا أنفسهم ـ زوراً وكذباً ، " جيش وقوات مسلحة سودانية " .
* الناس ضد الكيزان وضد كتائب الحركة الإسلامية الإجرامية ال حكمَت البلاد عُنوة لثلاثين عاماً ، وليس ضد الجيش الوطني السوداني الحقيقي .
* مافي جيش وطني بيقتل أبناء شعبه ويحرق بلده .
* ولو المشكلة في الدمج في جيش واحد ـ الموضوع دا ما كان بيحتاج كتير ، بالمفاهمة والتفاوض كان تم حله وتم تكوين جيش واحد يمثل كل السودان ـ بدون أي شروط ، لكن لأنو الكيزان وكتائب الحركة الإسلامية الإجرامية ضد إستقرار البلد دي وضد تقدمها ـ ولأنو ما بيهمهم شيء غير مصالحهم وغير أجندتهم ، فضَّلوا يحرقوا البلد من أن تستقر ويكون فيها سلام وحياة كريمة لمواطنها .
* دا الحاصل .
| |
|
|
|
|
|
|
|
|
|
Re: الى اللذين يتمنون هزيمة الجيش او اضعافه (Re: الصديق الزبير)
|
| Quote: يا جمال هل تريدنا ان نشطب كل الجرائم التى ارتكبها العسكر فى حق الشعب؟ نزور التاريخ؟ البلد دى يا جمال طيلة ال 34 سنة الماضية كانت ولازالت على شفا حفرة من النار |
محدش قال كده يا حسن
كلامي موجه للذين يتمنون هزيمة الجيش امام مليشيا الدعم السريع حاليا في التو واللحظة..
فيا حسن لو كنت من هؤلاء فكلامي موجه ليك،
ولو ما كنت منهم فالكلام ده ما بيمسك
شوف انت بتضع نفسك وين وخلي صدرك رحب، خليك ديمقراطي واستمتع بالراي الاخر مع اني مقتن 100% ما في سوداني ديمقراطيي
مودتي
| |
|
|
|
|
|
|
|
|
|
Re: الى اللذين يتمنون هزيمة الجيش او اضعافه (Re: جمال المنصوري)
|
| Quote: الجيش هو الجنود وضباط الصف البيحاربو هنا ضد مليشيا تسعى لتحقيق رغبة شخصية لقائدها في الوصول الى السلطة |
اها مش الجيش ده ياهو نفس الجيش الشارك في مذبحة الاعتصام
مش الجيش ده ياهو نفس الجيش الكتل ناس دارفور
انت زول ليك رسالة في الاسلام
ماهو حكم دعم قاتل المسلم و لو بشق كلمة
| |
|
|
|
|
|
|
|
|
|
Re: الى اللذين يتمنون هزيمة الجيش او اضعافه (Re: جمال المنصوري)
|
((كلامي موجه للذين يتمنون هزيمة الجيش امام مليشيا الدعم السريع حاليا في التو واللحظة..
فيا حسن لو كنت من هؤلاء فكلامي موجه ليك، ))
...............................................................
يا جمال ما يدور الآن هوصراع بين البرهان وحميدتى على السلطة...انتصار احدهما على الآخرنتيجته ستكون كارثة تاريخية تستمر لعشرات السنين فى السودان وهناك تجربة الصومال امام اعيننا
انظر ما حدث للصومال وهم شعب واحد لغتهم واحدة ودينهم واحد بعد انقلاب محمد زياد برى بتاريخ 21 أكتوبر عام 1969 مابالك بحالنا لو انتصر احد الجنرالات على الاخر واظنك تعلم كم عدد المكونات الاثنية فى السودان وكم عدد لغاتها ومعتقداتها
| |
|
|
|
|
|
|
|
|
|
Re: الى اللذين يتمنون هزيمة الجيش او اضعافه (Re: Hassan Farah)
|
Quote: اها مش الجيش ده ياهو نفس الجيش الشارك في مذبحة الاعتصام
مش الجيش ده ياهو نفس الجيش الكتل ناس دارفور
انت زول ليك رسالة في الاسلام
ماهو حكم دعم قاتل المسلم و لو بشق كلمة |
اخونا جلال
السلام سنة
