قصة حقيقية من الزمن الجميل . عبد الله ود البوش

Quote: قصة حقيقية من الزمن الجميل . ______________ في نهاية سبعينات القرن الماضي كنت في تالتة ثانوي عام بمدرسة الهجرة الثانوية العامة بالهدى وقبل امتحانات الشهادة للدخول للثانوي العالي طلبت مننا ادارة المدرسة احضار رسوم الامتحانات والبالغ قدرها خمسة جنيهات وتم السماح لنا بمهلة اسبوع واحد فقط وكل طالب يمشي اهلوا يجيب الرسوم دي وكانت المدرسة تبعد عن حلتنا العتامنة حوالي ٢٠ كيلو متر وفي ذلك الزمان لاتوجد خطوط مواصلات منتظمة بالمنطقة الواحد يركب الشارع وعليك الله يجيك لوري ان كنت محظوظا او تدق الكدر لحدي تصل اهلك وقد عزمت السفر في صباح ذلك اليوم والدنيا صيف شهر تلاتة حر يدخل القمرية في الراكوبة وقبل بداية السفر لابد من التزويد فقد يطول السفر كداري مشيت لعمي موسى ود العوض صاحب دكان بالهدى ياعمي موسى انا ماش اهلي اجيب الرسوم اديني بلح وبسكويت اقطع بيهم الطريق امكن ما القى لوري قام من عنقريبو ودخل الدكان وزاد على طلبي سندوتش طحنية نص عيشة كامل بقرش قلت ليهو كدا حسابك كم ؟ قال لي البلح والبسكويت بقرشين والنص وبي طحنية مني انا فشكرته وقلت ليهو خلاص القرشين وباقي الحساب القديم بجيبوا ليك مع الرسوم قال لي الله يهون عليك وتحركت طبعا كداري وعليك يا الله وفي البداية جاتني فكرة كنت من زمان مفكر فيها لكن ما نفذتها قلت احسب الخطوات كم لحدي حلتنا وبديت احسب من دكان عمي موسى واحد اتنين تلاتة اربعة ومااااشي واحسب وقرمة من السندوتش وقرمة بسكويت وماسك حسابي وماااشي ولمن احصل ترعة اقعد شوية واشرب موية واقوم زهجت من الحساب جاتني النزعة الدينية قلت اشغل نفسي بيها سبحان الله والحمد لله والله اكبر والشيطان قال لي خليها احسن تغني وبديت باغنية يوسف خالي بالليل دا ماشي وين يا الكنار زهجت منها فكيتا غنيت اغنية قمنا سيرة لي كدباس يا ناس اتعبوني خلاس عطشت نزلت الترعة شربت موية وجدعت لي درابتين تلاتة في الترعة قلت انلخم السمك دا شوية وشربت اخر هين موية وقمت لسع البكاء ما جاكم اقسم بالله الليلة الا الشاشة ما تنشاف ليكم ايها الحساسون والحساسات ما اطول عليكم وصلت حلتنا عصرا كبير قبل المغرب وانا في اشد الشوق لامي وابوي واخواني واخواتي ولجدادتي الرقبانية وبلقاها فقعت قطع شك وجدادتي الرقطا بتكون مبيضة وراكضة وسبحان الله كلما اجي حلتنا من بعيد اول زول يشوفني امي دااااك عبدالله جاء وحات ابوي وتتلقاني في الشارع اصلا الزمن داك مافي حيشان او بالاصح نادرة والعندو حوش بدون باب الا حاج بلقة عندو باب زنكي مرة حبيب الله زعل منو قاليهو يوم القيامة باب الزنكي دا بختوهو في النار ولمن يسخن يتشوك بيهو ويقولوا ليك من اين لك هذا؟ حق الله بق الله سلمت علي ناس البيت جت وسوا لي موية ليمون بليمونة يابسة يلا ويامين طلعت منها نقطتين ولخوها لي بعود وتل تل تل قمت بيها وادشيت شبعان طحنية وبسكويت وامي قالت جري يا بت اللقمة دي من تحت العنقريب النطعما للجنا دا جعان وامشي لناس كلتوم جيبي لي منهم قرفة بصلها اتفها فوقا يما انا شبعان لبعدين للعشا وتم جر قدح اللقمة راجع في محلتو واسع انا جيتكم للرسوم والكلام موجه لابوي الله يرحمه ويغفر له الرسوم كم البخات بي الله الرسوم خمسة جنيه يابا وتبسمبل ونعوذ وبراس السبحة طقطق ولوحا لي فوق وقال اسع ديل نجيبن من وين في الصيفية دي لا صرف ولا حرف ولا اخدي ولا تعالي وعنزنا حقت الشاي بعناها ليك للبس المدرسة اسع علا الجدادة ام حلقا مر ول الحمارة الزرقا الفوقا عيشتنا ونقل مويتنا اها كيفن الدبارة يا ولدي والله كريم ورحيم ومن وقتها ساد التوتر البيت كلو قومي يا الفقيرة شوفي نسوانك ديل كان تلقي دين وانا بشق الحلة كان القى لي شي كب انقوم وقام الوالد له الرحمة والوالدة ربنا يطول عمرها وشقوا الحلة َرجعوا المغرب بالحسرة الحلة كلها مالقو فيها خمسة جنيه دين الله والرسول والحال كان من بعضه الا القليل منهم ابوي قال صباحاتو بيض والله كريم جريت عنقريب هنااااك في انتظار السهر مع البعوضة والهم الكبير ويا المحبوب تدينا هبوب دي امي تقول كدا وبالفعل هبت هبيبة خفيفة اطارت البعوض وبدات انا في الحيرة والهم الكبير وهداني تفكيري ان اكتب خطاب محكم وبلغة رصينة وجذابة وانا الذي كنت اكتب خطابات استقبال المسؤلين الكبار عند زيارتهم لمنطقتنا والليلة الحوبة جات لي روحي دي قمت علي حيلي ودخلت البيت وولعت لمبة الجاز ام قيطان وجريت شنطة اخي الاصغر واتفنت في وطات الله ويا حروف الضاد الليلة بطلعك ميتينك بهذه الغبينة وسطرت الخطاب التالي لن انساهو واحفظه حتى الان بسم الله الرحمن الرحمن السيد باشمفتش مكتب ٩١ سرحان المحترم السلام عليكم ورحمة الله تعالي وبركاته ضاقت ولما استحكمت حلقاتها فرجت وكنت اظنها لاتفرج اليوم جينا لك انا وابي فاما ان تفرج كربتنا علي يدك واما ان تقفل مدى الحياة وتكون سببا في تحطيم مستقبلي واسالك امام الله بذلك فانا مطلوب مني رسوم امتحانات الشهادة الثانوية العامة بمبلغ خمسة جنيه واطلب منك حقا وليس توسلا ولا شحدة فنحن قوم نحمل من عزة النفس ما لا يجعلنا في موقف سؤال الناس ولكننا نطلب منك سلفة بهذا المبلغ تخصم من اول صرف لوالدي فان وافقت بذلك تكون فرجت هذه الكربة وان لم توافق فالله المستعان والسلام عليكم ورحمة الله وهنا فقط شعرت بالعرق يتصبب مني وغر شديد قت ليكم وفت همدت اللمبة ومرقت عرقي يخر ناديت ابي يابا يابا نمت ول صاحي صاحي تعال مالك في شنو؟ يا ابوي بكرة نمشي المكتب ونطلب من الباشمفتش سلفة علي الصرف الجايي يا ولدي مافي مكتب بدي سلفة قبل الصرف كان شنو داك يابا انا من قبيل بكتب في خطاب وانا عندي امل كبير يسلفنا خلاص يا ولدي صباحاتو بيض ومن الصباح شربنا الشاي احمر موش قلت ليكم عنز الشاي بعناها وعليك يا الله انا وابوي فوق حمارتنا الرزقا عري ساي برا سرج اونس فيهو ويونس فوقي لحدي وصلنا المكتب مسافة ٨ كيلو تقريبا مشينا المكتب مافي زول الا الغفير قلنا ليهو دايرين الباشمفتش قال مشى البيت قبيل ومشينا البيت وكان وقتها سرايا كلمنا الغفير لقيناهو في الجنينة دايرين الباشمفتش دخل وبعد زمن ليس بالقصير خرج الينا يرتدي جلابية مشلخة وقال خير مالكم في شنو؟ انا طوالي ناولتو الورقة اقل من دقيقة نزلت دمعة طق فوق خدو وتانية دمعة كبيرة الدقة دي وقشاها بطرف الجلابية وشوية كدا الدموع غمرت وجهه بالكامل وغلبته السيطرة عليها ودنقر واشاح بوجهه عنا ورفع جلابيتو ويقش دمعو و دخل جوة البيت وجانا راجع قال هاكم اشربوا اول حاجة وتاني بدأ يقرا والدموع لم تتوقف دخل الورقة في جيبو وقال ادخلو جوة البيت ابوي قاليهو نحن مستعجلين اقضى لينا غرضنا ونمشي نشيل اهلنا قال اقعدو اتغدو معاي بوديكم بالعربية ابوي ضرب ضهر حمارتو الزرقا وقاليهو ودي تركب وين يا السيد الباشمفتش؟ قال خلاص دقيقة ودخل البيت ورجع سريعا وطلع خمسة جنيه جديدة لنج لا انساها المرسوم عليها وحيد القرن وقال لي يا عبدالله دي رسوم الامتحان ختها في جيبك وشلتها ولكم ان تتخيلوا قدرها عندي حتى هذه اللحظة ودايرين نطير من الفرح ونمشي قال لي اقيف ودي عشرة جنيه هدية النجاح مقدما ودخلتها في جيبي واكاد ما عارف شنو ذاتو وكمان دي عشرة جنيه تشتري بيها ملابس الثانوي العالي الردا والقميص والجزمة والشرابات والخمسة وعشرين جنيه دي هدية مني انا عشان خطابك دا وح احتفظ بيهو في خزنة المكتب شهادة للتاريخ اي باشمفتش يجي بعدي يقراهو وعدنا لحلتنا والعودة لا تشبه المشية ابي يحمد الله ويسبح وانا اغني الليلة وين لي وين يا عين انا فرحة علي شماتة واحد من الجماعة المشى ليهو ابوي يدين منو وقاليهو لمن ما عندكم حق الرسوم القراية ليكم شنو؟ من العشرين جنيه اشرينا نص كيلو لحم وملوة بصل ورطل زيت و رطل سكر ونص وقية بن وحلاوة اشراقة لي فاطنة اختي وبكرة شلت الخمسة جنيه ومعاها تلاتة جنيه ونص ورجعت ولكن هذه المرة لست راجلا بل وجدت لوري من رزقالة حلتنا والسيخ جاك زول والمرة دي غنيت دردق بي يا اللوري دردق بي اغنية خالي عبدالجبار الملقب بي ميتة وتم سداد الرسوم والجلوس للامتحان والنجاح الباهر ودخول حنتوب الثانوية اذاعة على الملا بالرادي وقتها وهذه قصة اخرى قصة الحصول على الرادي وحجار البطارية وزغرودة الوالدة اكاد اسمعها الان في اذني وتنزل معها دمعة وكانت النتائج من حنتوب ترسل للبريد عن طريق المكتب الزراعي ويستلم نفس الباشمفتش نتيجتي ويفتح المظروف ويضع فيه عشرة جنيهات ومعه ورقة صغيرة هذه هديتي لك يا عبدالله عمك احمد المصطفى ولكن ولكن ولكن في السنة الثانية وصلت النتيجة بدون العشرة جنيهات وقد رحل الى الرفيق الاعلى اللهم اسالك باسمك الاعظم وبكل اسم سميت به نفسك ان تجعل الفردوس الاعلى مسكنه وتجعل البركة في ذريته وتجبر بخاطرهم وللاسف الشديد بعد موته رحلت الاسرة مباشرة الى ديارهم ونسبة لعدم وسائل التواصل في ذلك الزمان التليد انقطع كل شئ عدا دعواتي المستمرة له واسال كل من قرا هذا المنشَور بالدعاء له . . عبدالله ود البوش الرياض ١٠ يونيو ٢٠٢٠