قضية الاعتصام قضية معقدة والفصل فيها يخضع للقانون و لجان التحقيق ذات الصفة القانونية، وما يتوفر من معلومات عامة قابلة للدحض والتفنيد ان طرفي الصراع الحالى واخرين مشتبه فيهم بالتساوي في جريمة فض الاعتصام، يظل الموقف منهما ثابتا حتى تاريخ الفصل والاثبات في من ارتكب هذا الجرم، وحيث انه بالثابت ان الطرفين واخرين تواجدا في مسرح الجريمة، وان كليهما واخرين اعضاء في اللجنة الامنية التي امرت بفض الاعتصام يبقى الطرفان واخرون متهمون بالتساوي لا يجوز استثناء طرف دون الاخر وبما ان فرص التجريم متساوية، او لنقل ان المتهمون ابريلء حتى تثبت ادانهم يبقى حكم دعم القاتل في هذه الحالة قيد التقييد لحين ثبوت التهمة وان كان لا بد فشق التمرة تجوز على الكل الداعم لهذا الطرف او ذاك.. ز
مودتي
| |
|
|
|
|
|
|
|
|
|
Re: الى اللذين يتمنون هزيمة الجيش او اضعافه (Re: جمال المنصوري)
|
Quote: ا جمال ما يدور الآن هوصراع بين البرهان وحميدتى على السلطة...انتصار احدهما على الآخرنتيجته ستكون كارثة تاريخية تستمر لعشرات السنين فى السودان وهناك تجربة الصومال امام اعيننا
انظر ما حدث للصومال وهم شعب واحد لغتهم واحدة ودينهم واحد بعد انقلاب محمد زياد برى بتاريخ 21 أكتوبر عام 1969 مابالك بحالنا لو انتصر احد الجنرالات على الاخر واظنك تعلم كم عدد المكونات الاثنية فى السودان وكم عدد لغاتها ومعتقداتها |
يا حسن تجربتنا مع الجيش السوداني غير
بالسرعة دي نسيتوا ما قام به النقيب حامد
بالسهولة دي خرجت بطولة محمد صديق من ادبيات الثورة
الشهيد السقط من اتلجيش دفاعا عن المعتصمين راح شمار في مرقة؟
اديني نموذج لواحد من الدعم السريع قام بواقف بطولية لحماية المعتصمين يستحق عليها التشجيع والوقوف معه ضد الجيش
مالنا والصوماليون لهم خصوصيتهم نحن شعب جيشه يحمل جينات مختلفة، صحيح هناك في الجيش من يتمتع بصفات خسيسة بس مش كلهم، والجيش قادر على تصحيح نفسه عشان كده البشير عمد لأنشاء قوات موازية للجيش، وما تنسى الجيش ساهم بصورة فاعلة في اسقاط البشير انحراف الثورة ساهمت فيه القوى السياسية كافة كلهم ساهمةوا بالفعل او الصمت، فاذا الامور ما واضحة بصورة كافية ترانا بنحاول نوضحها
تسلم
| |
|
|
|
|
|
|
|
|
|
Re: الى اللذين يتمنون هزيمة الجيش او اضعافه (Re: Hassan Farah)
|
لا احد يتمنى هزيمة جيش بلده.
هذه حقيقة بديهية لم ترد في خاطر صاحب البوست الكريم.
هنالك تشكيك في طبيعة الجيش الذي يقاتل الدعم السريع.
هل تخلص الجيش السوداني من "طفولته" عندما كان طفلا استعماريا:
قوة دفاع السودان؟
في عقلية العسكر هنالك تفريق هائل بين الملكي أي المدني والعسكري،
واحتقار للمدني.
خبرة الجيش السوداني كانت في الاصل خبرة قتل مواطنيه "المتمردين" أو "الخوارج".
وهي سيرة بائسة..
لكنها هي في نفس الوقت بعض من سيرتنا "الوطنية" البائسة.
بالإضافة الى احلام بعض منا في المدنية والعلمانية،
يمكن ان نضيف حلما إلى تلك القائمة الحالمة :
جيش وطني لا يتدخل في السياسة ويحترم مواطنيه "الملكيين"...
| |
|
|
|
|
|
|
|
|
|
Re: الى اللذين يتمنون هزيمة الجيش او اضعافه (Re: osama elkhawad)
|
هلا جيمي،
للأسف يا جمال، أنت تدخل هذا الحوار وأنت غير مستعد.
خلينا من الذين يتمنون اضعاف الجيش، ليس هناك جيش بالمعنى الحرفي لجملة ليس هناك جيش،
حميدتي سيطر على كل الخرطوم ببساطة شديدة،
هذا البوست وبوستات عمر التاج وكاروري و الكندي بوستات قائمة على التمني.
الجيش أندحر أو بالأصح غير موجود أصلاً،
وأزيد الكنزي بيت من الشعر، ليس هناك كيزان ودي هزيمتهم النهائية
حالياً في زول مسيطر على الخرطوم لكنه لا يدري ماذا يفعل بعد ذلك!!!!!!
| |
|
|
|
|
|
|
|
|
|
Re: الى اللذين يتمنون هزيمة الجيش او اضعافه (Re: منتصر عبد الباسط)
|
Quote: اها مش الجيش ده ياهو نفس الجيش الشارك في مذبحة الاعتصام
مش الجيش ده ياهو نفس الجيش الكتل ناس دارفور |
كل الصور والفيديوهات التي صورت فض اعتصام القيادة تؤكد تماما بأن الدعم السريع هم من فض الاعتصام وكارس القتل
لا يوجد صورة لضابط أو عسكري من الجيش في تلك الفيديوهات
التي صورت الدعم السريع وهو يمارس هذه ا لجريمة
وموقف الجيش منهم ظهر الأن وهو لا يعجب المزايدون
أما من هم الذين مارسوا الابادة في دارفور كل العالم يعلم بأنهم الجنجويد
الذين منهم الدعم السريع الذي لم يرضيك محاولة التخلص منه!
| |
|
|
|
|
|
|
|
|
|
Re: الى اللذين يتمنون هزيمة الجيش او اضعافه (Re: منتصر عبد الباسط)
|
الاخ . جمال المنصوري . سلام
كما قال الاخ . شيخ الكنزي ، نحن علم انه يوجد فساد في الجيش علي مستوي فئه معينة . لكن ليس هذا وقت التنظير . فالحصه وطن .
الذين يتمنون هزيمة الجيش واضعافه جلهم او لنقل كلهم خارج السودان ،( اصحاب الجنسيات المزدوجة ) التي تحصلوا عليها بعد طرقهم المتواصل لابواب و مكاتب اللجؤء والهجرة . والان يتنكرون لاصلهم ، ويتمنوا الدمار والخراب لبلدهم . ويصتفون خلف من يريد تدمير السودان ، فهم ضامنين سلامتهم وسلامه اسرهم معهم . طالما لديهم دائما شماعة " الكيزان " ، يبررون بها تخازلهم وجبنهم .
انهم لايعلمون الواقع علي الارض فعلا
سندهم القنوات الفضائية وشويه لايفات من هنا وهناك .
انا مقتنع ان النقاش معهم غير مجدي ، فقناعتهم لن تتزحزح. وزي مابنقول ( جليهم ) .
الجنجويد اسطورة وانتهت ، والجيش القومي السوداني ، سوف يكون اقوي وافضل من الاول .
المجد والعزه والصمود ، لاشاوس قواتنا المسلحة الباسله . والخزي والعار ، لكل رعديد متخازل جبان .
| |
|
|
|
|
|
|
|
|
|
Re: الى اللذين يتمنون هزيمة الجيش او اضعافه (Re: osama elkhawad)
|
ملحق عن عقلية المؤسسة العسكرية السودانية واحتقارها للملكي "المدني":
في مقال نشره "نصر" عن صدأ الريف ، صدأ الجيش ،
ورد التالي عن عقلية المؤسسة العسكرية السودانية "الوطنية" المحتقرة لمواطنيها:
Quote: وكل هذا إنعكس في ترهُل عقلية منتسبيها "أي المنتسبين للمؤسسة العسكرية "التوضيح من طرف كاتب المداخلة"،
والتي صارت تنظر لمن هو خارج مؤسستها بانه ناقص ومملوء بالضعف والهوان ،
ويتصف بجانب عدم المسئولية أنه يستحق كامل الوصاية ،
حتى أوصموا فرد الشعب فيه بكلمة (ملكي) ،
وبذلك صار الشعب السوداني في عقلية المؤسسة بأنه غير قادر وقاصر عن إدارة شؤونة ،
وأنهم هم فقط القادرون على هذه المسئولية وأن الوصاية واجبة على الشعب السوداني. |
| |
|
|
|
|
|
|
|
|
|
Re: الى اللذين يتمنون هزيمة الجيش او اضعافه (Re: osama elkhawad)
|
الزميل اسامة الخواض . سلام
انا من متابعيك في هذا المنبر ، واتابع بوستاتك بشغف كبير .
الان السودان في وضع ، يكون او لايكون .
التشكيك في الجيش في هذا الوقت ، وهو يقود حربا مقدسة ، يعتبر نوعا من الخيانة العظمي ( هذا عموما ، ولست انت المقصود او غيرك بالضرورة ) . فلا احد يعرف نوايا الاخرين .
انا في ارض الواقع واري يوميا بعيني بؤس قواتنا المسلحة ، وهم يحملون اسلحة عفا عليها الدهر ، ينتعلون " السفنجات " ، لكن رغم ذلك يدافعون عن الوطن ببسالة وشراسة وشجاعة منقطعة النظير . لم يهمهم تجهيزات " العدو " فهو متفوق عليهم بنوعية سلاحه المتقدم، ذلك السلاح الذي تم شراءه باموال وموارد الشعب السوداني . اراهم في الطرقات يوميا وهم يبتسمون . رغم العبء الكبير الملقي عليهم .
الجيش جيش السودان، ، وحالف قسم يؤدي واجبه حتي لو ادي ذلك للمجازفه بحياته . وقد فقد الجيش في هذه الاشتباكات ، ارواح ذكية طاهرة ، وفقدت كثير من الاسر ، رب الاسرة . الثمن دفعه ابرياء لاناقة ولاجمل لهم في هذه الحرب العبثيه .
الجيش لم يطلب منا مساعدته ، فهو قادر رغم المحن ، ان يحسم هذا الغؤغاء ،و ان يحافظ علي ماتبقي من السودان متماسكا .
غدا أبنأءنا وبناتنا ، واحفادنا ، سيفتخرون ، بما قام به هولاء الاشاوس .
تقبل تحياتي،،
| |
|
|
|
|
|
|
|
|
|
Re: الى اللذين يتمنون هزيمة الجيش او اضعافه (Re: Hasheem Karouri)
|
شكرا جمال المنصوري علي الطرح العقلاني البعيد عن الانتماءات
اعرف ان قلبك وفكرك ابعد مايكون عن الكيزان ولكنك تدرك بعقلك كيفية وزن هذه المعادلة الوطنية ..
قريبي الخواض خانك تفكيرك هذه المرة عندما قلت ان المعركة بين كيزان .
أولا انت تدرك ان الدعم السريع قوات بربرية غير منظمة مثل الجيش ولا يوجد لهم مرجعية عقائدية
ماعندهم منهج، ماعندهم مؤلفات فكرية ، ماعندهم مرجعية تاريخية دينية أو عقائدية .. ليس لديهم هدف ورؤية
اغلبهم شباب قبليات ودول مغرر بهم يحاربون لحميدتي لانه يدفع لهم ويعدهم بذهب السودان وريالات اليمن
الحاجة التانية تدرك ان قيادات الجيش ما جابوهم الكيزان بل جابتهم قحت
عزلتهم عزيل من ضمن مئات الضباط في القيادة تم تسريحها من أجل تنظيف الكيزان
البرهان بنفسه قال انه بعثي وشارك في انقلاب البعثيين على الكيزان في رمضان
ياسر العطا وابراهيم جابر وشلة من كبار الضباط ماحصل شاركوا في اي منشط حزبي للكيزان لما كانوا في السلطة والا ماكانوا شموها قدحة
الجيش أيام البشير كان فيهم على مستوى القيادة والجنود من يكرهون الكيزان وينتقدونهم علانية
وأيام الاعتصاد شاهدنا عشرات الضباط والجنود واقفين مه الثوار .. تفتكر ديل كيزان كيف ودخلوا الجيش كيف؟
بعد الثورة دفعت قحت باسماء ٤٣٠ ضابط عظيم قالوا ديل ناسنا يفترض يترقوا لرتب أعلى عشان يقودوا الجيش
تفتكر ديل دخلوا الجيش كيف ..
البرهان نفسه أعاد للخدمة قريب ٢٠٠ ضابط من الذين تم فصلهم إيام البشير ارضاءا لقحت
ده غير كشف ال ١٧٠٠ كادر قحتي الطلبت رئاسة الجمهورية الحمدوكية بمنحهم رتب كيري ساكت في الجيش والأمن
وللمعلومية، ٥٠٠ منهم استوعبهم حميدتي فورا كمهر لشراء قحت ، وانتدب اغلبهم في مواقع حساسة في الجيش
طيب خليهم ديل كلهم ، وارجع لطيبة الخواض .. ارجع لأهلك وزملاءك
وشوف في كم ضابط وعسكري ماكوز
يا اخي انا الان شغال في مؤسسة تعليمية ومشارك في قروب مؤتمر خبراء اكاديميين
تتخيل طلع فيهم ٨٦ دكتور قالوا هم من خبراء وضباط مرفوتين الجيش ..
سالتهم هل انتم كيزان ، قالوا طبعا لا
طيب اتعينتم اصلا كيف في الجيش؟
الجيش يا عزيزي الخواض أجزم ان فيه مالايقل عن الثلث لاعلاقة لهم بالكيزان
وفيهم حوالي الخمس ديل عندهم عداوات شخصية وتنظيمية مع الكيزان
ومش الجيش بس .. مؤسسات الدولة كلها لما سقطوا الكيزان طلعوا منها قيادات ضد الكيزان قادت الفترة الانتقالية
بعد ده كله .. الجيش لو كانوا كيزان.. فأنت بتعظم الكيزان من حيث وصفهم بانهم وضعوا نهاية للجنجويد
وقسما باللله لو قعدت قحت أو حزب الأمة أو غيرها في السلطة ١٠٠ سنة ما كانت انهت أسطورة حميدتي
ولكن الجيش السوداني فعل، ولا نقول الكيزان.
الجيش ده بعد كده فيه ملاحظات وأخطاء.. دي حاجة تانية ومرحلة تانية نحلها لمن يكون عندنا دولة
ولكن لو اتهزم في المعركة دي، تأكد انه ما حيكون عندك دولة زاتو عشان تحل مشكلة جيش أو شعب .
| |
|
|
|
|
|
|
|
|
|
Re: الى اللذين يتمنون هزيمة الجيش او اضعافه (Re: عمر التاج)
|
شكرا استاذ هاشم على ردك الهادئ وكلماتك المشجعة.
بالتأكيد انت في موضع أحسن كثيرا من موضعنا الحالي.
لكني حاولت النظر أبعد من أنف اللحظة الحاضرة ، بالتنقيب في تاريخ المؤسسة وعقيدتها.
لا أعرف حتى الآن الجهة التي جعلت تحقير الملكيين- تُقرأ المواطنين- عقيدة من ضمن عقائد العسكرية السودانية.
أرجّح ان هذه العقيدة التحقيرية من إنتاج العقلية الانجليزية الاستعمارية،
مثلها مثل العقائد التي تكوّنت لدى فئة "الافندية"، كفئة من إنتاج ورعاية الاستعمار الانجليزي.
وشكرا قريبي عمر على الرد الهادئ أيضا.
لقد كان انحياز الجيش هو انحياز "اللجنة الامنية" التي أنتجت هذه الحرب العبثية.
لا مجال لإنكار هذه الحقيقة الواضحة.
مسألة أهون الشرين هي مسألة نسبية،
وبالنسبة لي إيقاف الحرب هو القضية الجوهرية.
أنحاز إلى جهة الشعب.
أدناه ميم حول إصلاح المؤسسة العسكرية:
| |
|
|
|
|
|
|
|
|
|
Re: الى اللذين يتمنون هزيمة الجيش او اضعافه (Re: جمال المنصوري)
|
Quote: الحاجة التانية تدرك ان قيادات الجيش ما جابوهم الكيزان بل جابتهم قحت
-------------------------------------------------------------------------
الذي نعلمه أن الدخول للكلية الحربية ومنذ العام تسعين كان بواسطة تنظيم الكيزا
...........................................................................
الاخ نصر سلام عمر التاج زى الضربتو وردة ...الله يشفيه بدأ يهضرب..
| |
|
|
|
|
|
|
|
|
|
Re: الى اللذين يتمنون هزيمة الجيش او اضعافه (Re: Hassan Farah)
|
Quote: هلا جيمي،
للأسف يا جمال، أنت تدخل هذا الحوار وأنت غير مستعد.
خلينا من الذين يتمنون اضعاف الجيش، ليس هناك جيش بالمعنى الحرفي لجملة ليس هناك جيش،
حميدتي سيطر على كل الخرطوم ببساطة شديدة، |
في اللول النسلم علي الناس الزارتنا امس وانا كنت ما موجود
نبدأ باسم الله
الأخ / علي الكنزي
الأخ/ منتصر
الأخ/ هاشم كاروري
الأخ/ نصر
الأخ/ عمر التاج
نعم الزوار حبابكم 10
طبعا الاساتذة/ اسامة الخواض، وحسن فرح معانا وشركاء في هذا الخيط وهم غنيون عن التعريف..
نجي لضيف شرفنا الحبيب بكور، وفي رواية اخرى (بكرالدين)
تعرف يا بكور انا متأكد انك سمعت بي قصة النلانة الوصفوا البعير وهم ما شافوه اصلا، وانك عارف انهم وصفوه تمام الوصف من الاتر حقو ...وكمان انا عارف انك عارف انو المناصير اشتهروا بمهنة قص الاتر وانت في مدني اكيد عرف انو اشهر قصاص اتر في مدني كان منصوري صاح؟
طبعا ح تقول لي دي علاقتها شنو بالحاصل ده؟
اقول الحاصل ده كله ليه علاقة بقص الاتر،، انا مستعد من اثارهم احكي ليك قصة الحاصل ده لمن تحلف انو انا يا مخابرات يا عميل صهيوني يا كوز وفي الكيزان يمكن اكون علي كرتي زاتو..
لو متابعني هني انا قبل كده كتبت عن حميدتي وقلت مهنتو كراعي ابل وتاجر حمير مأثرة فيه ووصفتبعض صفاتو وقلت ليكم عنده نقطة ضعف ممكن توديهو في داهية وانو الزول الاختاروا للعمل البسوي فيه ده هو البيعرف ينتهي منو..
يا بكور نحن بنشوف الاتر في الصور، وفي اللايفات وفي التصريحات، زاوية الماخوده منها الصورة يتورينا حاجات كتير، ومحتوى الصورة ابلغ، والكلام حدث ولا حرج مش زمان في واحد قال ليك (تحدث حتى اعرفك)
وانا بقول ليك صفة من الصفات السيئة الورثها حميدتي من مهنته السابقة (الزول ده ورث من الحمير صفة اللفخي) لفاخ.. اوريك كيف؟
ناس الدعم السريع مسيطرين سيطرة تامة على المديا الشغل الناجح البيسوهو في سنة بجي صابحنا ده بي لفخة واحدة يجعله هباءا منثورا..
اها انا اديتك راس الخيط لو عاوز تعرف الوضع على الارض كيف تابع حميدتي..
خاجة تانية : الزول الصنع حميدتي بالجد هذا ما عندوا اي اثر على الارض..لكن باكد ليك انو الزول القايد الجيش في الميدان قطع شك جاي من خلفية بدوية، والبعمل فيهو ده حسحسة يعني بيحسحس في حميدتي وحميدتي فاهم ده كويس عشان كده وافق على الهدنة والمفاوضات...
لو عوزين تقبضوا حميدتي حي تمشوا الخلا ده( ديم القراي، العلياب، ام سرح، اب سباع جورا) تجيبوا ليكم عربي منصوري وتقولوا ليه دايرين الزول ده حي كيف الدبارة؟
24 ساعة فقط بيجيبوا ليكم مكلبش
تقول لي ما قاري كويس؟
ان بقينا حيين بتشوف العجب
سلامي
| |
|
|
|
|
|
|
|
|
|
Re: الى اللذين يتمنون هزيمة الجيش او اضعافه (Re: جمال المنصوري)
|
استاذنا الكبير / اسامة الخواض
تحيات طيبات
Quote: لا احد يتمنى هزيمة جيش بلده.
هذه حقيقة بديهية لم ترد في خاطر صاحب البوست الكريم. |
يسالني الله في البعض هنا كتب مايفيد برغبته في اضعاف الطرفين ده بيعني الجيش ولا لا؟
لو ما كدا اصلا ما كنت كتبت البوست ده
تسلم يا ملك
| |
|
|
|
|
|
|
|
|
|
Re: الى اللذين يتمنون هزيمة الجيش او اضعافه (Re: جمال المنصوري)
|
((تجيبوا ليكم عربي منصوري وتقولوا ليه دايرين الزول ده حي كيف الدبارة؟))
ما من طرف لكن يا جمال...المناصير فيهم ناس البحر وفيهم ناس الخلاء
البعرفوا الدريبات ويقصوا الاثر هم مناصير الخلاء وليس غيرهم اسألنى انا احكى لك عن تجربتى مع العم اومحمد ودعثمان وزوجته فوقن (اجمهلن)
فى ذلك الزمان البعيد كان للوالد البدوى وشريكه المنصورى اومحمد قطيع من الجمال
وبما ان الوالد كان يمارس التجارة فى امدرمان فقد اتفق مع شريكه ان يقوم هو برعاية قطيع الجمال فى البلد
اذكر وانا طفل صغير حضور القطيع من وادى جورا الى بيتنا بقرية الترعة غرب الجزيرة كشوى
وردت الجمال للكير للشرب وقامت الوالدة باعداد الطعام للضيوف وفى صباح الغد شدوا الرحال للعبور بالقطيع للجزيرة كشوى اذ كان من عادتهم قضاء فترة التحاريق داخل الجزيرة ثم العودة الى وادى جورا مع بداية الخريف وكانت هذه الفرصة الذهبية لى ولم افوتها
امضيت عدة شهور معهم امارس مهنة الرعى وكانت من اسعد فترات حياتى
بدأ الخريف وكان عليهم ان يعبروا قبل ان يقع البحر فتم ذلك على ان يتوجهوا بالقطيع فى اليوم الثانى نحو وادى جورا
للاسف اخدتنى نومة صحيت متاخر فلم اجدالقطيع ولا الرجل وزوجته
فقررت ان التحق بهم
اتجهت جاريا نحو العدوة التى فى الافق البعيد غرب قريتنا وبعد جهد ومعاناة صعدت الى اعلى الجبل ونظرت فى كل الاتجاهات ولم اجد انسانا او حيوانا
صدمت وتألمت كيف يتركونى وقد امضيت معهم احلى الايام
وانا فى حالتى تلك واذ بالعم اومحمد ياتى مقربا على جمله
اناخ جمله واردفنى خلفه وانطلقنا نحو القرية
| |
|
|
|
|
|
|
|
|
|
Re: الى اللذين يتمنون هزيمة الجيش او اضعافه (Re: يحي قباني)
|
Quote: تحياتي استاذي منصوري
ادعوك لمشاهدة الحلقة 11 من شاهد على العصر مع الدكتور حسن الترابي
لمعرفة كيف تم تصفية الجيش السوداني و كبف تمت أسلمته ..
ان لم يكن لديك الوقت لمشاهدة الحلقة كاملة .. فقط شاهد الربع ساعة الاولى ..
تحياتي |
يمين الله يا يحى انا مستعد ابروز مداخلتك دي وزيارتك دي تشريف ما بعدوا تشريف، حب ساكت كدي لي وجه الله
يا يحى
موضوع الكيزان في الجيش ده موضوع مفروغ منو،
ومواجهتنا للكيزان تشهد عليها كتاباتنا هنا بس علي الموضوع غير
الموضوع اختيار بين جيش مهما كان سيء له عقيدة قتالية مختلفة وبين مليشيا منفلتة عنصرية دموية، وكمان ما داسينها ديل بيتوعدوا الشماليين بصورة علنية عندهم واحد من كبارم قال ليك ناس الشمالية ديل فلاتة وجايين من نيجيريا، وانعم بالفلاتة مالم ناس مننا وفينا بس ده في ادبياتهم يعني زرقة الموت فيهم خسارة، الا كمان جابت عليها انو الله ح ينصرهم لأنهم على حق
عليك زي ده بتختوا في مقارنة مع الجيش يا خي الجيش ده على مستوى المقاتلين فيه جميع اجناس السودان كدي عليك الله شوف المقاتلين بتاعين الجيش البيملوا العين ديل الاغلبية من فرسان النوبة ومن قبايل درافور الزرقة ومن البجا رماة الحدق، ومن النيل الازرق، ومن الكوة، وحات الله كان ما ابقى كضاب فيهم سودانيين من جنوب السودان، وفيهم السنجك، والجعلي والرباطابي، والمنصوري والشكري والرشايدي والقزايزي والدنقلاوي والمحسي وفوق البيعة قايدهم وريئس الاركان يتخيل لي من المسالمة..
انا ح ابروز مداخلتك دي يايحى قباني
| |
|
|
|
|
|
|
|
|
|
Re: الى اللذين يتمنون هزيمة الجيش او اضعافه (Re: جمال المنصوري)
|
Quote: ((تجيبوا ليكم عربي منصوري وتقولوا ليه دايرين الزول ده حي كيف الدبارة؟))
ما من طرف لكن يا جمال...المناصير فيهم ناس البحر وفيهم ناس الخلاء
البعرفوا الدريبات ويقصوا الاثر هم مناصير الخلاء وليس غيرهم اسألنى انا احكى لك عن تجربتى مع العم اومحمد ودعثمان وزوجته فوقن (اجمهلن) |
يا سلام يا حسن
كلهم يا حسن الفي البحر والفي الخلا بيعروا الشغلة دي كويس الا عوين الزمن ده ما فيهم الميزة دي، ولو ملاحظ انا قلت ليك جيبوهوا من الخلا، وحددت الخلا ده زاتو، في مناصير ابات البل موجودين في خلا ديم القراي، وبعض منهم سكن ديم القراي برضوا، وفيهم ناس في خلا قباتي والعلياب، وبعدين جبت جورا ووادي اب سباع ام سرح، عارف ليه في ام سرح ده عندي ود خالتي لزم اسمه احمد ود علي، كتن في جماعة من عرب دارفور سرقوا منو البل، وحاتك ختف بندقيتو وقصا الك الدرب وفي عقابن لمن جابن منهم راجعات...
بعدين الميزة دي منوفرة برضوا في مناصير البحر، وعلى فكرة المناصير هي القبيلة الوحيدة الناسها بقبوا وبعرفوا بعض باللسم، نجيك لي ميزة قص الاتر دي، ونحن صغار كنا كل واحد بي يخيتوا ليه توب الليل دموريي، وبينوم بيه بالليل فوق الرمال، اها الصباح لمن تعاين للأرض دي بتقدر تقرأ قصة الحياة الجرت بالليل، ده درب عقرب، ودي كدندايي، وداك درب فار، ودي ام جنيب، وديك كرعين صبرة، والزبادي ولبضربان وهكذا الخ الخ ..
وبتبدا تشبكا مع بعض، العقرب اخت الكدنداية، ام جنيب ساكة الفار وبتبدا تقص الدرب لمن تعرف النهاية، طبعا غالبا الضحية هو جيري الفار
وسبحان الله بالليل بالك في النجوم التري وبنات نعش والعصاية و..و.., وده كله علاقته شنو بمواسم الزراعة، والدميري، والتمر، ياه يا ابو علي الحكايي حلوي خلاص علا كبرنا علي دفن الشرك لي ام قيردون...
ازيك زعلك عافي يا دهب الجنيه الصافي
اووووه
يا الله الرزق والفاقة
نتلما وندق القاقا
في ديوانا داك اب طاقة
يا حسن عندي عندكم اهل في الشلال وفي كجي اقريهم مني السلام
| |
|
|
|
|
|
|
|
|
|
Re: الى اللذين يتمنون هزيمة الجيش او اضعافه (Re: جمال المنصوري)
|
اهلا استاذ المنصوري
قلت سيدي مصطحبا اقتباسي:
Quote: Quote: لا احد يتمنى هزيمة جيش بلده.
هذه حقيقة بديهية لم ترد في خاطر صاحب البوست الكريم.
يسالني الله في البعض هنا كتب مايفيد برغبته في اضعاف الطرفين ده بيعني الجيش ولا لا؟
لو ما كدا اصلا ما كنت كتبت البوست ده
تسلم يا ملك |
كلامي كان من باب السخرية.
فمن يتمنون هزيمة الجيش يعتبرون ان ذلك الجيش ليس جيشهم "الوطني".
المسألة في مكان آخر حول تسييس الجيش .
بعدين هزيمة أو إضعاف الجيش ما مشكلة.
ليه؟
ممكن نعمل جيش مهني جديد.
اصلا الجيش السوداني كان جزء من الجيش المصري،
ثم قام الانجليز بانشاء جيش سوداني بحت "قوة دفاع السودان".
هدفه الاساس قمع التفلتات والقيام بمهام لا يستطيع القيام بها "البوليس".
ثم تمت تسمية قوة دفاع السودان بالجيش السوداني.
نريد جيشا لا يتدخل في السياسة ولا يحتقر مواطنية "الملكييين".
| |
|
|
|
|
|
|
|
|
|
Re: الى اللذين يتمنون هزيمة الجيش او اضعافه (Re: osama elkhawad)
|
اسأل الله ان يمد في ايامنا
حتى نحضر مخاض الامة السودانية للمولود الجديد
لمولود ليس له صلة بكل الماضي ان شاء الله
وسيذهب هذا الزبد جفاء
حميدتي،حمدوك خالد سلك، عمران ، برهان، واللستة تطاول
ويبقى هذا الوطن الابي الحر
يقوده شبابه الذين بدمائهم زحزحوا الطغيان
فهم الاجدر والاحق بالقيادة والريادة
ليخرجوا لنا سودانا آخر
مطوي في الاشواق في صدور الاباء وارحام الامهات
لا يحتاج لاحد غير الله وسواعدهم
وإن الصبح لناظره قريب
| |
|
|
|
|
|
|
| |
جمال المنصوري
بدر الدين الأمير
دفع الله ود الأصيل
osama elkhawad
Hassan Farah
الصديق الزبير
جلالدونا
أبوبكر عباس
Ali Alkanzi
منتصر عبد الباسط
Hasheem Karouri
عمر التاج
Nasr
يحي قباني
فيس بوك
تويتر
انستقرام
يوتيوب
بنتيريست